پرەمەر-مينيستر ءاليحان سمايىلوۆ ورتالىق مەملەكەتتىك ورگاندار باسشىلارى جانە ديپلوماتيالىق كورپۋس پەن جەكە بيزنەس وكىلدەرىنىڭ قاتىسۋىمەن ينۆەستيتسيالىق احۋالدى جاقسارتۋ جونىندەگى كەڭەستىڭ كەزەكتى وتىرىسىن وتكىزدى.
كەڭەستە نەگىزىنەن سالىق ساياساتى سالاسىندا جۇرگىزىلىپ جاتقان رەفورمالار, ينۆەستيتسيالىق ىنتىماقتاستىق, زياتكەرلىك مەنشىك قۇقىقتارىن قورعاۋ, اۋىل شارۋاشىلىعى تاۋارىن وندىرۋشىلەردى سۋبسيديالاۋ, ت.ب. ماسەلەلەرگە نازار اۋدارىلدى.
ءا.سمايىلوۆ ينۆەستيتسيالار تارتۋ ەكونوميكالىق ءوسۋدىڭ نەگىزگى فاكتورلارىنىڭ جانە ۇكىمەت جۇمىسىنىڭ باسىمدىقتارىنىڭ ءبىرى بولىپ قالا بەرەتىنىن اتاپ ءوتتى. اتاپ ايتقاندا, ەلىمىزدە جەكە شارتتاردا كەلىسىمدەر جاساۋعا مۇمكىندىك بەرەتىن ينۆەستيتسيالىق شارتتاردىڭ جاڭا تەتىكتەرى ەنگىزىلدى. بۇعان قوسا ينۆەستيتسيالىق مىندەتتەمەلەر تۋرالى كەلىسىمدى جاساسقاندا سالىق زاڭناماسىنىڭ تۇراقتىلىعىنا 10 جىلعا كەپىلدىك بەرىلەدى جانە كۇردەلى جوبالار ءۇشىن جەتىلدىرىلگەن مودەلدىك كەلىسىمشارتتى جاساسقاندا فيسكالدىق ىنتالاندىرۋلار ەنگىزىلەدى.
«رەزيدەنت ەمەس تۇلعالاردان الىنعان ماتەريالدىق ەمەس قىزمەتتەر ءۇشىن شەگەرىم سوماسىن شەكتەۋگە قاتىستى ينۆەستورلار ءجيى كوتەرەتىن ماسەلە شەشىلدى. ەندى بۇل شەكتەۋ تەك وففشورلىق يۋريسديكتسيالارداعى كومپانيالارمەن جۇرگىزىلگەن وپەراتسيالارعا قاتىستى بولادى», دەدى پرەمەر-مينيستر.
ۇكىمەت باسشىسى ينۆەستيتسيالىق تارتىمدىلىقتى ارتتىرۋدىڭ ماڭىزدى اسپەكتىلەرىنىڭ ءبىرى بولجامدى جانە اشىق سالىق ساياساتى ەكەنىن اتاپ ءوتتى. وسىعان بايلانىستى قازاقستاندا فيسكالدىق رەتتەۋدى جەتىلدىرۋ ءۇشىن جاڭا سالىق كودەكسى ازىرلەندى. قازىرگى ۋاقىتتا بۇل بيزنەس-قوعامداستىق جانە حالىقارالىق ۇيىمدار وكىلدەرىمەن ءارتۇرلى الاڭدا قىزۋ تالقىلانىپ جاتىر. جىل باسىنان بەرى 250-دەن اسا جۇمىس كەزدەسۋى وتكىزىلىپ, مىڭنان اسا ۇسىنىس تۇسكەن. بارلىق ماسەلە اپتا سايىن تۇراقتى جۇمىس توبىنىڭ قاراۋىنا ۇسىنىلادى.
«قولدانىستاعى ىنتالاندىرۋلاردى ساقتاي وتىرىپ, جاڭا سالىق كودەكسى شەڭبەرىندە سالىق تولەۋشىگە باعىتتالعان سەرۆيستىك اكىمشىلەندىرۋ مودەلى ەنگىزىلەدى. سالىق ەسەپتىلىگى – 30 پايىزعا, ال سالىق تولەمدەرىنىڭ سانى 20 پايىزعا قىسقارادى», دەدى ءا.سمايىلوۆ.
بۇل بولشەك سالىق رەجىمىن قولدانۋ بويىنشا قىزمەت تۇرلەرى ەكى ەسەگە كەڭەيتىلىپ, 1 ملن-نان اسا سالىق تولەۋشىنى قامتيتىنىن ايتتى. بۇعان قوسا وڭدەۋ ونەركاسىبىندەگى جاڭا جوبالار 3 جىلعا سالىقتان بوساتىلادى. سونداي-اق قابىلدانعان شارالار ناتيجەسىندە قازاقستان IMD الەمدىك باسەكەگە قابىلەتتىلىك رەيتينگىندە ءبىر جىل ىشىندە 6 ساتىعا كوتەرىلىپ, 37-ورىنعا تابان تىرەگەنى اتاپ ءوتىلدى. تالقىلاۋ قورىتىندىسى بويىنشا ۇكىمەت باسشىسى قۇزىرلى مەملەكەتتىك ورگاندارعا ايتىلعان بارلىق ۇسىنىستى پىسىقتاۋدى تاپسىردى.