پرەزيدەنت اكىمشىلىگىنىڭ باسشىسى ولجاس بەكتەنوۆتىڭ توراعالىعىمەن 19-23 جەلتوقسان ارالىعىندا قازاقستان رەسپۋبليكاسى پرەزيدەنتى جانىنداعى جاستار كادر رەزەرۆى جونىندەگى ۇلتتىق كوميسسيا پرەزيدەنتتىك جاستار كادر رەزەرۆىنە ىرىكتەۋدىڭ اقتىق كەزەڭىن وتكىزىپ جاتىر, دەپ جازادى Egemen.kz.
بيىلعى ىرىكتەۋگە 6404 ادام نەمەسە رەزەرۆتەگى 1 ورىنعا 128 ۇمىتكەر قاتىستى. كوپ كەزەڭنەن تۇراتىن ىرىكتەۋ ناتيجەسى بويىنشا ۇلتتىق كوميسسيا مۇشەلەرىمەن اڭگىمەلەسۋدەن وتەتىن 100 ۇزدىك كانديدات انىقتالدى.
اڭگىمەلەسۋ قورىتىندىسى بويىنشا پرەزيدەنتتىك جاستار كادر رەزەرۆىنە 50 ادام ىرىكتەلىپ الىنادى. ولار الداعى ۋاقىتتا مەملەكەتتىك ورگاندار مەن ۇلتتىق كومپانيالاردا ءتۇرلى جاۋاپتى لاۋازىمدارعا تاعايىندالادى.
پرەزيدەنتتىك جاستار كادر رەزەرۆى – مەملەكەت باسشىسىنىڭ تالانتتى جاستاردى مەملەكەتتىك باسقارۋ جۇيەسىنە تارتۋ جونىندەگى باستاماسى. رەزەرۆكە ىرىكتەۋ تەك جوعارى كاسىبي جانە مورالدىق قاسيەتتەر نەگىزىندە ولاردىڭ مانسابىن وسىرۋگە مۇمكىندىك بەرەدى.
2019 جىلدان بەرى مەملەكەتتىك ورگاندار مەن كۆازيمەملەكەتتىك سەكتورداعى ءتۇرلى لاۋازىمدارعا رەزەرۆتەگى 270 جاس مامان تاعايىندالدى. ولاردىڭ 33-ءى ساياسي, بەسەۋى – «ا» كورپۋسىنداعى اكىمشىلىك لاۋازىمداردا قىزمەت اتقارادى.