وقۋ جىلى باستالعالى ميروليۋبوۆكا اۋلىنداعى ءاليا مولداعۇلوۆا اتىنداعى ورتا مەكتەپتە دەنەشىنىقتىرۋ ءپانى وتكەن جوق. سەبەبى سپورت زالعا اعىمدىق جوندەۋ جۇرگىزگەن مەردىگەر كومپانيانىڭ جۇمىسى ساپاسىز بولعاندىقتان, مەكتەپ باسشىلىعى قابىلداماي وتىر. ساپاسىز جوندەۋ سالدارىنان كوزدەرى جاۋدىرەگەن وقۋشىلاردىڭ شىرشا مەرەكەسى دە ويداعىداي ۇيىمداستىرىلمادى.
جاڭا جىل قارساڭىندا سامار اۋدانىنا قاراستى ميروليۋبوۆكا اۋلىنا ارنايى بارىپ, مەكتەپ سپورت زالىنداعى جوندەۋ جۇمىستارىن كورگەن ەدىك. ءيا, ەدەن تاقتايلارىن كەدىر-بۇدىر ەتىپ توسەگەن. كەيبىر تۇسىنا جاماۋ سالعان. قۇداي ساقتاسىن, بالا قۇلاعان جاعدايدا جاراقات الارى انىق. سونداي-اق جىلۋ باتارەيالارىن قورشاعان تاقتايلارى سولقىلداپ تۇر. جۇقا تاقتاي دوپ تيسە, مورت سىنادى. ونىڭ ۇستىنە ۇستىرىكتەلمەگەن. توبەدەگى جارىق شامدارى دا ارنايى تورمەن قاپتالماعان. اپاتتىق شىعۋ ەسىگىن تالاپقا ساي ستاندارتتان تارىلتىپ تاستاعانى بىلاي تۇرسىن, اشىلمايدى. سىرەسىپ جاتىر. الدا-جالدا توتەنشە جاعداي بولىپ, بالالاردى سىرتقا شىعارۋ كەرەك بولسا, بۇل ەسىكتەن ساۋ ەتىپ شىققاندى قويىپ, كەپتەلىپ قالۋى ابدەن مۇمكىن.
«ەدەن تاقتايلارىن سالىپ جاتقان كەزدە بىرنەشە رەت ەسكەرتتىك. وعان قاراماستان, مەردىگەرلەر جۇمىسىن جالعاستىرا بەردى. اۋەلى ەسكى تاقتايلاردى الماي, ۇستىنەن سالماقشى بولعان. ايتىپ ءجۇرىپ, اۋىستىرتتىق. بىراق تاقتايلار سۋ بولعان. سالدارىنان ءىسىنىپ, اشىلىپ كەتىپ جاتىر. جۇمىس ساپاسىز ورىندالعاندىقتان, قابىلداماي وتىرمىز. مۇندا بالالاردى كىرگىزىپ, وقىس جاعداي ورىن السا, قايتەمىز؟ سوندىقتان مۇنداي جۇمىسقا جاۋاپكەرشىلىك تانىتپاسا بولمايدى», دەيدى مەكتەپ ديرەكتورى جانات بولاتبەكقىزى.
ديرەكتوردىڭ ءسوزىن اۋىل اقساقالدارى, اتا-انالار دا راستاپ وتىر. جۇمىستىڭ ساپاسىز جۇرگىزىلگەندىگىن ايتىپ, كەمشىلىكتى دەرەۋ جويۋ كەرەك دەسەدى.
«ەكىنشى توقسان اياقتالدى, دەنەشىنىقتىرۋ ءپانى وتپەدى. بۇرىنعى ەدەنى تۇرا بەرۋى كەرەك ەدى. ال مىنا توسەگەن تاقتايلارى قاشانعا دەيىن شىدايدى, كىم ءبىلسىن؟ جالپى, اۋىلدىق جەر بولعاندىقتان, جاستاردىڭ دا كەشكىلىك دوپ وينايتىن جەرى – وسى سپورت زالى. قازىر ولاردى قويىپ, مەكتەپ وقۋشىلارى سپورت زالعا كىرە الماي ءجۇر. بالامنىڭ ايتۋىنشا, دەنەشىنىقتىرۋ ساباعىندا تەننيس نەمەسە دويبى وينايدى», دەيدى اتا-انا ولگا دجۋلاي.
