شىعىس قازاقستان وبلىسىندا قوس اۋداننىڭ حالقى مالاقايلارىن اسپانعا اتىپ, قۋانىپ جاتىر. جاڭا جىل قارساڭىندا مەملەكەت باسشىسى قاسىم-جومارت توقاەۆ «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى» جارلىققا قول قويدى.
2024 جىلدىڭ 1 قاڭتارىنان باستاپ, كاتونقاراعاي اۋدانىنىڭ اكىمشىلىك ورتالىعى ۇلكەن نارىن اۋىلىنان كاتونقاراعاي اۋىلىنا كوشىرىلەتىن بولدى. سول سەكىلدى كۇرشىم اۋدانىنىڭ قۇرامىنان ءبولۋ جولىمەن مارقاكول اۋدانى قۇرىلادى.
بۇل جاڭالىقتى ەستىگەن كاتونقاراعاي مەن مارقاكول تۇرعىندارىنىڭ قۋانىشتارى قويىندارىنا سىيمادى. كاتونقاراعايلىقتار كەشكىلىك مادەنيەت ۇيىنە جينالسا, مارقاكول جۇرتى اۋىلدىڭ كىرەبەرىس قاقپاسىندا باس قوسىپ, پرەزيدەنت قاسىم-جومارت توقاەۆقا بەينەروليك ارقىلى العىستارىن جەتكىزدى.
– قۇرمەتتى قاسىم-جومارت كەمەل ۇلى, جاڭا جىل قارساڭىندا ءسىز ءبىزدى قۋانىشقا بولەپ وتىرسىز. كاتونقاراعاي جەكە اۋدان بولدى. سىزگە زور العىسىمىزدى ايتامىز! – دەدى اۋدان تۇرعىنى, ارداگەر جۋرناليست جانىبەك قىزىر.
سول سەكىلدى شەكارا شەبىندە جاتقان مارقاكول تۇرعىندارى دا اقجارما تىلەكتەرىن جاۋدىرىپ جاتتى.
قۋانسا قۋانعانداي. ماسەلەن, مارقاكولدىڭ ءتۇۋ تۇكپىرىندەگى بالىقتىبۇلاق, شاناعاتتى سەكىلدى اۋىلدىڭ تۇرعىندارى تىلدەي قاعاز ءۇشىن 200-300 شاقىرىمدى باسىپ ءوتىپ, اۋدان ورتالىعى – كۇرشىمگە سابىلىستى. سايراپ جاتقان بولسا, تاعى ءبىرسارى. تاۋ قويناۋىنداعى اۋىلداردىڭ اۋدان ورتالىعىنا جەتۋلەرى بەينەت ەدى. سول سياقتى كاتونقاراعايدىڭ ارعى باسىنداعى ارشاتى, بەرەل ەلى دە جۇزدەگەن شاقىرىمدى ارتقا تاستاپ, ۇلكەن نارىنعا شابىلدى. پرەزيدەنت قاسىم-جومارت توقاەۆ حالىق ۇنىنە قۇلاق اسىپ, ەل تىلەگىن ورىندادى. ءيا, مەملەكەت باسشىسىنا شىعىس قازاقستان تۇرعىندارىنىڭ العىسى شەكسىز.
البەتتە, قۇرىلعان اۋداندار ءبىر كۇندە اياقتان تۇرىپ كەتە قويماس. دەيتۇرعانمەن, رەسمي تۇردە دەربەس اۋدان بولىپ, جۇمىس ىستەيتىن بولادى. تاريحي ءساتتىڭ باسىندا تۇرعان جاۋاپتى جۇمىسشىلار ءۇشىن وڭاي بولماسى انىق. دەسە دە, جاڭا اۋداننىڭ حالقى ءبىر جاعادان باس, ءبىر جەڭنەن قول شىعارىپ, جۇمىلا كىرىسكەندەرى دۇرىس شىعار.
شىعىس قازاقستان وبلىسى