پرەمەر-ءمينيستردىڭ ورىنباسارى تامارا دۇيسەنوۆا كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى تە-يك چجومەن كەزدەستى. تاراپتار ەكى ەل اراسىنداعى ەڭبەك ەتۋ ماقساتىنداعى كوشى-قون ماسەلەلەرىن تالقىلادى.
كەزدەسۋ بارىسىندا ۆيتسە-پرەمەر قازاقستان ەڭبەك ميگرانتتارىن قابىلداۋشى تاراپ ەكەنىن اتاپ ءوتتى. قازىر مەملەكەتىمىزدە 14 ەلدىڭ ازاماتتارى جۇمىس ىستەپ جاتىر. ەلىمىزدە ارنايى رۇقسات قاعازى ارقىلى ەڭبەك ەتۋگە بىلىكتى كادرلار تارتىلۋدا. رەسپۋبليكادا ولاردىڭ قىزمەتىن رەتتەيتىن ءتيىستى زاڭ قابىلداندى.
«سونداي-اق ءبىزدىڭ وتانداستارىمىز دا الىس-جاقىن شەتەلدە جۇمىس ىستەپ ءجۇر. قازىردە قازاقستاندىقتار ەڭبەك ەتىپ جاتقان بىرقاتار مەملەكەتپەن, ونىڭ ىشىندە كورەيا رەسپۋبليكاسىمەن كەلىسسوزدەر جۇرگىزىپ جاتىرمىز. ءبىز شەتەلدە جۇمىس ىستەپ جۇرگەن ازاماتتارىمىزدى قورعاۋعا مۇددەلىمىز», – دەدى تامارا دۇيسەنوۆا.
ءوز كەزەگىندە تە-يك چجو الەمنىڭ 16 ەلىندە وڭتۇستىك كورەيادا جۇمىسقا ورنالاسۋعا رۇقسات بەرۋ جۇيەسى (EPS) بويىنشا وقىتۋ ورتالىقتارى جۇمىس ىستەيتىنىن اتاپ ءوتتى. ونداعى ماماندار ءتىل, سالالىق داعدىلار, زاڭنامانى ۇيرەتەدى.
سونىمەن قاتار ۆيتسە-پرەمەر بىلىكتىلىگى جوعارى مامانداردى دايارلاۋدا تاجىريبە الماسۋ مۇمكىندىگىن قاراستىرۋدى ۇسىندى.