تۇركىستان وبلىسىندا جيھاز جاسايمىن دەپ الەۋمەتتىك جەلىدە 4 جالعان پاراقشا اشىپ, تۇرعىنداردى الداعان ستۋدەنت ۇستالدى, – دەپ حابارلايدىEgemen.kz.
ماقتاارال اۋداندىق پوليتسيا بولىمىنە جەرگىلىكتى تۇرعىن كومەك سۇراپ, ارىزداندى.
ەر ادامنىڭ ايتۋىنشا, بەلگىسىز بىرەۋ Instagram الەۋمەتتىك جەلىسىندە ءۇي جيھازىن جاساپ بەرەتىنىن ايتىپ, اقشاسىن يەمدەنگەن. كەلىپ تۇسكەن شاعىمعا بايلانىستى جەدەل-ىزدەستىرۋ شارالارىنا Cyberpol” توبىنىڭ تاجىريبەلى پوليتسيا قىزمەتكەرلەرى جۇمىلدىرىلدى. جۇرگىزىلگەن ءىس-شارالاردىڭ ناتيجەسىندە اتىراۋ قالاسىنىڭ 20 جاسار تۇرعىنى انىقتالدى.
ءارى قاراي تەكسەرۋلەر بارىسىندا جىگىتتىڭ ستۋدەنت ەكەنى جانە ول الەۋمەتتىك جەلىدە 4 بىردەي جالعان پاراقشا اشىپ, تۇرعىنداردى الداعانى بەلگىلى بولدى. ماقتاارالدىق تەرگەۋشىلەر ستۋدەنت جىگىتتىڭ 10 ادامدى الداپ, 4 ميلليون تەڭگە شىعىن كەلتىرگەنىن ناقتىلادى.
ياعني, جاس جىگىت instagram-دا ءۇي جيھازدارىن ارزان باعادا جاسايتىنىن ايتىپ, جالعان جارنامالار جاساپ, وبلىستىڭ تۇرعىندارىن الداعان. سەنىم بىلدىرگەن ازاماتتار جاس جىگىتتىڭ پاراقشاسىنداعى جيھازداردىڭ سۋرەتى ارقىلى تاپسىرىس بەرىپ, اقشانى الدىن الا ونلاين اۋدارعان.
بۇگىندە قر قك-ءنىڭ 190-بابى 2-بولىگى (الاياقتىق) بويىنشا سوتقا دەيىنگى تەرگەۋ جۇرگىزىلىپ جاتىر. كۇدىكتى جىگىتتىڭ باسقا دا قىلمىستارعا قاتىسى بار-جوعى تەكسەرىلىپ, وقيعانىڭ تولىق ءمان-جايى انىقتالىپ جاتىر.