شارۋادان بيداي ساتىپ الۋعا قارجى ءبولىندى

قۇجات مەملەكەت باسشىسىنىڭ بيىل قولايسىز اۋا رايىنان زارداپ شەككەن اۋىل شارۋاشىلىعى تاۋار وندىرۋشىلەرىن قولداۋ بويىنشا جەدەل شارالاردى قامتاماسىز ەتۋ جونىندەگى تاپسىرماسىن ورىنداۋ شەڭبەرىندە قابىلداندى.

اتاپ ايتقاندا, قاراجات ازىق-ت ۇلىك كورپو­راتسياسىنىڭ وتاندىق اگراريلەردەن 350 مىڭ توننا 4 جانە 5-كلاستى جانە كلاسسىز بيدايدى تىكەلەي ساتىپ الۋ ءۇشىن ءبولىنىپ وتىر. قاراجات كولەمى 31 ملرد 375 ملن تەڭگەنى قۇرايدى. 

بۇگىندە ءداندى داقىلداردى جيناۋ جۇمىستارى اياقتالىپ, 16,9 ملن گا القاپتان ءداندى جانە بۇرشاق داقىلدارى جينالدى. 9,8 تس/گا ورتاشا ونىمدىلىكتە 16,6 ملن توننا بيداي, ونىڭ ىشىندە ورتاشا ونىمدىلىگى 8,6 تس/گا 11,5 ملن تونناعا جۋىق استىق باستىرىلدى.

سونىمەن قاتار ەگىن وراعى كەزىندە ۇزدىكسىز جاۋعان جاۋىن-شاشىن جۇمىستىڭ قارقىنى مەن ءونىم ساپاسىنا اسەر ەتىپ, شارۋالار قيىن جاعدايعا تاپ بولدى.  ورىن العان جاعداي اۋىل تۇرعىندارىنىڭ جينالعان ءونىمدى  وتكىزۋىنە, سايكەسىنشە, كەلىسىمشارتتار بويىنشا مىندەت­تەمەلەرىن ورىنداۋعا كەرى اسەرىن تيگىزدى.

قازىرگى ۋاقىتتا وتكەن جىلدان قالعان كولەم مەن ىشكى تۇتىنۋدى ەسكەرە وتىرىپ, جينالعان ءونىم وتاندىق نارىقتى قامتاماسىز ەتۋگە جانە بەلگىلى ءبىر كولەمدە ەكسپورتقا, ونىڭ ىشىندە ۇن تۇرىندە جونەلتۋگە جەتكىلىكتى.

ەسكە سالايىق, جالپى 2023 جىلى ۇكىمەت اوك-ءتى سۋب­سي­ديالاۋعا بارلىق كوزدەن 494 ملرد تەڭگە, ونىڭ ىشىندە ۇكىمەت رەزەرۆىنەن وسىمدىك جانە مال شارۋا­شىلىعىن سۋبسيديالاۋعا قوسىمشا 60 ملرد تەڭگە ءبولدى.

سونداي-اق «اۋىل اماناتى» باعدارلاماسىن جۇزەگە اسىرۋعا رەسپۋبليكالىق بيۋدجەتتەن 100 ملرد تەڭگە باعىتتالدى.