سولتۇستىك قازاقستان وبلىسىنىڭ ۆوسكرەسەنوۆكا اۋىلىندا اكىمدىكتىڭ عيماراتىن جالىن شارپىدى, دەپ حابارلايدى Egemen.kz.
توتەنشە جاعدايلار دەپارتامەنتىنىڭ مالىمەتىنشە, سولتۇستىك قازاقستان وبلىسىندا وتكەن تۇندە ەكى اۋىلدا ءىرى ءورت بولدى. اۋىلدىق اكىمدىك عيماراتى مەن تۇرعىن ءۇي ورتەنىپ كەتتى. تۇنگى ساعات ءبىر شاماسىندا مامليۋت قالالىق ءورت ءسوندىرۋ ءبولىمىنىڭ ورتالىق پۋلتىنە ۆوسكرەسەنوۆكا اۋىلىندا اكىمدىك عيماراتىنىڭ پەش جاعاتىن بولمەسىنەن ءورت شىققانى تۋرالى حابارلاما كەلىپ تۇسكەن.
«پەش جاعاتىن بولمەدەن شىققان ءورت اكىمدىك عيماراتىنا تارادى. ءورت ءسوندىرىلدى, قازىر ونىڭ سەبەبىن انىقتاۋ بويىنشا تەرگەۋ جۇرگىزىلىپ جاتىر. بولجام بويىنشا, پەشتەردى پايدالانۋ كەزىندە ءورت قاۋىپسىزدىگى ەرەجەلەرىن بۇزۋ سەبەپ بولعان», - دەدى وبلىستىق تجد باسشىسىنىڭ ورىنباسارى دميتري راستيحين.
1950-60 جىلدارى سالىنعان اكىمدىك عيماراتى تولىعىمەن اعاشتان سالىنعاندىقتان, بىردەن جانىپ كەتكەن. ءورت سوندىرۋشىلەر قۇرال-جابدىقتاردى ەۆاكۋاتسيالاپ, كومپيۋتەرلەردى, كەڭسە تەحنيكالارىن, قۇجاتتاردى سىرتقا الىپ شىقتى. عيماراتتا اكىمدىكتەن بولەك پوشتا بولىمشەسى بولعان. شامامەن 80 شارشى مەتر اۋماق ورتەنگەن.
سونىمەن قاتار سول ءتۇنى شال اقىن اۋدانى, سەميپولكا اۋىلىندا دا ءورت بولدى. ءورت سوندىرۋشىلەر كەلگەن كەزدە ىشتەن كىلتپەن جابىلعان ءۇيدى تولىعىمەن ءورت شارپىعان. كورشىلەردىڭ ايتۋىنشا, ۇيدە ەر ادام مەن ايەل بولعان.
«ساعات 9:30-دا ءورت ءسوندىرىلدى, وقيعا ورنىندا تەكسەرۋ جۇمىستارى جۇرگىزىلۋدە. قازىر ءبىر ادامنىڭ سۇيەگى تابىلدى, ىزدەۋ جۇمىستارى جالعاسىپ جاتىر», - دەدى تجد وكلى.