بۇگىن فۋتزالدان قازاقستان – نيدەرلاند قۇرامالارى اراسىندا ماتچ وتەدى. ماتچ استانا ۋاقىتىمەن 20:20-دا باستالىپ, «Qazsport» تەلەارناسىنان تىكەلەي ەفيردە كورسەتىلەدى, دەپ حابارلايدى Egemen.kz.
الەم چەمپيوناتىنا ىرىكتەۋ كەزەڭىندە رۋمىنيا, ازەربايجان, نيدەرلاند قۇرامالارىمەن بىرگە ا توبىنا تۇسكەن قازاقستان قۇراماسى 12 ۇپايمەن ءبىرىنشى ورىندا كەلەدى, بۇعان دەيىن ءتورت ويىندا دا جەڭىسكە جەتتى. ناقتى اتاعاندا ازەربايجاندى ەكى رەت (4:2, 3:2), نيدەرلاندىنى (2:0), رۋمىنيانى (4:3) كورسەتكىشتەرىمەن ۇتتى.
ەلوردادا ج.ۇشكەمپىروۆ اتىنداعى جەكپە-جەك سارايىندا بۇگىن نيدەرلاندىمەن كەزدەسەتىن ەلىمىزدىڭ قۇراماسى 20 جەلتوقساندا بۋحارەست قالاسىندا رۋمىنيا قۇراماسىنا قارسى ويىن وتكىزەدى.
وسى ماتچتاردىڭ بىرىندە قازاقستان قۇراماسى جەڭىسكە جەتەتىن بولسا, 2024 جىلى 14 قىركۇيەك پەن 6 قازان ارالىعىندا تاشكەنتتە (وزبەكستان) وتەتىن الەم چەمپيوناتىنىڭ فينالدىق كەزەڭىنە ءبىرىنشى ورىنمەن تىكەلەي جولداما الادى.