استانادا جاقسىلىق ۇشكەمپىروۆ اتىنداعى جەكپە-جەك سارايىندا تاەكۆوندودان VI جازعى سپارتاكيادا ءوتتى. ءتورت جىلدا ءبىر رەت ۇيىمداستىرىلاتىن ايتۋلى دودا ءۇش كۇنگە ۇلاسىپ, 179 سپورتشى ء وز الەۋەتىن سىنادى, دەپ حابارلايدى Egemen.kz.
سپارتاكيادا سايىسىنا جازعى ازيا ويىندارىنىڭ قولا جۇلدەگەرى سمايىل دۇيسەباي, ريو, توكيو وليمپيادالارىنىڭ قاتىسۋشىسى رۋسلان جاپاروۆ, جازعى ۋنيۆەرسيادا ويىندارىنىڭ چەمپيونى ريتا باكيشەۆا سىندى ۇزدىكتەر دە قاتىسىپ كۇشىن باعامدادى. جەڭىمپازدار مەن جۇلدەگەرلەردى ماراپاتتاعان تۋريزم جانە سپورت ءمينيسترى ەرمەك مارجىقپاەۆ فينالدىق ايقاستىڭ تارتىستى وتكەنىن ايتتى.
«وڭىرلەردەن كەلگەن سپورت شەبەرلەرى ءوزارا كۇش سىناسىپ, جانكۇيەرلەرگە ءوز شەبەرلىگىن پاش ەتتى. جارىس بارىسىندا تورەشىلەر ءادىل جۇمىس ىستەگەنىن, ال ەل سپارتاكياداسى جوعارى دەڭگەيدە ۇيىمداستىرىلعانىن اتاپ وتكەن ءجون. سپورتشىلارىمىزدى جارقىن جەڭىستەرىمەن شىن جۇرەكتەن قۇتتىقتايمىن. ەندىگى كەزەكتە نامىستى قولدان بەرمەي, الەمدىك سايىستا ۇزدىكتەر قاتارىنان كورىنۋىنە تىلەكتەسپىن», دەدى مينيستر.