«شەبەردىڭ ينەسى دە, سوققان كۇيمەسى دە التىن» دەگەن. قاي سالادا بولسىن ءوز ءىسىن جەتىك بىلەتىن ماماننىڭ ءجۇزى اشىق, ابىروي-بەدەلى بيىك بولادى. ماماندىققا ادالدىق تۋراسىندا وي قوزعاعاندا ادام جانىنىڭ اراشاسى بولا بىلگەن اق جەلەڭدىلەرگە ارتىلعان جۇكتىڭ جەڭىل ەمەس ەكەنىن اڭعارامىز. سەبەبى «مەديتسينا ماماندارىنا قاتەلەسۋگە بولمايدى» دەگەن قاعيدا بار. دارىگەر بولۋ دەگەننىڭ ءوزى «ادامعا جارىق سىيلاۋ» دەگەن تىركەسپەن ۇيلەسەتىن سەكىلدى. سالادا تۇيگەن-بىلگەنىم كوپ, بولدىم-تولدىم دەمەي, شىڭدالۋدان جالىقپايتىن دارىگەرلەردىڭ ءبىرى – دارحان سىبانباەۆ.
بالا جاستان دارىگەر بولۋدى ارمانداعان ول 1990 جىلى ەڭبەكشىقازاق اۋدانى سوگەتى اۋىلىنان ارمان قالا الماتىعا جول تارتادى. سول كەز الماتى مەملەكەتتىك مەديتسينا ينستيتۋتىندا قازاق توبى اشىلىپ, جەر-جەردەن ءبىلىمدى تالاپكەرلەر اعىلىپ جاتقان شاق ەدى. قازاق توبىنا قابىلدانعان ستۋدەنتتەردىڭ اراسىندا دارحان دا بار ەدى. مەديتسينا ماماندىعىنا كىم دە بولسا اداسىپ كەلمەيتىنى تۇسىنىكتى عوي. كەشەگى تۇلەك – بۇگىنگى ستۋدەنت. شەتىنەن بىرىنەن-ءبىرى وتكەن العىر. مۇنداي ورتادا ەشكىمنىڭ توپتان قالعىسى جوق. دارحان دا قاراجاياۋ ەمەس, قاتارلاستارى سەكىلدى مىقتى مامان بولىپ قالىپتاساتىنىنا ىشتەي سەنىمدى. سوندىقتان سالانىڭ بىلگىرى بولۋ ءۇشىن جاتپاي-تۇرماي ءبىلىم الۋعا ءتيىس ەكەنىن ەرتە تۇسىنگەن. وقۋداعى العاشقى قادامىن سۋبورديناتور ماماندىعىنان باستاعان ول جوعارى كۋرسقا وتكەندە حيرۋرگياعا قىزىعۋشىلىق تانىتقان. دارحان قولىنا ديپلوم العان جىلى وسى ينستيتۋتتىڭ حيرۋرگيا كافەدراسىنىڭ ينتەرناتۋراسىندا وقۋىن جالعاستىردى. بۇگىندە ول – الماتى وبلىسى, جامبىل اۋدانى قارعالى اۋىلىنداعى اۋداندىق اۋرۋحانانىڭ باس دارىگەرى. مەديتسينا عىلىمدارىنىڭ كانديداتى, دوتسەنت, دەنساۋلىق ساقتاۋ سالاسىنىڭ ۇزدىگى.
