پارلامەنت سەناتىنىڭ دەپۋتاتى نۇرتورە ءجۇسىپ مەملەكەت باسشىسى قاسىم-جومارت توقاەۆتىڭ «Egemen Qazaqstan» گازەتىنە بەرگەن سۇحباتىندا قاسىرەتتى قاڭتار وقيعاسى تۋرالى ايتقان دەرەكتەرىنە قاتىستى پىكىر ءبىلدىردى, دەپ حابارلايدى Egemen.kz.
«پرەزيدەنت «Egemen Qazaqstan» گازەتىنە كەڭ كولەمدى سۇحبات بەردى. مۇقيات وقىپ شىقتىم. مەملەكەت باسشىسى قاسىرەتتى قاڭتار وقيعاسىنا بايلانىستى ءبىراز نارسە ايتىپتى. «...سوندىقتان ءبىر نارسەنى انىق بىلۋگە ءتيىسپىز. بەيبىت شەرۋگە تىيىم سالىنبايدى, ال جاپپاي تارتىپسىزدىكتىڭ كەز كەلگەن تۇرىنە قاتاڭ توسقاۋىل قويىلادى. ەلىمىزدە زاڭ مەن ءتارتىپ قانا ۇستەمدىك قۇرۋعا ءتيىس. بۇل – مەن ءۇشىن مىزعىماس قاعيدا. دەموكراتيانىڭ بەسىگى سانالاتىن باتىس ەلدەرىنە قاراڭىزدار, ەشكىم دە كوشەدە جاپپاي تارتىپسىزدىك جاساعان, مەملەكەتتىك ورگاندارعا شابۋىلداعان ادامنىڭ ماڭدايىنان سيپاپ, وبەكتەپ وتىرمايدى.
پوليتسيا جاپپاي تارتىپسىزدىكتى ۇيىمداستىرۋشىلاردى, ياعني بيلىكتىڭ زاڭدى تالاپتارىنا قارسى شىعۋعا ۇندەگەن, قارۋ-جاراق اكەلىپ تاراتقان, جاعدايدى ۋشىقتىرىپ, ادامداردى كۇش قولدانۋعا, ماڭايداعىنىڭ ءبارىن قيراتۋعا, ورتەپ-تالقانداۋعا ازعىرعان ادامداردى انىقتاپ, اشكەرەلەدى. ال تارتىپسىزدىككە كەزدەيسوق قاتىسقان, بىلمەستىكپەن ارانداپ قالعان ادامداردىڭ بۇزاقىلارعا قاتىسى جوق. ولارعا مەنىڭ باستاماممەن راقىمشىلىق جاسالدى. بۇعان دەيىن سوتتالعان 1205 ادامنىڭ 1095-ءى وسى راقىمشىلىققا ىلىكتى. ال جاپپاي تارتىپسىزدىكتى ۇيىمداستىرعاندار مەن لاڭكەستىك ارەكەتى, مەملەكەتكە ساتقىندىعى, بيلىكتى كۇشپەن باسىپ الۋعا تىرىسقانى جانە باسقا دا اۋىر قىلمىس جاساعانى ءۇشىن سوتتالعاندار جازاسىن تولىعىمەن وتەيتىن بولادى» دەپ بىرقاتار ءمان-جايدىڭ باسىن اشىپ بەردى.
ەسكى جۇيەنى كوكسەۋشىلەر ءالى دە تابىلادى. ولاردىڭ كوبىسى «مايلى جىلىك» مۇجىگەندەر…
حالىق پرەزيدەنتىمىزدىڭ ىرگەلى جانە تۇبەگەيلى رەفورمالارىن قولداپ وتىر. كەيىنگە ورالۋدىڭ ءجونى دە رەتى دە جوق! بۇل بۇلتارتپاس جانە بۇلجىماس قاعيدا بولۋى ءتيىس!», دەدى ن.ءجۇسىپ.