مەملەكەت باسشىسى قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا 2029 جىلعا قاراي ۇلتتىق ەكونوميكانىڭ كولەمىن ەكى ەسە ارتتىرىپ, 450 ميلليارد دوللارعا جەتكىزۋ كوزدەلگەنى تۋرالى ايتتى, دەپ حابارلايدى Egemen.kz.
«ارينە, بۇل – جەتۋگە بولاتىن مەجە. حالىقارالىق ۆاليۋتا قورىنىڭ ساراپشىلارى 2023 جىلدىڭ قورىتىندىسى بويىنشا قازاقستاننىڭ ىشكى جالپى ءونىمى قازىرگى باعامەن ەسەپتەگەندە 259 ميلليارد دوللاردان اسادى, ياعني 2022 جىلمەن سالىستىرعاندا 15 پايىزعا ارتادى دەپ باعالاپ وتىر. بۇل – ورتالىق ازياداعى ەڭ جوعارى اقشالاي ءوسىم. جان باسىنا شاققانداعى ىشكى جالپى ءونىم دە ءوسىپ كەلەدى. بۇعان قاتىستى بولجامدى كورسەتكىش بىلتىر 13 مىڭ دوللارعا جۋىقتادى.
ونىڭ جىل سايىنعى ءوسىمى 1,6 مىڭ دوللار بولادى دەپ باعالانىپ وتىر. حالىقارالىق ۆاليۋتا قورىنىڭ بولجامىنا سايكەس, 2028 جىلعا قاراي بۇل كورسەتكىش وتىز پايىزدان دا كوبىرەك ارتىپ, 16,8 مىڭ دوللارعا جەتەدى. شىن مانىندە, مەن ءۇشىن ماكروەكونوميكالىق كورسەتكىشتەر سونشالىقتى ماڭىزدى ەمەس, ازاماتتاردىڭ تۇرمىس ساپاسىنىڭ ءىس جۇزىندە جاقسارۋى ودان الدەقايدا ماڭىزدىراق», دەدى مەملەكەت باسشىسى.
پرەزيدەنت ۇكىمەت ەكونوميكانى باسقارۋدىڭ تىڭ تاسىلدەرىن قولدانا السا, جاڭا ايتىلعان جاقسى بولجامدار اقيقاتقا اينالاتىنىن ايتتى.
«بىرىنشىدەن, ەلىمىزدىڭ وركەندەۋىنە جول اشاتىن بىرقاتار ناقتى مىندەتتى شەشۋ قاجەت. سونداي مىندەتتىڭ ءبىرى – اۋقىمدى ونەركاسىپ جوبالارىن جۇزەگە اسىرۋ. قىركۇيەكتەگى جولداۋدا ۇكىمەتكە مۇنداي جوبالاردى انىقتاۋ جانە ينفراقۇرىلىمدى دامىتۋ جوسپارىن ازىرلەۋ تۋرالى تاپسىرما بەرىلدى. بۇل جوبالار ءىرى بيزنەس وكىلدەرىمەن, ينستيتۋتسيونالدى ينۆەستورلارمەن جانە ساراپشىلارمەن بىرگە پىسىقتالىپ, ناقتى جۇمىس اتقارىلىپ جاتىر.
تاعى ءبىر ماڭىزدى مىندەت – ينۆەستيتسيا تارتۋ. بۇل مىندەتتى ورىنداۋعا جەكەشەلەندىرۋ جانە اكتيۆتەردى قايتارۋ ناۋقاندارى دا سەپتىگىن تيگىزەدى. قوماقتى ينۆەستيتسيا بولسا, ەكونوميكا قارقىنى ۇدەيە تۇسەدى جانە جاڭا مۇمكىندىكتەر پايدا بولادى. وسى ورايدا مەن جاقىندا ينۆەستيتسيا شتابىن قۇرۋ تۋرالى جارلىققا قول قويدىم. بۇل شتابقا ەلىمىزدەگى ينۆەستيتسيالىق احۋالدى جاقسارتۋ جانە ينۆەستيتسيالىق جوبالاردى ساپالى جۇزەگە اسىرۋ ءۇشىن اۋقىمدى وكىلەتتىك بەرىلگەن.
