ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ءراتباي مىرزاقۇلوۆ ەكىنشى جىل قاتارىنان الەمدەگى بەدەلدى عالىمداردىڭ رەيتينگىنە ەندى. بەلگىلى تەوريالىق فيزيك ستەنفورد ۋنيۆەرسيتەتىنىڭ ەكى رەيتينگىندە دە Scopus دەرەكقورىندا جاريالانىم بەلسەندىلىگى مەن دايەكسوز كورسەتكىشتەرى بويىنشا ۇسىنىلعان.
بيىلعى قازان ايىندا جاريالانعان رەيتينگتە الەمنىڭ ۇزدىك 100 مىڭ عالىمىنىڭ جەتىستىكتەرى 22 عىلىمي سالا جانە 174 كىشى سالا بويىنشا تالدانعان. مۇندا پايىزدىق كورسەتكىشتەر بەلگىلى ءبىر تاقىرىپ نەگىزىندە كەم دەگەندە 5 جۇمىس جاريالاعان بارلىق عالىم ءۇشىن قاراستىرىلادى. دەرەكتەر بازاسى دايەكسوزدەردى, جاريالانىمدار مەن سىلتەمەلەردى كورسەتەتىن h-يندەكسىن, بىرلەسكەن اۆتورلىقپەن جازىلعان جاريالانىمداردى ەسەپكە الاتىن hm-يندەكسىن, سونداي-اق قۇراما كورسەتكىشتى (c-بالل) قامتيتىن 200 مىڭعا جۋىق عالىمنىڭ قىزمەتى تۋرالى اقپارات بەرەدى. ەسەپتەۋلەر ءار جىلدىڭ سوڭىندا Scopus جۇيەسىندەگى بارلىق اۆتورلىق پروفيلگە نەگىزدەلەدى. ۇمىتكەرلەر Scopus دەرەكقورىنداعى جاريالانىمنىڭ جوعارى بەلسەندىلىگى مەن اۆتورلاردىڭ دايەكسوزدەرى نەگىزىندە تاڭدالدى. جىل سايىنعى رەيتينگتى ستەنفورد ۋنيۆەرسيتەتىنىڭ ساراپشىلارى Elsevier عىلىمي باسپاسىنىڭ سوڭعى مالىمەتتەرى بويىنشا جۇيەلى بيبليومەتريالىق زەرتتەۋلەر نەگىزىندە جاسايدى.
عالىم ءراتباي مىرزاقۇلوۆ ەكىنشى جىل قاتارىنان ەكى رەيتينگتەن دە ورىن الدى. ونىڭ بىرىنشىسىنە كەيىنگى ءبىر جىلدا ەڭ كوپ سىلتەمە جاسالعان عالىم رەتىندە ەنسە, ەكىنشىسىندە بۇكىل ەڭبەك جولىندا الەمدەگى ەڭ كوپ سىلتەمە جاسالعان عالىمدار قاتارىندا كورسەتىلگەن. «مەن ءۇشىن بۇل جەتىستىكتىڭ ماڭىزى زور. ويتكەنى ءبىزدىڭ عىلىمدى الەم جۇرتشىلىعى مويىنداپ جاتىر. ۋنيۆەرسيتەتىمىزدىڭ, ەلىمىزدىڭ وسىنداي دەڭگەيگە جەتكەنىنە قۋانىشتىمىن. مۇنداي ناتيجەگە ەڭبەك ارقىلى قول جەتكىزۋگە بولادى», دەيدى ول.
ايتا كەتەيىك, اكادەميك ر.مىرزاقۇلوۆ 400-دەن استام عىلىمي ەڭبەكتىڭ اۆتورى, 300-دەن استام ماقالاسى يمپاكت-فاكتورى جوعارى شەتەلدىك جۋرنالداردا جاريالانعان. قازىرگى ۋاقىتتا پروفەسسوردىڭ Scopus بويىنشا حيرش يندەكسى 48-گە تەڭ, ال سىلتەمە يندەكسى 8189-عا جەتتى. 2022 جىلى پروفەسسور عىلىمي جەتىستىكتەرى ءۇشىن فيزيكا جانە استرونوميا بويىنشا حالىقارالىق Scopus سىيلىعىمەن ماراپاتتالدى. عالىم ءراتباي مىرزاقۇلوۆ ونىنشى جىل قاتارىنان ەلىمىزدىڭ پروفەسسور-وقىتۋشىلار قۇرامىنىڭ باس رەيتينگىندە دە كوش باستاپ كەلەدى.
ول – ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «تەوريالىق فيزيكانىڭ ەۋرازيالىق حالىقارالىق ورتالىعى» عىلىمي-زەرتتەۋ ينستيتۋتىنىڭ نەگىزىن قالاۋشى ءارى ديرەكتورى. سوليتوندار تەورياسى العاش رەت ەدينبۋرگتە پايدا بولسا, ونى قازاقستانعا تۇڭعىش الىپ كەلگەن وسى ءراتباي قاعاز ۇلى. بۇگىندە الەمدىك قاۋىمداستىقتى تولعاندىرعان «مىرزاقۇلوۆ تەڭدەۋلەرى» مەن «مىرزاقۇلوۆ گراۆيتاتسياسى» – اكادەميك ەڭبەگىنىڭ ناتيجەسى. سونىمەن قاتار شەتەلدىك فيزيكتەردىڭ «مىرزاقۇلوۆ گراۆيتاتسياسىن» زەرتتەگەن ماقالالارى كۆارتيل دەڭگەيى ەڭ جوعارى جۋرنالداردا جاريالانىپ ءجۇر. ءراتباي قاعاز ۇلى ءومىرىن عىلىمعا ارناعان جان. تەك, ءوزى عانا ەمەس, بالالارى دا عىلىم سالاسىندا تەر توگىپ ءجۇر.
بي-فاتيما ەرالحانقىزى,
ل.ن.گۋميلەۆ اتىنداعى ەۇۋ ستۋدەنتى