تۋا سالىپ اناسى تاستاپ كەتكەن سوڭ, شەتەلدىك وتباسى اسىراپ العان جانىبەك ەسىمدى قازاق بالاسى 21 جىلدان سوڭ اناسىن ىزدەپ كەلدى, دەپ حابارلايدى Egemen.kz.
بۇل تۋرالى جەلىدەگى پاراقشاسىنا بەلگىلى جۋرناليست ولجاس بەركىمباەۆ جازدى.
«مىنا ۆيدەودا اعىلشىنشا سويلەپ, سىزدەردەن كومەك سۇراپ وتىرعان جىگىتتىڭ ەسىمى – جانىبەك, بىراق قازىرگى قۇجاتىندا ەدديجان دەپ جازىلعان.
ۇلتى – قازاق, 2002 جىلدىڭ 17 قاڭتارى كۇنى ارقالىق قالاسىندا دۇنيەگە كەلگەن. 2004 جىلى سول قالاداعى بالالار ۇيىنەن قازىرگى بەلگيالىق وتباسى, ياعني جالعىز باستى اناسى اسىراپ الۋعا الىپ كەتكەن. تۋعان انامنىڭ ءۇشىنشى بالاسى بولۋىم مۇمكىن دەيدى ول. فلاماند تىلىندە وسكەن ول, قازاقشا نە ورىسشا بىلمەيدى. ەسەسىنە, اعىلشىن, يسپان, فرانتسۋز, نەمىس تىلدەرىندە سويلەيدى», - دەپ جازعان اۆتور.
جانىبەك قازىر يسپانيانىڭ مالوركا ارالىندا تۇرادى ەكەن. اسىراپ العان وتباسى وعان ەۋروپاشا ءبىلىم بەرىپ وسىرگەن. وسى كۇندەرى استانادا, ءوزىنىڭ تۋعان اكە-شەشەسىن ىزدەپ كەلىپتى.
«تۋعان اكە-شەشەمنەن تۇك كەرەك ەمەس, تەك انامنىڭ ءجۇزىن كورىپ, ءبىر رەت قۇشاقتاپ, جۇرەگىمدى تىنشىتسام بولدى دەگەن جانىبەك مىنا ۆيدەونى بۇگىن نەشە رەت تۇسىرگەنىن بىلسەڭىز عوي... ءالى تولقىپ ءجۇرمىن, انا تۋرالى ويلاسام, ەموتسيامدى باسقارا الماي قالامىن دەيدى.20 جەلتوقسان استانادان يسپانياعا ۇشىپ كەتەتىن جانىبەك, بارشاڭىزدان كومەك كۇتىپ وتىر. قازاقستان تىم الىس, ەندى قاشان كەلەرىم بەلگىسىز, مۇندا ءتۇرىم قازاق, ءتىلىم وزگەشە ءبارى ءبىرتۇرلى قارايدى دەيدى», دەلىنگەن جەلىدەگى جازبادا.
بەلگىلى بولعانداي, مالوركادا ول اتبەگىلىكپەن اينالىسادى. جىلقىنى جاقسى كورەدى.