وتكەن تۇندە سولتۇستىكتە قاتتى بوران بولدى, ال الدىندا اۋا تەمپەراتۋرسى كۇرت كوتەرىلىپ, جاڭبىر جاۋدى. سۋىق جەلدەن جولدىڭ ءبارى كوكتايعاق بولىپ, بوران دا ۇدەي ءتۇستى. بارلىق باعىتتاعى جولدار جابىلدى.
قاۋىپسىزدىكتى قامتاماسىز ەتۋگە پوليتسيا دەپارتامەنتى پاترۋلدىك پوليتسيا باتالونىنىڭ بارلىق اۋىسىمدارى عانا ەمەس, ءتىپتى بۇل ءبولىنىستىڭ باسشىلىعى دا جۇمىلدىرىلدى. «استانا – پەتروپاۆل» اۆتوجولىنىڭ تايىنشا اۋدانى ارقىلى وتەتىن ۋچاسكەسىندە اۋىر جۇك كولىكتەرى قاتتى جەل مەن كوكتايعاقتىڭ سالدارىنان دوڭەس ۋچاسكەلەرگە كوتەرىلە الماي, 27 جەلتوقساننىڭ تاڭىندا بۇل جەردە 80-گە جۋىق فۋرا جينالىپ قالدى.
مامليۋت اۋدانىندا قوستاناي قالاسىنان پەتروپاۆل قالاسىنا اۋىل شارۋاشىلىعى تەحنيكاسىنىڭ قوسالقى بولشەكتەرىن اكەلە جاتقان «Volvo» فۋراسىنىڭ تىركەمەسى جولدان شىعىپ كەتتى. تىركەمەنى شىعارىپ الۋ ءۇشىن قاجەتتى جۇمىستار جۇرگىزىلىپ جاتىر. وبلىس اۋماعىندا ءبىر تۇندە بارلىعى 7 اۆتوكولىك وسىنداي جاعدايعا تاپ بولدى, ولاردىڭ بارلىعى شىعارىپ الىندى.
جابىق جولداردا بارلىعى 159 جۇك جانە 132 جەڭىل كولىك تۇرىپ قالدى. پوليتسەيلەر, مۇددەلى قىزمەتتەر مەن مەملەكەتتىك ورگانداردىڭ قىزمەتكەرلەرى 240-تان استام ادامدى قار قۇرساۋىنان بوساتتى. ولاردىڭ ءبىرازى جىلىتۋ ورىندارىنا جەتكىزدى. قول سوزىم جەر كورىنبەيتىن قارلى بوراندا پوليتسەيلەر ەلدى مەكەندەرگە 30-40 ماشينادان قۇرالعان 7 اۆتوكولىكتەر لەگىن جەتكىزدى. مامليۋت اۋدانىنىڭ ورتالىعى مامليۋتكا قالاسىنداعى ءبىلىم بەرۋ مەكەمەلەرىنىڭ بىرىنە تاماقتانىپ, جىلىنۋ ءۇشىن 80-نەن استام ادام ورنالاستىردى. ولاردىڭ قاتارىندا رەسەيدەن تاجىكستانعا ترانزيت ارقىلى بارا جاتقان اۆتوبۋستىڭ 70 جولاۋشىسى دا بولدى, ونىڭ 17-ءسى بالالار.
قازىرگى ۋاقىتتا وڭىردە اۋا-رايى تۇراقتالىپ كەلەدى, جولدار قار ۇيىندىلەرىنەن تازارتىلعاننان كەيىن كولىك قوزعالىسىن جانداندىرۋ جوسپارلانىپ وتىر.