بەلگىلى ەسترادا ءانشىسى, كومپوزيتور ءالي وقاپوۆ اناسى, حالىق ءارتىسى روزا رىمباەۆا تۋرالى فيلم تۇسىرە باستاعانىن مالىمدەدى, دەپ حابارلايدى Egemen.kz.
كينو كارتينادا ونەر يەسىنىڭ ءومىر جولىندا ەكى رەت قاستاندىق قۇربانى بولا جازداعانى دا قامتىلادى.
“رەۆيۋ” باعدارلاماسىنا قوناق بولعان ءالي تاستان ۇلى فيلم ءتۇسىرۋدى وسىدان ءۇش جىل بۇرىن قولعا العانىن اتاپ وتكەن. الايدا, ونىڭ شىعارماشىلىعىنا كەدەرگىلەر كوپ كەزدەسىپ جاتقان كورىنەدى.
ء«ۇش جىل قاتارىنان وتپەي قالىپ جاتىرمىز. ويتكەنى, ەكسپەرتتىك كوميسسيا مۇشەلەرى بار جانە ولاردىڭ سۋبەكتيۆ كوزقاراسى بويىنشا شەشىم قابىلدانادى. سول شەشىمگە بايلانىستى قولداۋ كورسەتىلەدى. جىلدان-جىلعا شارشاماي, سول "روزا" اتتى پاپكامدى كوتەرىپ, كەيبىر ادامنىڭ كوزىنە كۇيىك بولسام دا, جىل سايىن ۇسىنامىن», دەدى ول.
سونداي-اق حالىق ءارتىسىنىڭ كەيبىر ارىپتەستەرى دە ءفيلمدى جارىققا شىعارۋعا قارسى بولىپ جاتىر.
“مەنىمەن كەلىسپەيتىن ادام كوپ. وسى كينوعا قارسى شىققان جاندار دا بار. ەڭ قىزىعى, انامنىڭ ساحنالاس ارىپتەستەرى مەن ونەر مايتالماندارى دا بار. ولاردىڭ ءوز جوسپارى بار شىعار, ءبىز سول جوسپارعا ساي كەلمەيتىن شىعارمىز دەپ ويلايمىن. بىراق مەن جەڭىلمەيمىن, توقتامايمىن", دەيدى ءالي وقاپوۆ.
سونىمەن قاتار ءانشى اناسىنا جاسالعان قاستاندىقتىڭ ارتىندا كىم تۇرعانىن ءالى كۇنگە دەيىن بىلە الماي كەلەدى. ايتۋىنشا, ونەر جۇلدىزى ەكى رەت ءولىم اۋزىنان قالعان.
«ەكى رەت انامىز ءولىپ قالا جازداعان. ونى كوبى بىلمەيدى. كەڭەس ۇكىمەتىنىڭ ىدىراۋى, 90-جىلدار بار, سودان كەيىن مەنىڭ دۇنيەگە كەلگەنىم بار, ءماديدىڭ دۇنيەگە كەلگەنى بار, اكەمىزدىڭ قايتىس بولعانى بار, ءتۇرلى-ءتۇرلى باسەكەلەستەرىنىڭ جاعىمسىز قادامى انىق كورسەتىلەدى. ءار كورىنىس انامنىڭ ومىرىنەن الىنعان», دەيدى ءانشى.