جەلاياقتار استانادا جارىسادى

قازاقتىڭ داڭقتى سپورتشىسى, جەلمەن جارىسقان جەلاياق ءامين تۇياقوۆتىڭ قۇرمەتىنە ۇيىمداستىرىلعان ءدۇبىرلى دوداعا ارماند ديۋپلانتيستەن باسقا دا كوپتەگەن ءدۇلدۇل كەلمەكشى. جاقىندا گۋداف تسەگاي مەن ارنە دە گراسس سىندى ايگىلى جەڭىل اتلەتتەردىڭ وسى جارىستا باق سىنايتىنى بەلگىلى بول­دى. ال سول اتاعى الىسقا تاراعان ساقا سپورت­شىلار جايىندا ءبىز نە بى­لەمىز؟

26 جاستاعى گۋداف تسەگاي ەفيوپيادا دۇنيەگە كەلدى. 2021 جىلى توكيو وليم­پياداسىندا 5 000 مەترگە جۇگىرگەن ول قولا مەدالدى موينىنا ءىلدى. بۇل جارىستا قارا قۇرلىقتىڭ وكىلى ءوزىنىڭ بۇرىنعى وتانداسى, قازىرگى كەزدە نيدەر­لاندتىڭ نامىسىن قورعاپ جۇرگەن سيفان حاسسان مەن كەنيالىق حەلەن وبيريدەن عانا قالىپ قويدى. الەم چەمپيوناتىندا گۋداف جۇلدەلەردىڭ تولىق جيىنتىعىن جەڭىپ الدى. ياعني 2019 جىلى دوحادا قولا السا, 2002 جىلى ورەگوندا كۇمىسپەن كۇپتەلدى. بۇل جارىستاردا ول 1 500 مەترلىك سايىستا باق سىنادى. بيىل تسەگاي 10 000 مەترلىك قاشىقتىقتى 31 مينۋت 27,31 سەكۋندتا جۇگىرىپ ءوتىپ, التىننان القا تاقتى.

ارنە دە گراسس 29 جاستا. ول كانا­دانىڭ تورونتو قالاسىندا تۋىپ-ءوستى. 100 بەن 200 مەترگە جۇگىرۋ جانە ەس­تافەتالىق سايىستا ارنە تولاعاي تابىستارعا قول جەتكىزدى. اتاپ ايتساق, ريو-دە-جانەيرو مەن توكيودا الاۋى تۇتانعان وليمپيا ويىندارىندا 1 التىن, 2 كۇمىس جانە 3 قولا ولجالادى. الەم چەمپيوناتتارىندا 1 التىن, 1 كۇ­­مىس جانە 3 قولا مەدالدى قورجىنعا سال­دى. پانامەريكا ويىندارىنىڭ ەكى دۇركىن جەڭىمپازى دەگەن اتاعى تاعى بار. اسىرەسە ارنە دە گراسس 200 مەتر­گە وتە كەرەمەت جۇگىرەدى. ماسەلەن, ءدال وسى قاشىقتىقتا ۇيەڭكى جاپىراقتارى ەلىنىڭ وكىلى ريو وليمپياداسىندا داڭقى جەر جارعان ۋسەين بولتتان عانا قالىپ قويسا, توكيودا شاشاسىنا شاڭ جۇقتىرمادى.

ەستەرىڭىزگە سالا كەتەيىك, World Athletics تۋرنيرلەر سەرياسى 27 قاڭ­تار­دا استانادان باستاۋ الىپ, 23 اق­پاندا مادريدتە ءوز مارەسىنە جەتەدى. سول ارالىقتا جەتى تۋرنير وتكىزىلەدى. ءار تۋردىڭ قورىتىندىسى بويىنشا كوپ ۇپاي جيناعان سپورتشى جەڭىمپاز دەپ جاريالانىپ, ولار 10 مىڭ دوللار كولەمىندە سىياقى الادى.