تاۋەلسىزدىكتىڭ قادىرىن ءبىلۋ ماڭىزدى – م.اشىمباەۆ

«بارشاڭىزدى تاۋەلسىزدىك كۇنىمەن شىن جۇرەكتەن قۇتتىقتايمىن! تاۋەلسىزدىك كۇنى – مەملەكەتتىلىكتى نىعايتاتىن, وتانشىلدىقتى ارتتىراتىن جانە ۇلتتى ۇيىستىراتىن ايشىقتى مەرەكە. سوندىقتان بۇل داتانىڭ ماڭىزى زور, ءمانى ەرەكشە.

ەگەمەندىك – ءبىزدىڭ ەڭ باستى قۇندىلىعىمىز. تاۋەلسىزدىككە وڭايلىقپەن قول جەتكىزبەگەنىمىز انىق. سول سەبەپتى, بۇگىنگىدەي قاستەرلى مەرەكەدە ءبىز ازاتتىق جولىندا باسىن بايگەگە تىككەن ارىستارىمىز بەن ەركىندىك ءۇشىن ەتىگىمەن سۋ كەشكەن اعا بۋىننىڭ رۋحىنا تاعزىم ەتەمىز. ولاردىڭ عيبراتتى عۇمىرى مەن ەڭسەلى ەلدىككە باستاعان باتىل قادامدارىن كەڭىنەن دارىپتەيمىز. بۇل – تاۋتۇلعالارىمىزدى ماڭگى جادىمىزدا ساقتاۋ جانە تاۋەلسىزدىكتىڭ قادىرىن جەتە ءتۇسىنۋ ءۇشىن اسا ماڭىزدى.

قازىرگى تاڭدا پرەزيدەنتىمىز قاسىم-جومارت كەمەل ۇلى توقاەۆتىڭ باستاماسىمەن ەلىمىزدە اۋقىمدى رەفورمالار ىسكە اسىرىلىپ جاتىر. ونىڭ ءبارى تاۋەلسىزدىكتى ساقتاۋ, قازاقستاندى ءوسىپ-وركەندەگەن, دامىعان ەلگە اينالدىرۋ جانە ادىلەتتىلىك سالتانات قۇرعان مەملەكەت قالىپتاستىرۋ سياقتى ماڭىزدى مىندەتتەرگە تابان تىرەيدى», دەدى م.اشىمباەۆ.

سەنات سپيكەرى ەلدىگىمىزدىڭ ىرگەسىن  نىعايتىپ, ەڭسەسىن بيىكتەتۋ ىنتىماق-بىرلىگىمىزگە بايلانىستى ەكەنىن ايتتى.