سوناۋ 50-جىلدارى بۇقتىرما سۋ ەلەكتر ستانساسى سالىنىپ, كۇرشىم مەن مارقاكول جۇرتى ارالدا قالىپ قويعانداي كۇيگە تۇسكەن-ءدى. جاز شىقسا, پاروممەن قاتىناپ, قىس تۇسسە, مۇزبەن جۇرگەن تۇرعىنداردىڭ ماسەلەسىن پرەزيدەنت «Egemen Qazaqstan» گازەتىنەن وقىپ, ۇكىمەتكە تاپسىرما بەرگەن-تۇعىن.
مەملەكەت باسشىسىنىڭ تاپسىرماسى دەرەۋ قولعا الىنىپ, 2020 جىلى ارمان بولعان كوپىر قۇرىلىسىنىڭ قازىعى قاعىلدى. قارقىندى جۇمىس ناتيجەسىندە قوس جاعالاۋدان قاراما-قارسى باستالعان تەحنيكالىق كوپىر قۇرىلىسى سامار – كۇرشىم اۋداندارىنىڭ شەكاراسىندا ءتۇيىستى. قوس اۋداننىڭ جۇرتى ءارلى-بەرلى كوپىرمەن ءوتىپ, ارقا-جارقا بولىستى.
ەسكەرتە كەتەيىك, ۋاقىتشا كوپىر تەك تەحنيكالاردى, قۇرال-جابدىقتار مەن مامانداردى جۇمىس ورنىنا ۇزدىكسىز جانە جەدەل جەتكىزۋ ءۇشىن اشىلدى. جولاۋشىلاردىڭ جۇرۋىنە رۇقسات ەتىلمەيدى. تەحنيكالىق كوپىردىڭ ۇزىندىعى – 1 153 مەتر. باسىنان اياعىنا دەيىن 13 قۇرىلىس الاڭى بار.
كۇنى كەشە شىعىس قازاقستان وبلىسىنىڭ اكىمى ەرمەك كوشەرباەۆ كەستەگە سايكەس جۇرگىزىلىپ جاتقان جۇمىستاردىڭ بارىسىمەن تانىستى.
– كوپىر مەملەكەت باسشىسىنىڭ تاپسىرماسى بويىنشا سالىنىپ جاتىر. ەرتەڭگى كۇنى لوگيستيكانى, ءتۋريزمدى, شاعىن جانە ورتا بيزنەستى دامىتۋعا مۇمكىندىك بەرەدى. قازىردىڭ وزىندە مۇندا جاقىن ماڭداعى اۋىلداردىڭ تۇرعىندارى جۇمىس ىستەپ, جاڭا جۇمىس ورىندارى اشىلىپ جاتىر. كوپىردىڭ ءبارىمىز ءۇشىن, ءبىرىنشى كەزەكتە, شالعايداعى شەكارالاس اۋداندارىمىز; كۇرشىم, زايسان جانە تارباعاتاي اۋداندارىنىڭ تۇرعىندارى ءۇشىن ماڭىزى زور. مەن بۇل ستراتەگيالىق ماڭىزدى جوبانى 2024 جىلى اياقتايتىنىمىزعا سەنىمدىمىن, – دەدى ەرمەك كوشەرباەۆ.
قوس جولاقتى اۆتوموبيل كوپىرى كۇرشىم اۋدانىنىڭ قۇيعان اۋىلىنىڭ تۇسىنداعى ەنى ەڭ كىشى ۋچاسكەسىندە سالىنىپ جاتىر. دەگەنمەن, بۇل قازاقستانداعى ەڭ ۇزىن كوپىر بولادى.
قازىرگى ۋاقىتتا 18 تىرەكتىڭ 12-ءسى ورناتىلىپ, التى تىرەكتى ورناتۋ جۇمىستارى جۇرگىزىلىپ جاتىر. بۇدان باسقا, كىرمە جولدار, سۋ وتكىزۋ قۇرىلىستارى مەن اينالما جولدار رەتكە كەلتىرىلۋ باستالعان.
– ەگەر بۇگىنگى تاڭدا كەزەك كۇتۋ ۋاقىتىن ەسەپتەمەگەندە, سۋ قويماسى ارقىلى پاروممەن وتەتىن ۋاقىت 40 مينۋتقا سوزىلسا جانە پاروممەن ءاربىر ءجۇرىپ وتكەنى ءۇشىن كوپ اقشا تولەۋگە تۋرا كەلسە, قۇرىلىس اياقتالعاننان كەيىن سۋ قويماسىن ەكى مينۋتتا عانا كەسىپ وتۋگە بولادى, – دەپ اتاپ ءوتتى شىعىس قازاقستان وبلىسىنىڭ اكىمى.
بۇگىنگى تاڭدا نىسان رەسپۋبليكالىق مەنشىككە, ياعني اۆتوموبيل جولدارى كوميتەتىنە تاپسىرىلدى. قۇرىلىس جۇمىستارىنىڭ ساپاسى تۇراقتى باقىلاۋعا الىنعان. جول اكتيۆتەرى ساپاسىنىڭ ۇلتتىق ورتالىعى 14 رەت كەلىپ, 20 سىناما سىناقتان وتكىزدى. بارلىق انىقتالعان ەسكەرتۋ جويىلدى. تۇرعىنداردىڭ دا العىسى شەكسىز.
– كوپىر كەلەسى جىلى پايدالانۋعا بەرىلەدى دەگەندى ەستىپ, قۋانىپ جاتىرمىز. جۇمىستىڭ قارقىندى جۇرگىزىلىپ جاتقانىن كوردىك. قوس جاعالاۋدان قۇرىلىسى باستالعان تەحنولوگيالىق كوپىردىڭ ورتادا ءتۇيىسۋى ۇلكەن جاڭالىق بولدى. بىلۋىمشە, بۇل جۇمىستى شيراتا تۇسەدى. كۇرشىم مەن مارقاكول تۇرعىندارى اتىنان پرەزيدەنتىمىز قاسىم-جومارت كەمەل ۇلىنا العىس ايتامىز! جاڭا جىل ەلىمىزگە جاقسىلىعىمەن ەنسىن! – دەدى كۇرشىم اۋداندىق ارداگەرلەر كەڭەسىنىڭ توراعاسى ەسمانبەك اقتەكەنوۆ.
جاڭا جىل قارساڭىندا كۇرشىم جانە سامار اۋداندارىنىڭ تۇرعىندارى ءبىرىنشى بولىپ, تەحنولوگيالىق وتكەل بويىنشا ءبىر جاعالاۋدان ەكىنشى جاعالاۋعا ءوتتى.
شىعىس قازاقستان وبلىسى