ەلىمىزدە كوپتەگەن ادامنىڭ ءومىرىن قيعان اۋقىمدى اپاتتاردان كەيىن پرەزيدەنتتىڭ جارلىعىمەن قارالى كۇن جاريالانادى. بۇل كۇنى مەملەكەتتىك مەكەمەلەردەگى تۋ تومەن ءتۇسىرىلىپ, ويىن-ساۋىق شارالارى مەن كونتسەرتتەر توقتاتىلادى. مەملەكەتتىك جينالىستار ءبىر كۇندىك ۇنسىزدىكتەن باستالادى. 2023 جىلى ەلىمىزدە ەكى رەت ازا تۇتۋ كۇنى جاريالاندى, دەپ حابارلايدى Egemen.kz.
2006 جىلدان بەرى قازاقستاندا 13 رەت ۇلتتىق ازا تۇتۋ جاريالاندى.
ەڭ العاش ازا تۇتۋ 2006 جىلى 20 قىركۇيەكتە جاريالانعان. قاراعاندى وبلىسىنداعى لەنين اتىنداعى شاحتادا مەتان جارىلىسى بولىپ 41 كەنشىنىڭ ءومىرىن قيىپ اكەتتى.
ءبىر جارىم جىلدان كەيىن ەلىمىز قايتا قارا جامىلدى. 2008 جىلدىڭ 11 قاڭتارىندا قاراعاندى وبلىسىنداعى «اباي» كومىر كەنىشىندە جارىلىس بولىپ, 30 كەنشى قازا تاپتى.
ءۇشىنشى قايعىلى داتا 2010 جىلدىڭ 11 ناۋرىزىندا بولدى. سول كۇنى قىزىلاعاشتا بوگەت بۇزىلدى. سول كەزدە بولعان سۋ تاسقىنى ەل تاريحىنداعى ەڭ جويقىن سۋ تاسقىنىنىڭ ءبىرى سانالادى. بۇل تابيعي اپاتتان 45 ادام قازا تاپتى, ونىڭ 11-ءى بالالار ەدى.
2012 جىلى قازاقستاندا ازا تۇتۋ كۇنى ەكى رەت جاريالاندى. ءبىرىنشىسى 5 ماۋسىمدا بولعان. 28 مامىر كۇنى «ارقانكەرگەن» زاستاۆاسىندا 14 شەكاراشى مەن ءبىر اڭشى قازا تاپقان ەدى. ەكىنشىسى 25 جەلتوقساندا شىمكەنتتە ان-72 ۇشاعى اپاتقا ۇشىراعاننان كەيىن جاريالاندى. ەسكە سالايىق, ۇشاق اپاتىنان 27 شەكاراشى, ونىڭ ىشىندە جەتەۋى ەكيپاج مۇشەسى قازا تاپتى.
كەلەسى 2013 جىلدىڭ 31 قاڭتارىندا ۇشاق اپاتىنا بايلانىستى قارالى كۇن جاريالاندى. الماتى وبلىسىندا, قىزىلتۋ اۋىلىنىڭ ماڭىندا كوكشەتاۋ-الماتى باعىتىندا ۇشقان چەللەندجەر-200 ۇشاعى اپاتقا ۇشىرادى. 16 جولاۋشى مەن بەس ەكيپاج مۇشەسى قازا تاپتى. ۇشاق اپاتىنان زارداپ شەككەندەردىڭ اراسىندا قازاقستاننىڭ 20 ازاماتى مەن ءبىر قىرعىزستان ازاماتى بولعان.
2016 جىلدىڭ 9 ماۋسىمىندا قازاقستان ازاماتتارى اقتوبەدە بولعان جارىلىستىڭ قۇرباندارىن ەسكە الدى. ارتىنشا ءبىر توپ ادام اقتوبەدەگى ەكى قارۋ-جاراق دۇكەنىن توناپ, اسكەري بولىمگە شابۋىل جاساعان. سول كەزدە قازاقستاندا تەرروريستىك قاۋىپتىلىكتىڭ سارى دەڭگەيى جاريالاندى. بىرنەشە ادام قازا تاپتى, ونىڭ ۇشەۋى اسكەريلەر ەدى.