ايتسا ايتقانداي, اۋىل جاستارىنىڭ كەشكىلىك سپورت زالدان باسقا بارار جەرلەرى جوق. جاستارعا, وقۋشىلارعا اينالدىرعان جالعىز سپورت زالدى ساپالى ەتىپ جوندەپ بەرە الماي وتىرىپ, باسقا قولداۋدى قالاي كورسەتپەك؟ سويتە ءجۇرىپ, اۋىلدا جاس قالماي بارادى دەپ الدەكىمدى سىناعىمىز كەلەدى. مەكتەپ ديرەكتورى ج.بولاتبەكقىزىنىڭ ايتۋىنشا, ءبىلىم وشاعىنا اۋىل جاستارى ۇنەمى دەمەۋشىلىك كورسەتىپ وتىرعاندىقتان, سپورت زالعا كىرۋگە رۇقسات بەرگەن-ءدى. بيىل عانا ىرىڭ-جىرىڭ بولعان جوندەۋ جۇمىستارىنان سوڭ, پروبلەما تۋىنداپ وتىر.
اۋەلدە اعىمدىق جوندەۋ جۇمىسى سمەتالىق قۇجات بويىنشا 11 ملن تەڭگەگە ەسەپتەلگەن. ال مەملەكەتتىك تاپسىرىس پورتالىندا «MEGA-STR» مەردىگەر كومپانياسى سومانى 6 ملن 880 مىڭ تەڭگەگە ءتۇسىرىپ, ۇتىپ العان.
«ەدەننىڭ ءب ۇلىنۋى ىلعالدىڭ جوعارى بولۋىنان ورىن الىپ وتىر. سەبەبى ءدال سول ۋاقىتتا شاتىردى جوندەپ جاتقان. شاتىر اشىق بولعاندىقتان, كۇزگى جاڭبىر كەزىندە ەدەننىڭ قۇرىلىس ماتەريالدارىنا سۋ تيگەن. ونىڭ ۇستىنە جىلۋ جۇيەسى دە قوسىلماعان ەدى. ەكىنشىدەن, كەمشىلىكتەر تۋرالى قاعاز جۇزىندە حابارلاماعان. العاشىندا كەم-كەتىك تۇستارىن قالپىنا كەلتىرىپ وتىردىق. جالپى, سپورت زالداعى اعىمدىق جوندەۋدىڭ كەپىلدىگى بار. بەلگىلەنگەن مەرزىم ىشىندە قانداي دا اقاۋلار شىعىپ جاتسا, ءبىز جوندەپ بەرەمىز», دەيدى «MEGA-STR» كومپانياسىنىڭ وكىلى باقىتبەك ءىلياسوۆ.
كومپانيا وكىلى ايتقانداي, جۇمىستىڭ 80 پايىزىن قابىلداپ الۋ جونىندەگى قۇجاتتارعا قول قويىلعان كورىنەدى. الايدا مەكتەپ باسشىلىعى قول قويۋدان باس تارتقانىن ايتادى. تۇسىنگەنىمىزدەي, قالعان جۇمىستىڭ كەمشىلىكتەرى جونىندە تاپسىرىس بەرۋشى تاراپ قاعاز جۇزىندە حاباردار ەتسە, مەردىگەر كومپانيا قالپىنا كەلتىرىپ بەرۋدەن باس تارتىپ وتىرعان جوق. بىراق شىم-شىتىرىق قاعاز جۇمىستارى قاشانعا دەيىن سوزىلادى؟ بارىنەن بۇرىن مەكتەپ باسشىلىعى باعدارلاماعا ساي دەنەشىنىقتىرۋ پانىنە قاتىسا الماي جۇرگەن وقۋشىلارعا نە دەپ اقتالادى؟ دويبى مەن ۇستەل تەننيسىنەن جالىققان وقۋشىلار ءبىر ۋاقىت جۇگىرگىسى كەلەدى, ۆولەيبول, باسكەتبول ويناساق دەسەدى. وكىنىشكە قاراي, سپورت زالى كەم-كەتىكسىز قايتا قاشان جوندەلەدى, بەلگىسىز.
شىعىس قازاقستان وبلىسى,
سامار اۋدانى