ەكىنشى باعىتتاعى جۇمىس ەكونوميكانىڭ بارلىق سالاسىنا قاتىستى «ويىن ءتارتىبىن» بەلگىلەيتىن جۇيەلى رەفورمالاردى جۇزەگە اسىرۋ شارالارىن قامتيدى. مەنىڭ تاپسىرماممەن ۇكىمەت مەملەكەت پەن بيزنەستىڭ قارىم-قاتىناسىن قايتا قاراۋعا مۇمكىندىك بەرەتىن جاڭا سالىق كودەكسىن ازىرلەپ جاتىر. سالىق جۇيەسىن جەتىلدىرگەندە تەك تولەم جيناۋ تاسىلىمەن شەكتەلىپ قالماۋ وتە ماڭىزدى. ءبىر جاعىنان, ينۆەستورلارعا قولايلى جاعداي جاساۋ كەرەك. ەكىنشى جاعىنان, بيۋدجەت كىرىسىنىڭ ازايىپ كەتپەۋىنە ءمان بەرگەن ءجون. ياعني تارازى باسىن تەڭ ۇستاۋ قاجەت.
جاڭا بيۋدجەت كودەكسى دە – وتە ماڭىزدى قۇجاتتىڭ ءبىرى. ءبىز «قازىنا قاراجاتىنا» دەگەن كوزقاراسىمىزدى وزگەرتىپ, ونى ءتيىمدى, جونىمەن ءارى ۇنەمدەپ جۇمساۋعا ءتيىسپىز. بۇل رەتتە مەملەكەتتىك ساتىپ الۋ ءىسىن جانە مەملەكەت پەن جەكە سەكتوردىڭ سەرىكتەستىگىن رەتتەيتىن جاڭا زاڭدار ەلەۋلى ءرول اتقارادى. وسى قۇجاتتار مەملەكەتتىك ساتىپ الۋ ءىسىنىڭ اشىق بولۋىن دا قامتاماسىز ەتەدى. سونداي-اق ەكونوميكانى دامىتۋعا قاجەتتى قاراجات قورىن قالىپتاستىرۋعا سەپتىگىن تيگىزەدى», دەدى پرەزيدەنت.
بۇدان سوڭ ول كۆازيمەملەكەتتىك سەكتوردىڭ تيىمدىلىگىن ارتتىرۋعا كوپ كوڭىل ءبولۋ قاجەت ەكەنىن ايتتى.
«مىنا ماسەلەگە نازار اۋدارعىم كەلەدى. الەمدەگى ەكونوميكالىق احۋال ءبىزدىڭ ەلگە دە سالقىنىن تيگىزەتىنى ءسوزسىز. الايدا كەز كەلگەن قيىندىق جاڭا مۇمكىندىككە جول اشادى. ۇكىمەتتىڭ جەل قايدان سوقسا دا جەلكەندى وزىنە وڭتايلى بۇرا الاتىنداي, جان-جاقتى ويلاستىرعان جوسپارى بولۋعا ءتيىس. ەكونوميكانىڭ ءوسىمىن ىنتالاندىرۋ شارالارى مەن قۇرىلىمدىق رەفورمالار قاتار ءجۇرۋى كەرەك. ناقتىراق ايتساق, كاسىپكەرلىك پەن باسەكەنى دامىتۋ, جەكەمەنشىكتى قورعاۋ, ءادىل سوت تورەلىگى بولۋى وتە ماڭىزدى. سوندا عانا كوزدەگەن ماقساتتارىمىزدىڭ بارىنە قول جەتكىزىپ, بەلگىلەنگەن مەرزىمدە ۇلتتىق ەكونوميكا كولەمىن ەكى ەسە ۇلعايتا الامىز», دەدى پرەزيدەنت.