قىزمەتتىك بورىشىن اتقارۋ كەزىندە ەكى قاباتتى جەكە تۇرعىن ءۇيدىڭ شاتىرىن شارپىعان ءورتتى ءسوندىرۋ بارىسىندا ءورت ءسوندىرۋشى قايتىس بولدى. بۇل تۋرالى توتەنشە جاعدايلار مينيسترلىگى ءمالىم قىلدى, دەپ جازادى Egemen.kz.
25 جەلتوقسان كۇنى ساعات 16.56-دا الماتى قالاسى №19 مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋ ەسەپتوپتارى قاراساي اۋدانى كوكوزەك اۋىلىنداعى ءورتتى سوندىرۋگە شىققان بولاتىن.
ەكى قاباتتى جەكە تۇرعىن ءۇيدىڭ شاتىرىن شارپىعان ءورتتى اۋىزدىقتاۋ بارىسىندا 19-ءموسب بولىمشە كومانديرى, ازاماتتىق قورعاۋ اعا سەرجانتى ءۋالي ادىلەت ايان ۇلى قايتىس بولدى.
مينيسترلىك وقيعانىڭ ءمان-جايىن انىقتاۋ ءۇشىن جەدەل-تەرگەۋ توبى وقيعا ورنىندا جۇمىس جۇرگىزىپ جاتقانىن جەتكىزدى.