كۇن ءتارتىبى بەكىتىلدى

حاتتامادا بالا قۇقىقتارى تۋرالى كونۆەنتسيادا بەكىتىلگەن قۇقىقتار بۇزىلعان كەزدە بالالاردىڭ نەمەسە ولاردىڭ اتا-انالارىنىڭ (زاڭدى وكىلدەرىنىڭ) شاعىمدارىن قاراۋ تەتىكتەرى بەلگىلەنەدى. ونىڭ قورىتىندىسى بويىنشا ازىرلەنگەن ۇسىنىمدار مەملەكەتكە ءتيىستى شارالار قابىلداۋ ءۇشىن بەرىلەدى.

سونداي-اق سەناتورلار الداعى بەيسەنبىدە «2010 جىلعى 9 جەلتوق­سانداعى قازاقستان رەسپۋبليكا­سىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى قازاقستان رەس­پۋب­لي­كاسىنا مۇناي جانە مۇناي ونىم­دەرىن جەتكىزۋ سالاسىن­داعى ساۋ­دا-ەكونوميكالىق ىنتىماق­تاس­تىق تۋرالى كەلىسىمگە وزگەرىس ەنگىزۋ تۋ­رالى حاتتامانى راتيفيكاتسيالاۋ تۋ­رالى» زاڭدى قارايدى. بۇل زاڭ ءتيى­ستى سالادا ساۋدا-ەكونوميكالىق ىنتى­ماق­تاستىقتى دامىتۋعا ارنالعان.

بيۋرو وتىرىسىندا ازاماتتىق قورعا­نىس جۇيەسىن جەتىلدىرۋ ماسەلە­لەرى­نە ارنالعان پارلامەنتتىك تىڭداۋعا دايىندىق بارىسى دا تالقىلاندى. وسى ءىس-شارا اياسىندا حالىقارالىق قاتىناستار, قورعانىس جانە قاۋىپسىزدىك كوميتەتىنىڭ سەناتورلارى استانادا وتەتىن بيىك عيماراتتارداعى ورتتەردى ءسوندىرۋ جاتتىعۋلارىنا قاتىسادى.

سەنات توراعاسى ماۋلەن اشىم­باەۆ مەملەكەت تاراپىنان بۇل باعىت­تا ءتيىستى شارالار قابىلدانىپ جات­قانىن, سوعان قاراماستان ءالى دە بولسا شەشىمىن تاپپاعان ماڭىزدى ماسەلە­لەر بار ەكەنىن اتاپ ءوتتى.

«كەيىنگى جىلدارى مەملەكەت ازا­ماتتىق قورعانىس جۇيەسىن جەتىلدىرۋ ماسەلەسىنە باسىمدىق بەرىپ كەلەدى. سە­ناتتىڭ سالالىق كوميتەتى دە ايتار­لىقتاي جۇمىس اتقارىپ كەلەدى. دەگەن­مەن, ءالى دە شەشىمىن تاپپاي كەلە جات­قان ماسەلەلەر بار. وتكەن اپتادا الماتى قالاسىندا بولعان ءورت سالدارىنان 13 ادام قازا تاپتى. وسى رەتتە قازا تاپقانداردىڭ جاقىندارىنا قايعىلارىنا ورتاقتاسىپ, كوڭىل ايتامىز جانە زارداپ شەككەندەردىڭ تەزىرەك ساۋىعىپ كەتۋلەرىن تىلەيمىز. الداعى ۋاقىتتا وسىنداي قايعىلى وقيعالار قايتالانباسى ءۇشىن بۇل باعىتتا بەلسەندى جۇمىس ىستەۋىمىز كەرەك», دەدى ماۋلەن اشىمباەۆ.

سونداي-اق بيۋرو وتىرىسىندا پارلامەنت ماجىلىسىنەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.