2024 جىلدىڭ 1 قاڭتارىنان باستاپ جۇمىس بەرۋشى قىزمەتكەرلەرىنە زەينەتاقى اۋدارىمدارىن ءوز ەسەبىنەن جۇرگىزە باستايدى. ۇكىمەتتە قارار قابىلدانىپ, كۇشىنە ەندى, دەپ جازادى Egemen.kz.
«جۇمىس بەرۋشىنىڭ مىندەتتى زەينەتاقى جارنالارىن ەسەپتەۋ (ەسەپكە جازۋ) جانە بىرىڭعاي جيناقتاۋشى زەينەتاقى قورىنا اۋدارۋ جانە ولار بويىنشا ءوندىرىپ الۋ قاعيدالارى مەن مەرزىمدەرىن بەكىتۋ تۋرالى» ەل ۇكىمەتىنىڭ قاۋلىسى كۇشىنە ەندى.
قۇجاتقا سايكەس جۇمىس بەرۋشىلەر ءوز قاراجاتى ەسەبىنەن مىندەتتى زەينەتاقى جارناسىن اۋدارادى. ول 2024-2028 جىلدار ارالىعىندا 1,5%-دان 5%-عا دەيىن كەزەڭ-كەزەڭىمەن وسۋگە ءتيىس. وسىلايشا زەينەتكە شىققان كەزدە جۇمىسكەرلەر قوسىمشا جيناقتاۋشى زەينەتاقى تولەمىمەن قامتاماسىز ەتىلەدى.
بۇل شارا, اسىرەسە, جاستاردى قولداۋعا باعىتتالعان. ولاردىڭ زەينەتاقى جيىنتىعى ءۇش كومپونەنتتەن: مەملەكەتتەن بازالىق زەينەتاقى, جيناقتاۋشى زەينەتاقى, بىرىڭعاي جيناقتاۋشى زەينەتاقى قورىنا اۋدارىم ەسەبىنەن جانە شارتتى-جيناقتاۋشى زەينەتاقى جۇمىس بەرۋشىلەردىڭ جارناسى ەسەبىنەن قۇرالادى.
جۇمىس بەرۋشىنىڭ مىندەتتى زەينەتاقى جارنالارىن ەنگىزۋ, اسىرەسە, ىنتىماقتى ءوتىلى جوق (1998 جىلعا دەيىن) نەمەسە ىنتىماقتى جۇيەدەگى ءوتىلى از ازاماتتار ءۇشىن وزەكتى.
الەمدىك تاجىريبەنى ەسكەرە وتىرىپ قابىلدانعان جۇيە ازاماتتاردى زەينەتاقىمەن قامتاماسىز ەتۋ مەن مەملەكەتتىڭ, جۇمىس بەرۋشىنىڭ جانە قىزمەتكەردىڭ ورتاق جاۋاپكەرشىلىككە جۇمىلدىرادى.
سالىق كودەكسىنە ساي جۇمىس بەرۋشىنىڭ مىندەتتى زەينەتاقى جارنالارىن تولەۋ شىعىنى قايتارىمسىز دەڭگەيدە قالادى.