جامبىل وبلىسىندا تابيعي سيپاتتاعى توتەنشە جاعداي جاريالاندى. اۋا رايىنىڭ كۇرت ناشارلاۋىنا بايلانىستى رەسپۋبليكالىق ماڭىزى بار اۆتوجولدار جابىلدى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
«اۋا رايىنىڭ كۇرت ناشارلاۋىنا بايلانىستى 12 جەلتوقساننان باستاپ رەسپۋبليكالىق ماڭىزى بار «باتىس ەۋروپا-باتىس قىتاي» اۆتوبانىنىڭ «تاراز-الماتى» باعىتى بويىنشا جانە وبلىستىق ماڭىزى بار بىرقاتار جولدا كولىك قوزعالىسى توقتاتىلدى», دەلىنگەن اكىمدىك حابارلاماسىندا.
جامبىل وبلىسى اكىمىنىڭ تاپسىرماسىمەن 13 جەلتوقساننان باستاپ وڭىرلىك جەدەل شتاب قۇرىلعان. قۇتقارۋ جۇمىستارىنا 117 ارنايى تەحنيكا, 103 ادام (تجد, اسكەري قىزمەتشىلەر) جۇمىلدىرىلىپتى.
14 جەلتوقسان كۇنى ساعات 23.00-دەگى جاعداي بويىنشا قۇتقارۋ بولىمشەلەرى 1279 ادامدى قۇتقارىپ, ەۆاكۋاتسيالادى. ولار قورداي اۋدانىنداعى 6 جىلىتۋ پۋنكتىنە ورنالاستىرىلدى (قاينار-1, العا-1,قورداي-3, كەنەن-1). ءالى دە قار قۇرساۋىندا قالعان كولىكتەردىڭ سانى ناقتىلانىپ جاتىر.
قاتتى جەل مەن قاردىڭ سالدارىنان شۋ اۋدانىندا ەلەكتر جەلىلەرى ءۇزىلىپ, تىرەكتەر قۇلادى. توتەنشە جاعداي سالدارىنان «شۋ وتار» ۋچاسكەسىندە 11 جولاۋشىلار پويىزى توقتاپ تۇر, ولاردىڭ ارقايسىسىندا ورتاشا ەسەپپەن 500-700 ادامنان بار. 12 جۇك پويىزى ءوز ۋاقىتىنان كەشىگىپ جاتىر.
وبلىستىڭ 4 اۋدانىنىڭ 32 ەلدى مەكەنىندە 8 882 ابونەنت ەلەكتر قۋاتىنان اجىراتىلعان. قازىرگى كەزدە جەلدىڭ جىلدامدىعى سەكۋندىنا 45 مەترگە دەيىن جەتىپ تۇر. الداعى كۇندەرى «قازگيدرومەت» رمك بولجامىنا سايكەس 30 م/س قاتتى جەل ۇيىتقۋى ساقتالادى.
15 جەلتوقسان ساعات 06:00 - دەگى جاعداي بويىنشا 2413 ادام قۇتقارىلدى, ولاردىڭ ىشىندە 90 بالا بار. 600-گە جۋىق ادام ۇيلەرىنە قايتارىلدى. 1813 ادام التى اۋىلداعى جىلىتۋ پۋنكتتەرىنە جەتكىزىلدى. 3 ازامات قورداي اۋداندىق ورتالىق اۋرۋحاناسىنا جەتكىزىلدى. ولاردىڭ جاعدايلارى تۇراقتى, دارىگەردىڭ باقىلاۋىندا. ەكى كۇن ىشىندە جالپى 5000 ادام قۇتقارىلدى.
قازىرگى ۋاقىتتا قورداي جانە شۋ اۋداندارىندا قوسىمشا 825 ورىندىق 9 جىلىتۋ پۋنكتى ۇيىمداستىرىلعان. قۇتقارۋ شارالارىنا 171 ادام جانە 76 بىرلىك تەحنيكا جۇمىلدىرىلعان. جولداعى بلوك-بەكەتتەرگە پوليتسيا ناريادتارى قويىلعان.
جامبىل وبلىسى اكىمدىگى تۇرعىنداردى تەك رەسمي اقپاراتتارعا سۇيەنۋگە, سابىر ساقتاۋعا شاقىردى. قالىپتاسقان جاعدايعا بايلانىستى وبلىس بويىنشا قاۋىرت جەلى نومىرلەرى ىسكە قوسىلدى: 8 7262 513575, 51 41 67.