اۋدان تۇرعىندارى دارحان ءارىپ ۇلىن ءبىلىم-بىلىگىنىڭ ارقاسىندا ەلدىڭ قۇرمەتىنە بولەنىپ جۇرگەن جان دەپ بىلەدى. اۋداندىق اۋرۋحاناعا باسشىلىق قىزمەتكە 2020 جىلى كەلگەن. كارانتين ۋاقىتى, قاۋىرت شاق. ناۋقاس كوپ. ابىروي بولعاندا اۋرۋحانادا بىلىكتى ماماندار جەتكىلىكتى. كوروناۆيرۋس قىسا باستاعان تۇستا بىرلىگى جاراسقان ۇجىمنىڭ ءبىر جاعادان باس, ءبىر جەڭنەن قول شىعارىپ اتقارعان ىستەرى كوپ. ىندەت ءورشىپ تۇرعاندا اۋرۋحاناعا وكپەنى جاساندى جەلدەتۋ اپپاراتىنىڭ سەگىزى جەتكىزىلگەن. قاجەتتى ءدارى-دارمەك, قۇرال-جابدىقتان تارشىلىق كورمەگەن. وسىنداي قيىن-قىستاۋ كەزەڭدە اۋرۋحانادان حيرۋرگيا ءبولىمىن اشۋ وڭاي شارۋا ەمەس. اۋىلدىقتار دارحان ءارىپ ۇلىنىڭ وسى قادامىنا ءدان ريزا. ەڭسەلى اۋرۋحاناعا كورشىلەس ۇمبەتالى, قاسىمبەك, شولاققارعالى اۋىلدارىنىڭ تۇرعىندارى دا كەلىپ, ەم-دومىن الادى. ولار دا باس دارىگەردى تانىپ العان. اۋرۋحانا زاماناۋي تالاپتارعا ساي جابدىقتالعان. تەراپيا, گينەكولوگيا, حيرۋرگيا, پەرزەنتحانا بولىمدەرى اشىلعان. مۇندا ءۇي-ءۇيدى ارالاپ جۇرەتىن پاترونتاجدى دارىگەرلەر دە بارشىلىق. ولاردىڭ دا ەڭبەگىنە ەل ريزا.
بۇگىندە اۋىل تۇرعىندارى دارىگەرگە قارالۋ ءۇشىن قالاعا بارىپ اۋرە بولمايدى. گۋمانيتارلىق كومەك رەتىندە جىلجىمالى رەنتگەن كولىگى قاراستىرىلعان. «نۇرلى جول» باعدارلاماسى ارقىلى جاساقتالعان ەمدىك لابوراتوريا دا بار. بىراق ازىرگە ىسكە قوسىلماپتى. كوپتى قىنجىلتاتىنى – عيماراتتىڭ تارلىعى عانا. ويتكەنى اۋرۋحانا 15 مىڭ ادامعا شاقتالىپ سالىنعان. كەيىنگى جىلدارى حالىق سانى وسكەنى بار, كوشىپ كەلگەنى بار ەمحاناعا ۇزىن-سانى 40 مىڭ ادام تىركەلگەن. اسىرەسە قىس مەزگىلىندە ساپىرىلىسقان جۇرتتىڭ ەمىن-ەركىن ءجۇرىپ-تۇرۋى قيىن كورىنەدى. ول ازداي ءبىر كابينەتتە 3-4 دارىگەردەن وتىرۋعا تۋرا كەلەدى. اۋىل تۇرعىندارى جىل سايىن ۇكىمەتكە قوسىمشا عيمارات كەرەك دەپ جار سالعانىمەن, ازىرگە وتىنىشكە قۇلاق اسار جان تابىلماپتى. دارحان ءارىپ ۇلىنىڭ ءوزى دە ءبىر سوزىندە «ەمحانا جانىنان 350 ادام قابىلداۋعا شاقتالعان تاعى ءبىر نىسان سالىنسا ەكەن» دەگەن ارمانى بارىن ايتىپ ەدى. ءار ادام ءۇشىن دەنساۋلىق – ءبىرىنشى بايلىق. دارىگەرلەر سول بايلىقتى ساقتاۋعا قولدان كەلگەنشە جاردەمدەسەدى, بارىن, جانىن سالادى. ءسوزىمىزدى تۇيىندەي كەلە, ناۋقاستاردىڭ ەمىنە سەبەپشى بولىپ جۇرگەن جوعارى ساناتتى حيرۋرگ دارحان ءارىپ ۇلى سەكىلدى بىلگىر مامان كوپ بولسىن دەمەكپىز.
جانكەلدى امانكەلدى ۇلى
الماتى وبلىسى