قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن «جاسىل ەكونوميكاعا» كوشۋ جونىندەگى كەڭەستىڭ وتىرىسىندا جاڭارتىلاتىن ەنەرگيا سالاسىنداعى جاڭا جوبالاردى قولداۋ ماسەلەلەرى تالقىلاندى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
قر قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا اتاپ وتكەندەي, بۇگىنگى تاڭدا ەلىمىزدە «جاسىل» قارجىلاندىرۋدى دامىتۋ ماقساتىندا قاجەتتى زاڭنامالىق جانە نورماتيۆتىك-قۇقىقتىق بازا قۇرىلدى. جاڭا ەكولوگيالىق كودەكس قابىلدانىپ, «جاسىل» وبليگاتسيالار مەن ESG وبليگاتسيالارىن شىعارۋ مەن اينالىمعا ەنگىزۋ ءۇشىن وزگەرىستەر قابىلداندى. «استانا» حالىقارالىق قارجى ورتالىعى مەن KASE بيرجالارىندا ESG اقپاراتىن اشۋ ەرەجەلەرى بەكىتىلدى. بىرقاتار باسقا دا شارالار جۇزەگە اسىرىلدى.
جۇرگىزىلگەن جۇمىستىڭ ارقاسىندا ەلىمىزدە تۇراقتى قارجىلاندىرۋ كولەمىنىڭ وڭ سەرپىنى بايقالادى. بيىلعى 1 قاراشادا KASE-دە كورپوراتيۆتىك قارىز الۋ كولەمى 2021 جىلمەن سالىستىرعاندا 4 ەسەدەن استام ارتىپ, شامامەن 208 ملرد تەڭگەنى قۇرادى. بانك سەكتورىنداعى «جاسىل» نەسيەلەندىرۋ كولەمى 3,5 ەسەدەن استام ءوسىپ, 220 ملرد تەڭگەنى قۇراپ وتىر.
1 جەلتوقسانداعى جاعداي بويىنشا «بايتەرەك» حولدينگى تاراپىنان «جاسىل» جوبالاردى تىكەلەي قولداۋدىڭ جالپى كولەمى 177,5 ملرد تەڭگەنى قۇرادى. اتاپ ايتقاندا, قازاقستاننىڭ دامۋ بانكى جاڭارتىلاتىن ەنەرگيا كوزدەرى سالاسىنداعى قۇنى 118 ملرد تەڭگە بولاتىن ءىرى 7 ينۆەستيتسيالىق جوباعا قولداۋ كورسەتتى. «Qazaqstan Investment Corporation» اق 11,1 ملرد تەڭگەگە بىرقاتار جوبالارعا (كۇن جانە سۋ ەلەكتر ستانسالارى قۇرىلىسى) قولداۋ كورسەتتى. تاعى ءبىر ەنشىلەس ۇيىم «دامۋ» قورى 7,4 ملرد تەڭگەنىڭ 91 «جاسىل» جوباسىن قولدادى.
سونىمەن قاتار 2018 جىلدان بەرى «ونەركاسىپتى دامىتۋ قورى» اق وتاندىق اۆتووندىرۋشىلەردى قولداۋ شەڭبەرىندە اۆتوبۋس پاركىن جاڭارتۋ بويىنشا ليزينگتىك قارجىلاندىرۋدى جۇزەگە اسىرادى. اتاپ ايتقاندا, قازىردىڭ وزىندە استانادا ەلەكترمەن جۇرەتىن 120 قالالىق اۆتوبۋس جانە پاۆلوداردا 10 اۆتوبۋس ساتىپ الۋ قارجىلاندىرىلدى. توزىعى جەتكەن كولىكتەردى ەكولوگيالىق تازا كولىك تۇرلەرىنە اۋىستىرۋ كەزەڭ-كەزەڭىمەن جالعاساتىن بولادى.
سونداي-اق «اگرارلىق نەسيە كورپوراتسياسى» اق جەلىسى ارقىلى ءبىرىنشى جارتىجىلدىقتا سۋارۋ جۇيەلەرىن جانە ءونىمدى باۋ-باقشالار قۇرۋ سياقتى سالالارعا باعىتتالعان جالپى قۇنى 2 ملرد تەڭگەدەن اساتىن 15 «جاسىل» جوباعا قولداۋ كورسەتىلدى.
پرەمەر-مينيستر ەكونوميكانىڭ اۋقىمدى ترانسفورماتسياسى «جاسىل» ينۆەستيتسيالار كولەمىن ارتتىرۋدى تالاپ ەتەتىنىن اتاپ ءوتتى.
«2060 جىلعا دەيىن كومىرتەگى بەيتاراپتىعىنا قول جەتكىزۋ ءۇشىن $600 ملرد-تان استام كولەمىندە قارجى قاجەت, سوندىقتان «جاسىل» تەحنولوگيالارعا ينۆەستيتسيا تارتۋ بويىنشا جۇمىستى كۇشەيتۋ كەرەك», دەدى ءاليحان سمايىلوۆ.
وسىعان وراي پرەمەر-مينيستر «جاسىل» جوبالاردى ىسكە اسىرۋ بارىسىندا كەزدەسەتىن كەدەرگىلەرگە تالداۋ جۇرگىزۋدى, «جاسىل» قارجىلاندىرۋ تۋرالى اقپاراتتى مىندەتتى تۇردە جاريا ەتۋ جونىندەگى تالاپتاردى ىسكە اسىرۋدى جەدەلدەتۋدى, سونداي-اق «جاسىل ەكونوميكاعا» كوشۋ جونىندەگى تۇجىرىمدامانىڭ ءىس-قيمىل جوسپارىندا ءتيىستى ينديكاتورلار مەن ءىس-شارالاردى قاراستىرۋدى تاپسىردى.