كارتا ارقىلى مەكتەپكە كىرۋ, وقۋ ماتەريالدارىنىڭ قولجەتىمدىلىگى مەن اسحانادا تاماقتانۋ مۇمكىندىكتەرى قامتىلعان جۇيە قاناتقاقتى رەجىمدە ەلوردالىق №95 مەكتەپ-ليتسەيىندە ەنگىزىلگەن ەدى. پرەمەر-ءمينيسترىنىڭ ورىنباسارى تامارا دۇيسەنوۆاعا وقۋشىلارعا ارنالعان ID-كارتالار ءىس جۇزىندە قالاي جۇمىس ىستەيتىنى كورسەتىلدى.
اتالعان جۇيەدە كارتادان بولەك, بيومەتريالىق تانۋ مۇمكىندىگى دە قاراستىرىلعان. بۇل دەگەنىمىز – ەگەر وقۋشى قانداي دا ءبىر سەبەپپەن كارتاسىن ۇمىتىپ نە جوعالتىپ العان جاعدايدا, عيماراتقا بەت-ءجۇزىن تانۋ قۇرىلعىسى ارقىلى كىرە الادى.
ء«بىر كارتا ارقىلى وقۋشى كىتاپحاناداعى وقۋ ماتەريالدارىن الادى, مەكتەپ اسحاناسىندا تاماق ساتىپ الادى, قالالىق اۆتوبۋس قىزمەتىن پايدالانادى», دەدى وقۋ-اعارتۋ ۆيتسە-ءمينيسترى ايبات ءىلياسوۆ.
وسى كارتا مەن بيومەتريا مۇمكىندىكتەرى ۆيتسە-پرەمەرگە كورسەتىلدى. استانالىق مەكتەپتە باستاۋىش سىنىپتاردا ءبىلىم الاتىن 900-گە جۋىق بالا مەن الەۋمەتتىك جاعىنان از قامتىلعان وتباسىلاردا تاربيەلەنىپ جاتقان 36 وقۋشىعا تەگىن تاماق قاراستىرىلعان. ال كارتا قولدانۋ جونىندەگى مالىمەتتەر تەك اتا-انالارعا عانا قولجەتىمدى بولادى.
«تسيفرلاندىرۋ ءبىز ءۇشىن وتە ماڭىزدى. بۇل جۇيەنىڭ اشىقتىعىن قامتىپ, وقۋشى مەن اتا-انا ءۇشىن ىڭعايلى جاعداي جاساپ قانا قويمايدى. مۇندا بالالاردىڭ قاۋىپسىزدىگى ماسەلەسى دە بار», دەدى تامارا دۇيسەنوۆا.
سونىمەن قاتار مۇنداي جۇيەلەر قاناتقاقتى رەجىمدە شىمكەنت قالاسىندا, ماڭعىستاۋ جانە اقتوبە وبلىستارىنداعى مەكتەپتەردە جۇمىس ىستەپ تۇر. وقۋ-اعارتۋ مينيسترلىگى كەلەر جىلدان باستاپ تەحنولوگيانى وزگە وڭىرلەردە ەنگىزۋدى جوسپارلاپ وتىر.