مەملەكەت باسشىسى ەل ورداسى استانادا اشىلعان جاڭا ەمحانانى ارالاپ كوردى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
«City» ەمحاناسىنىڭ جاڭا فيليالى استانانىڭ قارقىندى دامىپ كەلە جاتقان اۋدانىندا ورنالاسقان. بۇل نىساندا 30 مىڭعا دەيىن پاتسيەنت تىركەلە الادى. سونداي-اق مۇندا حالىققا العاشقى دارىگەرلىك كومەكتەن باستاپ كەشەندى دياگنوستيكا مەن كونسۋلتاتسياعا دەيىنگى قىزمەتتەر كورسەتىلەدى.
جوبانىڭ ينۆەستورى, «Olymp Medical Group» جشس باس ديرەكتورى ەرلان سۇلەيمەنوۆتىڭ ايتۋىنشا, بۇل City ەمحانالار جەلىسىنىڭ ءۇشىنشى فيليالى. ەلوردانىڭ نۇرا جانە الماتى اۋداندارىندا ەكى فيليال جۇمىس ىستەپ جاتىر. تاعى دا ءۇش نىسان كەلەسى جىلى پايدالانۋعا بەرىلمەك.
ەمحانانىڭ تاعى ءبىر ەرەكشەلىگى وندا ماممولوگيالىق ورتالىق اشىلادى. ناۋقاستار مۇندا كەشەندى دياگنوستيكادان ءوتىپ, ءسۇت بەزى اۋرۋلارىنان ەمدەلە الادى. مەديتسينالىق ورتالىقتا توموسينتەزى بار تسيفرلىق مامموگرافيا, ءداستۇرلى جانە ۆاكۋمدىق اسپيراتسيالىق بيوپسيا ادىستەرى, حيرۋرگكە قاتەرلى ىسىكتەردى الىپ تاستاۋ جولىن كورسەتەتىن لوكاليزاتسيالىق ينەلەر ورناتۋ سياقتى دياگنوستيكالىق تەحنولوگيالار قولدانىلادى.
سونىمەن قاتار ەمحانادا بارلىق قاجەتتى قۇرالدارمەن جابدىقتالعان امبۋلاتوريالىق حيرۋرگيا ورتالىعى اشىلماق.
استانا قالالىق قوعامدىق دەنساۋلىق ساقتاۋ باسقارماسىنىڭ باسشىسى ءاليا رۇستەموۆانىڭ ايتۋىنشا, قازىرگى ۋاقىتتا ەلوردانىڭ سول جاعالاۋىندا امبۋلاتوريالىق كومەك بەرۋ ءىسى كەنجەلەپ قالعان. قوسىمشا تاعى 5 ەمحانا اشۋ كەرەك. حالىق سانىنىڭ ۇدايى ءوسىپ كەلە جاتقانىن ەسكەرسەك, مەديتسينالىق مەكەمەلەرگە دەگەن قاجەتتىلىك ءالى دە ارتا بەرەدى. بۇل ماسەلەنى شەشۋدە مەملەكەتتىك-جەكەمەنشىك سەرىكتەستىك بەلسەندى قولدانىلادى. بەس جىل ىشىندە استانا قالاسىنىڭ اكىمدىگى 3 مەملەكەتتىك ەمحانا سالىنادى جانە 12 جەكە ەمحانا اشىلادى دەپ جوسپارلاپ وتىر.