2019 جىلى الماتى ماڭىندا جولاۋشىلار ۇشاعى اپاتقا ۇشىراپ, 12 ادامنىڭ قازاسىنا سەبەپ بولدى. سوعان بايلانىستى اتالعان جىلدىڭ 28 جەلتوقسانى جالپىۇلتتىق ازا تۇتۋ كۇنى دەپ جاريالاندى.
كەلەسى قارالى كەزەڭ 2020 جىلدىڭ 13 شىلدەسىندە بولعان. سول جىلى قازاقستان حالقى COVID-19 پاندەمياسىنىڭ قۇرباندارىن ءبىر مينۋت ۇنسىزدىكپەن ەسكە الدى.
2021 جىلدىڭ 29 تامىزى ەل تاريحىنداعى تاعى ءبىر قارالى داتاعا اينالدى. جامبىل وبلىسىنداعى اسكەري ءبولىمنىڭ اۋماعىنداعى وق-ءدارى قويمالارىنىڭ بىرىنەن شىققان ءورت اۋقىمدى جارىلىستارعا اكەپ سوقتى. ول كەزدە 12 ادام قايتىس بولدى.
قازاقستان ءۇشىن كەلەسى قايعىلى كۇن – 2022 جىلدىڭ 10 قاڭتارى. قاڭتار ايىنىڭ العاشقى كۇندەرى ەلىمىزدىڭ بىرنەشە وڭىرىندە ورىن العان لاڭكەستىك ارەكەتتەر سالدارىنان بىرقاتار ەل ازاماتتارى كوز جۇمدى. وسى قايعىلى وقيعالارعا بايلانىستى, مەملەكەت باسشىسى قاسىم-جومارت كەمەل ۇلى توقاەۆ 2022 جىلعى 10 قاڭتاردى جالپىۇلتتىق ازا تۇتۋ كۇنى دەپ جاريالادى.
ال بيىل رەسپۋبليكادا ەكى رەت قارالى كۇن جاريالاندى. 12 ماۋسىمدا ەل «سەمەي ورمانى» مەملەكەتتىك تابيعي رەزەرۆاتىندا بولعان ورتتە قازا تاپقان ورمانشىلاردى ازا تۇتتى. الدىمەن جوعالعان ورمان شارۋاشىلىعىنىڭ ءۇش قىزمەتكەرىنىڭ دەنەسى تابىلدى. 10 ماۋسىم كۇنى كەشكە اباي وبلىسىنداعى ءورتتى ءسوندىرۋ جونىندەگى جەدەل شتابتىڭ مالىمەتى بويىنشا, جەدەل-ىزدەستىرۋ شارالارى بارىسىندا تاعى 11 قازا تاپقان ادامنىڭ ءمايىتى تابىلدى. وسىلايشا ورتتەن زارداپ شەككەندەردىڭ سانى 14 ادامعا جەتتى. ەل پرەزيدەنتى قازا تاپقان ورمان شارۋاشىلىعى قىزمەتكەرلەرىن قايتىس بولعاننان كەيىن ماراپاتتاۋ تۋرالى جارلىققا قول قويدى.
2023 جىلدىڭ 29 قازانى ەلىمىز ءۇشىن تاعى ءبىر قارالى داتاعا اينالدى. ەسكە سالايىق, كوستەنكو اتىنداعى شاحتادا قازا تاپقان كەنشىلەردى ەسكە الۋ ءۇشىن كوك بايراعىمىز تومەن ءتۇسىرىلدى.
جارىلىس 28 قازان كۇنى ساعات 02:33-تە بولدى. ءتىلسىز جاۋ 46 كەنشىنىڭ ءومىرىن جالماپ كەتتى. ءورت كەزىندە شاحتادا 252 كەنشى بولعان. قايعىلى وقيعادان كەيىن پرەزيدەنت «ارسەلورميتتال تەمىرتاۋمەن» ينۆەستيتسيالىق ىنتىماقتاستىقتى توقتاتۋدى بۇيىردى. وسى وقيعاعا بايلانىستى باس پروكۋراتۋرا قىلمىستىق ءىس قوزعادى.
وسىلايشا 2023 جىلى قىزمەتتىك بورىشىن وتەۋ بارىسىندا قايعىلى وقيعاعا تاپ بولعان 60 جەرلەسىمىزدى قايعىرا ەسكە الىپ, ازا تۇتتىق.