جۇمىسپەن قامتۋدىڭ تىڭ ىزدەنىستەرى

وبلىس اكىمدىگى جۇمىسپەن قامتۋ­دى ۇيلەستىرۋ جانە الەۋمەتتىك باعدار­لا­ما­لار باسقارماسىنىڭ باسشىسى گۇلدانا جاۋىنبەكوۆانىڭ ايتۋىنشا, وڭىردە مۇگەدەكتىگى بار 45 601 ازامات تىركەلگەن. بۇل كورسەتكىش وبلىس حالقىنىڭ 3,7 پا­يىزىن قۇرايدى.

«وسى جىلى مۇگەدەكتىگى بار ادامدار­دىڭ جەكە ابيليتاتسيالاۋ جانە وڭالتۋ باعدارلامالارىنا بيۋدجەتتەن 3,4 ملرد تەڭگە قارجى بولىنگەن. بۇل قارجىنىڭ جارتىسى رەسپۋبليكالىق بيۋدجەتتەن قاراستىرىلسا, قالعانى جەرگىلىكتى بيۋدجەتتەن بەرىلدى. ال وتكەن جىلى 1,9 ملرد تەڭگە بولىنگەن ەدى. كەيىنگى 10 ايدا الەۋ­مەت­تىك قىزمەتتەر ۇسىنۋ پورتالىندا مۇم­كىندىگى شەكتەۋلى ازاماتتاردىڭ جەكە وڭالتۋ باعدارلامالارىنىڭ ورىندالۋى 93 پايىزدى قۇرادى. بۇل كورسەتكىش بويىنشا وڭىرلەر اراسىندا كوش باس­تاپ تۇرمىز. ياعني پورتالعا تىركەلگەن ازاماتتاردىڭ 24 719 ءوتىنىشىنىڭ, 22 967-ءسى قاناعاتتاندىرىلدى. جالپى العاندا, ءوڭىرىمىز بويىنشا 45 601 مۇگەدەكتىگى بار ادام تىركەلگەن بولسا, ونىڭ 6 824-ءى – بالالار. وكىنىشكە قاراي, بۇل ساناتتاعى بالالاردىڭ سانى جىلدان-جىلعا ارتىپ بارا جاتىر. ولاردىڭ 2 مىڭعا جۋىعى تىرەك-قيمىل اپپاراتتارى بۇزىلعان جانە جۇيكە اۋىتقۋلارى بار بالالاردىڭ ساناتىنا قوسىلىپ وتىر. وتكەن جىلى باسقارماعا قاراستى 12 مەديتسينالىق-الەۋمەتتىك مەكەمەلەردە 1 291 ادامعا ارناۋلى الەۋمەتتىك قىزمەتتەر كورسەتىلدى», دەيدى باسقارما باسشىسى.

گ.جاۋىنبەكوۆا كەلتىرگەن دەرەككە جۇگىنسەك, 3 ستاتسيونار جاعدايىنداعى ارناۋ­لى الەۋمەتتىك قىزمەتتەر ۇسىنۋ ورتا­لىعىندا مۇگەدەكتىگى بار 755 ادامعا, 9 جارتىلاي ستاتسيونار جاع­دا­يىندا مۇگە­دەكتىگى بار ادامداردى جانە بالا­لار­دى وڭالتۋ جانە بەيىمدەۋ ورتا­لىق­تارىندا 536 ازاماتقا قىزمەتتەر ۇسى­نىلعان.

«مەملەكەتىمىزدىڭ قولداۋىنىڭ ناتي­جە­سىندە كەيىنگى جىلدارى ارناۋلى الەۋمەتتىك قىزمەتتەردىڭ كولەمى مەن سا­پاسىن جاقسارتۋ ماقساتىندا قىزمەت­تەر­دى ۇسىناتىن مەكەمەلەردىڭ جەلىسىن دامىتۋ جۇمىستارىنا ايرىقشا دەن قو­يىلعان. وسى جىلى سارىسۋ اۋدانىن­دا سىيىمدىلىعى 25 ورىندىق مۇگە­دەكتىگى بار بالالاردى وڭالتۋ جانە بەيىم­دەۋ ورتالىعى اشىلسا, بۇعان دە­يىن حا­بار­لاعانىمىزداي, تاراز قالا­سىندا 150 ورىندىق وڭالتۋ جانە بەيىمدەۋ ورتالىعىنىڭ قۇرىلىسى جۇر­گىزىلىپ, پايدالانۋعا بەرىلدى. قازىرگى تاڭدا وڭالتۋ ورتالىعىندا 110 ازامات قىزمەت الىپ جاتىر. عيماراتتىڭ باستى ەرەكشەلىگى سول, بارلىق جاڭا تەحنولوگيا­لار ەنگىزىلگەن, زاماناۋي تالاپتارعا ساي ءتۇرلى جابدىقتارمەن قامتاماسىز ەتىلگەن. باسسەين, ارنايى ۆاننالار, سپورت زال, مادەني ءىس-شارالار وتەتىن ءماجىلىس زالى بار», دەيدى گ.جاۋىنبەكوۆا.

ونىڭ ايتۋىنشا, جەلتوقسان ايىن­دا تاراز قالاسىندا 110 ورىندىق ءاۋتيزمى بار بالالاردى قولداۋ ورتالىعى اشىل­ماق. قازىرگى كەزدە عيمارات تولىقتاي جون­دەۋدەن وتكى­زىلگەن. «قامقورلىق» قورى­نىڭ قول­داۋىمەن قاجەتتى جابدىقتار تو­لىق­تاي ساتىپ الىنعان.

