پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە ەلەكتروندىق كىتاپحانا جۇيەسىنىڭ دامۋى تالقىلاندى. جيىنعا مادەنيەت جانە اقپارات, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرى, ۇلتتىق اكادەميالىق كىتاپحانانىڭ وكىلدەرى قاتىستى.
بۇگىندە ەلىمىزدە 11 مىڭنان اسا كىتاپحانا ءتۇرلى اقپاراتتىق جۇيە مەن كاتالوگتى قولدانىپ كەلەدى. ەلىمىزدەگى كىتاپ قورىن جۇيەلەۋ ءۇشىن بىرىڭعاي اۆتوماتتاندىرىلعان پلاتفورما جاساقتاۋ جۇمىسى باستالدى. مامانداردىڭ سوزىنشە, ونىڭ ارقاسىندا وقىرماندار قاجەتتى كىتاپتى نەمەسە ونىڭ ەلەكتروندى نۇسقاسىن وڭاي تابا الادى. جۇيەنى ەنگىزۋ اياسىندا بارلىق كىتاپحاناعا كىرۋ مۇمكىندىگى قاراستىرىلعان بىرىڭعاي ەلەكتروندى وقىرمان بيلەتى ازىرلەنەدى. قولدانۋشىلار ەلەكتروندى ۇكىمەت پورتالى ارقىلى تىركەلىپ, بيلەتكە قول جەتكىزبەك.
پلاتفورمادا كىتاپ قورىن ونلاين تولىقتىرۋ فۋنكتسياسى قاراستىرىلعان. ونى جەكە باسپالار دا پايدالانا الادى: جارىق كورگەن جاڭا تۋىندىلار جۇيەگە ەنگىزىلىپ, اقىلى جازىلۋشىلارعا قولجەتىمدى بولماق. وسىلايشا, جەكە باسپالار مەن اۆتورلاردىڭ مۇددەلەرىن قورعاۋ جوسپارلانعان.
– ءبىز ەلدەگى باسپالار وكىلدەرىمەن كەزدەسىپ, كىتاپتاردى جاريالاۋ ءتارتىبىن تۇسىندىردىك. ولار ۇسىنىلعان شارتتارعا كەلىسىم بەردى, – دەدى مادەنيەت جانە اقپارات ۆيتسە-ءمينيسترى ارمان جۇدەباەۆ.
پلاتفورمانى قاناتقاقتى رەجىمدە 2024 جىلى ىسكە قوسۋ جوسپارلانعان. باستاپقىدا ول ءىرى كىتاپحانالار بازاسىندا جۇمىس ىستەي باستايدى.
«تسيفرلىق پلاتفورما ەلىمىزدەگى بارلىق كىتاپ قورى ازاماتتارعا قولجەتىمدى بولۋى ءۇشىن ازىرلەنىپ وتىر. ەڭ الدىمەن, ەلەكتروندى نۇسقاعا 10 ءىرى كىتاپحانا وتەدى. ال قالعاندارى سايكەستەندىرۋ جۇمىستارىن قولعا الۋى كەرەك. كىتاپ قورى تولىقتاي سايكەس كەلگەن جاعدايدا كىتاپحانالار وقىرمانعا ارنالعان ىزدەۋ باعدارلاماسىن بەيىمدەۋگە ءتيىس», دەپ اتاپ ءوتتى ت.دۇيسەنوۆا.