بۇگىن ءماجىلىستىڭ جالپى وتىرىسىندا اسحات ايماعامبەتوۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىردى. دەپۋتات ۇسىنىلعان زاڭ نورمالارىنىڭ ىشىندە مەكتەپتەردە ءدىني ادەبيەتتەردى وقىتۋ ماسەلەسىنە تىيىم سالۋ جايى دا كوتەرىلگەنىن مالىمدەدى, دەپ جازادى Egemen.kz.
زاڭ جوباسىنىڭ ءبىر ەرەجەسىندە مەكتەپتەردە بالالار ءۇشىن جاعىمسىز اقپاراتتى تاراتۋعا تىيىم سالۋ قاراستىرىلعان. ول مۇنداي تىيىمنىڭ سالىنۋى مەكتەپتەردىڭ زايىرلى مەكەمە ەكەنىمەن بايلانىستىردى.
«بۇل انىق نورما ءتۇرلى ءدىني قايراتكەرلەردى جانە باسقا دا ءدىني ادەبيەتتەردى نەمەسە اقپاراتتى مەكتەپتەرگە كىرگىزبەۋگە نەگىز بولادى دەپ ويلايمىن. ءبىزدىڭ مەكتەپتەر زايىرلى مەكەمە, تۇسىنەسىز بە؟ سوندىقتان زايىرلى مەكەمە تولىعىمەن زايىرلى بولۋى كەرەك. ەگەر ءدىني ادەبيەتتى وقىعىڭىز كەلسە مۇمكىندىگىڭىز جەتەدى, اتا-اناسى بار. دەگەنمەن بالالار كامەلەت جاسىنا تولعانشا ءارتۇرلى اقپاراتتاردان قورعالۋى كەرەك. ويتكەنى ولارعا قورىتىندى شىعارۋ وتە قيىن», دەدى اسحات ايماعامبەتوۆ.
ءماجىلىس بۇل زاڭ نورماسىن ءبىرىنشى وقىلىمدا قولداپ, سەناتقا جولدادى.