«جاڭادان اشىلاتىن عيماراتتىڭ قوعامعا پايداسى زور. بۇل ورتالىق ءاۋتيز­مى جانە باسقا دا پسيحيكالىق اۋىت­قۋى بار بالالاردىڭ الەۋمەتتىك پروب­لەمالارىن شەشۋگە جاعداي قالىپ­تاس­تى­رادى. سونداي-اق ولاردىڭ باسقا ازاماتتارمەن تەڭ دارەجەدە قوعام ومىرىنە قاتى­­سۋىنا مۇمكىندىكتەر قاراستىرۋعا باعىت­­تالعان قىزمەتتەر كەشەنىن ۇسىنادى. ءبىر سوزبەن ايتقاندا, ەرەكشە بالالاردىڭ ماسەلەلەرىن شەشۋ جولىندا ورتالىقتىڭ قىزمەتكەرلەرى ايانباي ەڭبەكتەنۋگە ءازىر. تاراز قالاسى مەن اۋدان اكىمدىكتەرىنىڭ جۇمىسپەن قامتۋ جانە الەۋمەتتىك باعدارلامالار بولىمدەرىنىڭ ۇيىمداستىرۋىمەن 14 بولىمشە جانە 1 بولىمشەدەن تىس قىزمەت قاراستىرىلعان. قازىرگى كەزدە ۇيدە قىزمەت كورسەتۋ جاع­دايىندا 711 مۇگەدەكتىگى بار ازاماتقا جانە بالالارعا ارناۋلى الەۋمەتتىك قىز­مەتتەر ۇسىنىلىپ جاتىر», دەيدى گ.جاۋىنبەكوۆا.

وڭىردە مۇگەدەكتىگى بار ازاماتتاردى الەۋمەتتىك تۇرعىدان قورعاۋ جۇمىس­تارىنا ۇكىمەتتىك ەمەس ۇيىمدار دا ايرىقشا اتسالىسىپ ءجۇر. ولار مەملە­كەت­تىك الەۋمەتتىك تاپسىرىس اياسىندا ءتۇرلى قىزمەتتەر ۇيىمداستىرىپ جاتىر.

«بۇل ازاماتتاردىڭ تابىس تابۋىنا تەڭ مۇمكىندىك قاراستىرعان ابزال دەپ ەسەپتەيمىز. ويتكەنى ولاردىڭ دا ەڭبەك ەتۋگە تولىقتاي قۇقىعى بار. قازىرگى كەزدە ولاردى جۇمىسپەن قامتۋ باعىتىندا بىرقاتار جۇمىس اتقارىلىپ جاتقانىن ايتا كەتكەن ءجون. ماسەلەن, اكىمدەردىڭ قاۋلىلارىنا سايكەس وسى جىلعا 51 مەكەمەدە 86 ورىنعا كۆوتا اياسىندا جۇمىس ورىندارى بەلگىلەنىپ, بۇگىندە 68 مۇگەدەكتىگى بار ازامات جۇمىسقا ورنالاستى. سونداي-اق 3 024 مۇگەدەكتىگى بار ازامات جۇمىسپەن قامتۋدىڭ بەلسەندى شارالارىنا تارتىلدى. ولاردىڭ 726-سى تۇراقتى جۇمىسپەن قامتىلسا, 508-ءى اقىلى قوعامدىق جۇمىسقا, 18-ءى الەۋ­مەت­تىك جۇمىس ورىندارىنا, 45 ازامات جاستار تاجىريبەسى بويىنشا جۇ­مىس­قا جولداندى. بۇل كورسەتكىش, ارينە, كوڭىل كونشىتەدى. مۇگەدەكتىگى بار ازاماتتاردى جۇمىسپەن قامتۋدا «العاشقى جۇمىس ورنى» جوباسىنىڭ دا پايداسى تيگەنىن اتاپ وتكەن ءجون. بۇگىندە 15 ازامات اتالعان جوبانىڭ شاراپاتىن كورسە, 43 ازامات «كۇمىس جاس» جوباسىنا قاتىسىپ وتىر. جالپى العاندا, مۇگەدەكتىگى بار ازاماتتاردىڭ ءوزىن-ءوزى دامىتۋىنا دا ايرىقشا نازار اۋدارىپ وتىرعانىمىزدى ايتا كەتكەن ءلازىم. ماسەلەن, قازىرگى كەزگە دەيىن ونلاين وقىتۋ كۋرستارىنا 77 ازامات جولدانىپ, «باستاۋ بيزنەس» كاسىپكەرلىك نەگىزدەرى ارقىلى 1 270 ازامات وقۋدان وتسە, كاسىپتىك وقىتۋ كۋرستارىنا 53 ازامات جولداندى. 269 ازامات جەكە كاسىبىن اشۋعا گرانت الدى», دەيدى گ.جاۋىنبەكوۆا.

باسقارما باسشىسى كەلتىرگەن دەرەكتەردەن ۇققانىمىز, مۇگەدەك ازاماتتارعا جەرگىلىكتى اتقارۋشى بيلىك تاراپىنان ايتارلىقتاي قولداۋ كورسەتىلىپ جاتىر. بۇل باعىتتاعى ىزدەنىستەر الداعى جىلى دا لايىقتى جالعاسىن تاپپاق.

جامبىل وبلىسى