تاۋەلسىزدىك كۇنى قارساڭىندا تارباعاتاي اۋدانىندا بىرقاتار الەۋمەتتىك نىساندار اشىلىپ, 27 وتباسى باسپانالى بولدى. جالپى, جاڭادان قۇرىلعان بۇل اۋداندا جىل كولەمىندە كوپتەگەن يگىلىكتى ىستەر اتقارىلدى.
مەرەكەگە وراي «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا تارباعاتاي اۋدانىندا التى بىردەي مەديتسينالىق پۋنكت اشىلدى. اتاپ ايتساق, شەكارا شەبىندەگى احمەتبۇلاق, جاڭا تالاپ اۋىلدارىندا, قابانباي اۋىلدىق وكرۋگىنە قاراستى شورعا مەن قازاقستاندا جانە شولاقوردا مەن اقمەكتەپ اۋىلدارىندا زاماناۋي مەديتسينالىق پۋنكتتەر حالىققا قىزمەت كورسەتەدى. زاماناۋي دەپ وتىرعانىمىز, پۋنكتتەر قاجەتتى مەديتسينالىق قۇرال-جابدىقتارمەن تولىق قامتىلعان. رەسمي دەرەكتەرگە كوز سالساق, ءار پۋنكتتىڭ قۇنى 150 ملن تەڭگەنى قۇراعان. سونىمەن قاتار قۇيعان جانە تاۋكە اۋىلىنىڭ امبۋلاتوريالارى كۇردەلى جوندەۋدەن ءوتىپ, مەرەكە قارساڭىندا ەسىگىن ايقارا اشتى.
بۇدان بولەك, بىرقاتار الەۋمەتتىك نىساندار تۇرعىنداردىڭ يگىلىگىنە تابىستالدى. كۇنى كەشە عانا اۋدان ورتالىعى اقجاردا «Street Workout» پەن بالالار ويىن الاڭى كوپشىلىك جاستى قۋانتقان. قۋانىشتى جاڭالىقتىڭ تاعى ءبىرى – شەڭگەلدى اۋىلىندا 100 ورىندىق جاڭا مەكتەپ-بالاباقشا كەشەنى 11 جىلدىق بولىپ قايتا قۇرىلدى. اۋداننىڭ دامۋى دەگەن وسى ەمەس پە؟
– تارباعاتايدىڭ جەكە اۋدان بولىپ, الەۋەتى ارتا باستاعانىن كورگەن تۇرعىندار قۋانىپ وتىر. دەربەس اۋدان بولعالى ۇلكەن جۇمىستار اتقارىلدى. اقجار اۋىلىندا بەس كوشەگە اسفالت توسەلىپ, جيىرمادان استام كوشە جارىقتاندىرىلدى. بالالار ءۇشىن ەكى فۋتبول الاڭى سالىندى. يگىلىكتى ىستەردى ايتا بەرسەم كوپ, – دەيدى اۋدان اقساقالى, زەينەتكەر وراز ساعاتبەكوۆ.
سونداي-اق شىعىس باعدارلاماسى بويىنشا تارباعاتاي اۋدانىندا ءبىر قاباتتى 27 باسپانا بوي كوتەرىپ, تاۋەلسىزدىك كۇنى قارساڭىندا كوپبالالى جانە از قامتىلعان وتباسىلارعا ۇلەستىرىلدى. قاراسۋ اۋىلىندا 4 وتباسىنا باسپانا كىلتى بەرىلسە, اقجاردا 18 ءۇيدىڭ كىلتى تابىستالدى. ماڭىراقتا ءۇش باسپانا, تۇعىلدا ەكى باسپانا ۇلەستىرىلدى. بۇل – مەرەكە قارساڭىندا عانا اشىلعان نىساندار. ال جىل كولەمىندە قىرۋار شارۋا تىندىرىلدى.
شىعىس قازاقستان وبلىسى,
تارباعاتاي اۋدانى