اتىراۋ وبلىسىندا پوليتسەيلەر مۇز ويىلىپ, وزەنگە باتىپ كەتكەن ەكى ادامدى قۇتقارىپ قالدى, دەپ حابارلايدى Egemen.kz Polisia.kz-كە سىلتەمە جاساپ.
«25 جەلتوقسان كۇنى ساعات 19:20 شاماسىندا قۇرمانعازى اۋدانى شارون وزەنى ۇستىندە بەلگىسىز ايەل ادام مۇز ويىلىپ, سۋعا ءتۇسىپ كەتكەنى جونىندە اۋداندىق پوليتسيا ءبولىمىنىڭ كەزەكشى بولىمشەسىنە حابار بەرگەن. اۋداندىق پوليتسيا بولىمىنەن ساپتىق جيىننان تاراپ كەلە جاتقان پوليتسيا قىزمەتكەرلەرى تەز ارادا وقيعا ورنىنا اتتانادى. اتالعان حابارلامانى ەستىگەن تاربيە جانە كادر بولىمشەسىنىڭ ينسپەكتورى رومان ناسيحان دا ۋاقىت وتكىزبەي جەكە اۆتوكولىگىمەن كەلەدى. ول اۆتوكولىكتەن ارقان ءجىپ الىپ مۇز ۇستىمەن جۇرگەندە ايەل ادامدى قۇتقارۋعا ۇمتىلعان ەر ادامنىڭ دا مۇز ويىعىنا ءتۇسىپ كەتكەنىن كورگەن. سول ساتتە كومەككە پاترۋلدىك پوليتسيا ءبولىمىنىڭ قىزمەتكەرلەرى ارتۋر كاريموۆ, نۇرحات زۇلقاروۆ, ادىلبەك تەمىربولات, جاندوس يباتۋللاەۆ, اماندىق ايدىناليەۆ جانە ۋچاسكەلىك پوليتسيا ينسپەكتورى دارحان امانعاليەۆ كومەككە كەلىپ, سۋعا كەتكەن ايەل ادام مەن ونى قۇتقارۋعا وقتالىپ ءوزى دە ويىلعان مۇز قۇرساۋىندا قالعان ەر ادامدى قۇتقارىپ قالعان. جۇقا مۇز ۇستىنە ءبىر ۋاقىتتا 10-عا جۋىق ادام شىققان ساتتە مۇز ويىعى ودان ءارى ۇلكەيگەن. الايدا ادام ومىرىنە اراشا بولار ساتتە ايازدى كۇندە مۇزدى سۋعا قاراماستان وقىس وقيعاعا كۋا بولىپ, بەيجاي قاراماعان 1996 جىلى تۋعان ازامات پەن پوليتسيا قىزمەتكەرلەرى 1959 جىلى تۋعان ايەل ادامدى جاعاعا شىعاردى», دەلىنگەن اقپاراتتا.
وزەنگە باتىپ كەتكەن ادامداردى قۇتقارعان پوليتسەيلەر جەدەل جاردەمدى كۇتپەستەن ءوز كولىكتەرىمەن اۋرۋحاناعا جەتكىزىپ, دارىگەرلەرگە تابىستادى.