قازاق اتىن كۇللى الەمگە ايگىلەگەن, ەل تاريحىنداعى تۇڭعىش كاسىپقوي بالۋان قاجىمۇقان مۇڭايتپاس ۇلىنا تيەسىلى «دجامبيا» قانجارى ۇلتتىق مۋزەي قورىنا تابىستالدى. سالتاناتتى تابىستاۋ راسىمىنە مادەنيەت جانە اقپارات ۆيتسە-ءمينيسترى ارمان جۇدەباەۆ, ءماجىلىس دەپۋتاتى ارداق نازاروۆ, كۇش اتاسى اتانعان اڭىز بالۋاننىڭ شوبەرەسى ايكەن مۇقانوۆا جانە ت.ب. قاتىستى, دەپ جازادى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ۆيتسە-مينيستر ارمان جۇدەباەۆ اراب ۇستالارىنىڭ «دجامبيا» قانجارىن قازاقتىڭ ايگىلى بالۋانىنا ارنايى جاساعانى – اراب, تۇركى الەمىنىڭ اڭىز بالۋانعا دەگەن بيىك قۇرمەتىنىڭ بەلگىسى ەكەندىگىن اتاپ ءوتتى.
قانجاردىڭ ەكى جاعىندا اراب ارىپتەرىمەن كونە تۇرىك-وسمان تىلىندە جازىلعان ماتىندەر بار. ناقتى اتاعاندا سول جاق تۇسىنا «كۇشتى, جەڭىلمەيتىن مۇڭايتپاس ۇلى مۇقانعا», ال وڭ جاق تۇسىندا «بىزدەن, قاجىلىقتان ەستەلىك, شاعىر پاشا, 1330 جىل» (حيجرا جىل ەسەپتەۋى بويىنشا 1330 جىل بۇل قازىرگى جىل ساناۋىنا سايكەس 1912 جىل) دەپ جازىلعان.
ءىس-شارا بارىسىندا ۇلتتىق مۋزەيدە ق.مۇڭايتپاس ۇلى جادىگەرلەرىنەن كورمە ۇيىمداستىرىلدى. قازىرگى ۋاقىتتا مۋزەي قورى اتالعان قانجارمەن تولىعىپ, بالۋانعا قاتىستى جادىگەرلەر سانى 27-گە جەتكەن.