جاقىندا تالدىقورعانداعى نازارباەۆ زياتكەرلىك مەكتەبىنىڭ وقۋشىلارى وڭتۇستىك كورەيانىڭ جەتەكشى وقۋ ورىندارىن ارنايى ارالاپ قايتتى. ساپار كورەيا رەسپۋبليكاسى تۋريزم, مادەنيەت جانە سپورت مينيسترلىگى جانە كورەيا ەلشىلىگىنە قاراستى ءبىلىم بەرۋ ورتالىعىنىڭ قولداۋىمەن ۇيىمداستىرىلدى.
مەكتەپ وقۋشىلارى بەس ۋنيۆەرسيتەتتى, زەرتحانالاردى, ستۋدەنتتىك ۇيلەردى ارالاپ, قابىلداۋ كوميسسيالارىمەن, ەلدەگى شەتەلدىك ستۋدەنتتەردىڭ تىنىس-تىرشىلىگىمەن تانىستى. سونداي-اق جاس عالىمدار مەن بولاشاق كوشباسشىلار دايارلاۋداعى ءتالىم-تاجىريبەسىمەن تانىستى. بۇل وڭىردەگى جاستاردىڭ الەمگە قاراپ بەت تۇزەۋىنە ۇلكەن مۇمكىندىك بەرمەك.
شىنىندا ءاربىر جوعارى وقۋ ورنىنىڭ ءوز ەرەكشەلىگى بار. مىسالى, كوريو ۋنيۆەرسيتەتى – ەلدەگى ەڭ كونە وقۋ ورىندارىنىڭ ءبىرى. اتاقتى تۇلەكتەردىڭ قاتارىندا ەل پرەزيدەنتتەرى دە بار. ءبىلىم ورداسىندا 59 اكادەميالىق فاكۋلتەت پەن باعدارلاما جۇمىس ىستەيدى. ونىڭ ارقايسىسى – ءبىر-ءبىر مەكتەپ.
12-سىنىپ وقۋشىسى اسقار قاليعا كورەيانىڭ عىلىم جانە تەحنولوگيا ينستيتۋتى (KAIST) ۇنادى. ءبىلىم شاڭىراعى الەمدەگى ەڭ بەدەلدى جانە يننوۆاتسيالىق ۋنيۆەرسيتەتتەردىڭ ءبىرى رەتىندە تانىمال. مۇندا وقىعان ءبىلىمپازدار كەز كەلگەن مەملەكەتتە ەركىن قىزمەت ەتە الادى. ءتىپتى ازيا ۋنيۆەرسيتەتتەرى اراسىندا 8-ورىندا تۇر. «ۋنيۆەرسيتەتتە قالاعان ماماندىقتى تاڭداۋعا بولادى. وقۋ اعىلشىن تىلىندە وتەدى. بۇل ءبىزدىڭ جۇيەگە ساي, سوندىقتان ەشقانداي قورقىنىش جوق. ۋنيۆەرسيتەت تاماشا ستيپەنديالىق جۇيەنى ۇسىنادى. سونداي-اق وقۋدى بىتىرگەننەن كەيىن Google, LG, Samsung, Audi سياقتى ءىرى كومپانيالاردا جۇمىس ىستەۋگە مۇمكىندىك بار», دەيدى اسقار قالي.
Yonsei ۋنيۆەرسيتەتى بولسا كورەيانىڭ «پليۋشش ليگاسىنىڭ» اتاعىن لايىقتى تۇردە يەلەنىپ كەلەدى. بۇل وقۋ ورنى 10-سىنىپ وقۋشىسى ايىم باۋىرجانقىزىنا ەرەكشە اسەر قالدىردى. Yonsei – سەۋل ۇلتتىق ۋنيۆەرسيتەتىمەن جانە كوريو ۋنيۆەرسيتەتىمەن بىرگە ەلدەگى ەڭ بەدەلدى ءۇش (SKY) جوعارى وقۋ ورنىنىڭ ءبىرى. ءۇش ۋنيۆەرسيتەتتىڭ كەز كەلگەنىنە ءتۇسۋ – تابىستى بولاشاقتىڭ كەپىلى. جاس مامان مانساپ پەن جوعارى الەۋمەتتىك مارتەبە الۋ ءۇشىن سول وقۋ ورىندارىن ءجيى تاڭدايدى. «گۋمانيتارلىق باعدارلامالارى بىردەن ەلىتىپ اكەتەدى. ءسىز ءبىرىنشى وقۋ جىلىنىڭ سوڭىنا قاراي ءوز ماماندىعىڭىزدى تاڭداي الاسىز. بيىلدان باستاپ Yonsei ۋنيۆەرسيتەتى NIS تۇلەكتەرىنەن ۇسىنىس حات تالاپ ەتپەيدى. بۇل ءبىز ءۇشىن تاعى ءبىر تاماشا مۇمكىندىك. بولاشاقتا وسىندا وقىعىم كەلەدى», دەيدى ايىم.
ساپار بارىسىندا مازمۇندى باعدارلاما ۇيىمداستىرىلدى. جاس ساياحاتشىلار تاريحي ءرولى جوعارى «كيونبوكگۋن» سارايىن, «سامسۋنگ» مۇراجايىن, ايگىلى «نانت» اسپازدىق شوۋىن تاماشالاپ, Lotte World Adventure ويىن-ساۋىق ساياباعىن ارالادى. كورەيانىڭ مادەني مۇراسىنا قانىعىپ, ءوز ەلىنىڭ سالت-داستۇرىمەن سالىستىردى.
تالدىقورعانداعى زياتكەرلىك مەكتەپ پەن كورەيا اراسىنداعى ءبىلىم سالاسىنداعى ىنتىماقتاستىق تۋرالى مەموراندۋم 2020 جىلى جاسالعان. سودان بەرى جىل سايىن وقۋشىلار ساياحات جاساپ, ارماندارىنا قول سوزىپ كەلەدى. ەڭ باستىسى, زاماناۋي ءبىلىم مەن عىلىم سالاسىنداعى ەرەكشەلىكتەردى ءوزارا ورتاعا سالىپ, جاستاردىڭ ساناسىنا ساۋلە ءتۇسىرۋ ۇستىندە. تالدىقورعاندىق وقۋشىلار 2011 جىلدان باستاپ كورەي ءتىلىن ۇيرەنىپ ءجۇر. 2018-2019 وقۋ جىلىندا 10-سىنىپتارعا كورەي ءتىلىن ەكىنشى شەت ءتىلى رەتىندە وقىتۋ مىندەتتى بولىپ سانالادى. ءسويتىپ, ءداستۇرلى تۇردە وقۋ جوسپارىنا ەنگىزىلدى. ەندى كورەياعا قوناققا بارعان ءاربىر شاكىرت جەرگىلىكتى تۇرعىندارمەن ەركىن تىلدەسە الادى. 2012-2015 جىلدارى مەكتەپتە «قازاقستان-كورەيا» ءبىلىم الماسۋ جوباسى جۇرگىزىلدى. وقۋشىلار سەۋل قالاسىنداعى تانجە مەكتەبىندە وقىپ, تاجىريبە جينادى.
جەتىسۋ وبلىسى