پرەمەر-ءمينيستردىڭ ورىنباسارى سەرىك جۇمانعاريننىڭ توراعالىعىمەن وتكەن وتىرىستا اۋىل شارۋاشىلىعى جانۋارلارىن قاداعالاۋ جۇيەسىن جەتىلدىرۋ ۇدەرىسى تالقىلاندى. «ەتتى ۆەتەريناريالىق-سانيتاريالىق ساراپتاۋ» جاڭا ءمودۋلىنىڭ ارقاسىندا اۋىل شارۋاشىلىعى جانۋارلارىن بىردەيلەندىرۋ اقپارات جۇيەسىندە (اشجب) مال سويۋ ورىندارىندا ساراپتاما اكتىسى مەن انىقتاما بەرۋ جانە جانۋاردىڭ ومىرلىك تسيكلى تۋرالى اقپارات جينالعان QR-كود جاساۋ ۇدەرىسى تسيفرلاندىرىلدى.
بۇل QR ەت ساتىلاتىن ورىندارعا ورنالاستىرىلادى, ول جانۋارلاردى ۆەتەريناريالىق تەكسەرۋسىز جانە ەت پەن ورگانداردى تەكسەرمەي مال سويۋدىڭ الدىن الۋعا مۇمكىندىك بەرەدى. جاڭا مودۋل الماتى, پاۆلودار, جەتىسۋ وبلىستارىندا قاناتقاقتى رەجىمدە سىنالىپ جاتىر.
بۇل ءتاسىل شەكارالىق وتكىزۋ بەكەتتەرىندە دە ەنگىزىلدى. كەلىپ تۇسكەن جۇكتەر تۋرالى مالىمەتتەر اقپارات جۇيەسىنە ەنگىزىلەدى, تەكسەرۋ جانە سىناما الۋ اكتىلەرىنىڭ ەلەكتروندىق نۇسقاسىن قالىپتاستىرادى, ولار مەملەكەتتىك ۆەتەريناريالىق ينسپەكتورعا جانە ۆەتەريناريالىق زەرتحانا قىزمەتكەرىنە جىبەرىلەدى. جۇيە پاۆلودار وبلىسىنىڭ شەكارا ماڭىنداعى بەكەتتەرىندە تەستىلەۋدەن ءساتتى ءوتتى.
«ەل اۋماعىندا مال سوياتىن 904 نىسان بار, ونىڭ ىشىندە 109-ى – ەت وڭدەۋ كاسىپورنى, 281-ءى – مال سويۋ پۋنكتى جانە 514 مال سويۋ الاڭى. ۆەتەريناريالىق تالاپتارعا سايكەس كەلمەگەندىكتەن, 106 مال سويۋ نىسانى جابىلدى, 2023 جىلعى قاڭتار-قازان ايلارى ارالىعىندا 661 مال سويۋ الاڭىنىڭ ەسەپ نومىرلەرى كەرى الىندى», دەدى اۋىل شارۋاشىلىعى ۆيتسە-ءمينيسترى امانگالي بەردالين.
سونىمەن قاتار ۆيتسە-مينيستر بارلىق ءىرى اۋىلدىق وكرۋگتە ۆەتەريناريالىق-سانيتاريالىق ساراپتاما زەرتحاناسى بار مال سويۋ پۋنكتتەرىن اشۋ قاجەتىن اتاپ ءوتتى.
– مال سويۋ الاڭدارى وتپەلى كەزەڭدە ءماجبۇرلى شارا رەتىندە اشىلعاندىقتان, قازىر زاڭناماعا وزگەرىستەر ەنگىزۋ ماقساتىندا جۇمىس ىستەپ جاتىرمىز, سودان كەيىن مال سويۋ الاڭدارى جويىلاتىن بولادى, – دەدى اۋىل شارۋاشىلىعى ۆيتسە-ءمينيسترى.
سونىمەن قاتار كەڭەستە امانگالي بەردالين قازاقستان اۋماعىندا جانۋارلار مەن قۇستاردى جوسپار بويىنشا دياگنوستيكالاۋ جانە ۆاكتسينالاۋ تۋرالى ايتتى. دياگنوستيكالىق جانە پروفيلاكتيكالىق ءىس-شارالار تۋرالى بارلىق مالىمەت اشجب بازاسىنا ەنگىزىلگەن. ناتيجەسىندە, كەيىنگى جىلى ەلىمىزدە قاۋىپتى اۋرۋ وشاقتارى 38%-عا تومەندەگەن.
شەگىرتكەگە قارسى كۇرەسكە دايىندىق تۋرالى اۋىل شارۋاشىلىعى ۆيتسە-ءمينيسترى ازات سۇلتانوۆ باياندادى. كەيىنگى جىلدارى اقتوبە جانە قوستاناي وبلىستارىندا زيانكەستەردىڭ تارالۋ الاڭدارى ءوستى (1 ملن گا نەمەسە رەسپۋبليكا بويىنشا جالپى الاڭنىڭ 69%-ى). 2023-2024 جىلدارى شەگىرتكە تارالۋىنىڭ 11 جىلداعى رەكوردتىق كورسەتكىشى ورىن الىپ وتىر. ەگىستىك جەرلەردى شەگىرتكەدەن ۋاقتىلى ساقتاۋ ءۇشىن الدىن الا مەملەكەتتىك ساتىپ الۋ جوسپارى جاسالىپ, كونكۋرستار جاريالاندى. وڭتۇستىك وڭىرلەردە قاجەتتى جۇمىستاردى ءساۋىر ايىندا, سولتۇستىكتە مامىردا باستاۋ جوسپارلانىپ وتىر.
كەڭەس قورىتىندىسى بويىنشا سەرىك جۇمانعارين اۋىل شارۋاشىلىعى مينيسترلىگىنە وبلىس اكىمدىكتەرىمەن بىرگە مال سويۋداعى جاڭاشىلدىقتار, ولاردىڭ ارتىقشىلىقتارى بويىنشا تۇرعىندار اراسىندا كەڭ اۋقىمدى اقپاراتتىق جۇمىس جۇرگىزۋدى تاپسىردى. سونداي-اق ەگىستىك جەرلەردى شەگىرتكەدەن ۋاقتىلى وڭدەۋ ءۇشىن بارلىق قاجەتتى پروتسەدۋرانى جەدەل جۇرگىزۋدى تاپسىردى.