يتاليا دەۆيس كۋبوگىن يەلەندى

شيرەك فينالدا فينليانديا مەن كانادا, اۋستراليا مەن چەحيا جانە يتاليا مەن نيدەرلاند قۇرامالارى ءبىراز تىرەستى. دەسەك تە شەشۋشى تۇستا شيراق قيمىلداعان العاشقىلارى جەڭىسكە جەتتى. وسى كەزدەسۋلەردىڭ ۇشەۋىندە دە 2:1 ەسەبى تىركەلدى. سەربياعا ۇلى­بري­تانيانى ۇتۋ ەش قيىندىق تۋعىز­عان جوق. ولار بارلىق ماسەلەنى ەكى سەتتە شەشتى – 2:0.

جارتىلاي فينالدا اۋستراليا­لىقتار سۋومي ەلى وكىلەرىن ءسۇرىن­دىردى – 2:0. ال يتاليالىقتار مەن سەربيالىقتار اراسىنداعى سا­يىس شيەلەنىسكە تولى بولدى. ال­عاشىندا ميومير كەتسمانوۆيچ لو­رەنتسو مۋزەتتيدى قاپى قالدىرىپ, ءوز كوماداسىن العا شىعاردى. كە­لەسى كەزدەسۋ قوس مەملەكەتتىڭ ماقت­انىشى نوۆاك دجوكوۆيچ پەن يان­نيك سيننەر اراسىندا ءوتتى. وسى باسەكەنىڭ ءفاۆوريتى سەربيانىڭ ساڭلاعى ەكەنى ءسوزسىز. ول – بۇگىنگى تاڭداعى دۇنيە ءجۇزىنىڭ ءبىرىنشى راكەتكاسى جانە الەمدىك تەننيس تاريحىندا ەڭ كوپ ولجاعا كەنەل­گەن ويىن­شى. وسى جاعىنان دجوكوۆيچتىڭ الدىنا تۇسەتىن ەش­كىم جوق. بىراق اتر تىزىمىندە ءتورتىن­شى ورىندا تۇرعان سيننەرگە بۇل جاعداي ەش اسەر ەتكەن جوق. 22 جاستاعى جالىندى جاس سىن ساعاتتا 36 جاس­تاعى داڭقى جەر جارعان ءدۇل­دۇلدى ءسۇرىندىردى. ەسەپ – 6:2, 2:6, 7:5.

فينالدا يتاليا مەن اۋس­تراليا جولىقتى. تۇساۋكەسەر كەز­­دەسۋدە ماتتەو ارنالدي (يتا­ليا) الەكسەي پوپىريندى (اۋسترا­ليا) تىزە بۇكتىردى. ودان كەيىن ءتۇرلى سەبەپتەرگە بايلانىستى مەت­تيۋ ەبدەن/ماكس پەرسەلل مەن سي­مونە بوتەللي/لورەنتسو سونەگو ارا­سىنداعى جۇپتىق سايىس وتپەي قالدى. شەشۋشى تۇستا ياننيك سين­نەر الەكس دە مينوردى 6:3, 6:0 ەسەبىمەن ۇتىپ, اپەننين تۇبەگى جان­كۇيەرلەرىنە شاتتتىققا بولەدى.

ءسويتىپ, يتاليا قۇراماسى ءوز تاريحىندا دەۆيس كۋبوگىن ەكىنشى مارتە ولجالادى. ءبىرىنشى رەت ولار 1976 جىلى ءچيليدىڭ استاناسى سانتياگودا وتكەن فينالدىق ويىندا جارىس قوجايىندارىن 4:1 ەسەبىمەن ويسىراتا ۇتىپ, باس جۇل­دەنى توبەلەرىنە كوتەردى. سول جۇلدىزدى كوماندانىڭ ساپىندا كوررادو بارادزۋتتي, پاولو بەر­تولۋچچي, انتونيو دزۋگارەللي جانە ادريانو پانناتتا سىندى سەركەلەر ونەر كورسەتتى. سودان بەرى 47 جىل دا زىمىراپ وتە شىقتى. مىنە, ەندى ياننيك سيننەر باستاعان سايىپقىراندار بيىل تولاعاي تابىسقا قول جەتكىزىپ وتىر. سونداي-اق ولاردىڭ 1960, 1961, 1977, 1979, 1980, 1998 جىلدارى جالاۋى جەلبىرەگەن جارىستاردىڭ فينالىندا ويناعانىن دا ايتا كەتكەن ابزال.

كەزىندە قازاقستاننىڭ تەن­نيس­شىلەرى دە دەۆيس كۋبوگىندە جاقسى ونەر كورسەتكەن ەدى. ءبىزدىڭ جىگىتتەر 2011, 2013, 2014, 2015, 2018 جانە 2021 جىلدارى اتالعان جارىستىڭ الەمدىك توبىنىڭ شيرەك فينالىندا التى رەت كۇش سىناستى. ودان زور بيىككە كوتەرىلە الماعانىمىزبەن, وسى مەجەگە جە­تۋىمىزدىڭ ءوزى وراسان زور تابىس رەتىندە باعالاندى. ويتكەنى قا­زاقستان قۇراماسى ساپىندا اتاعى الىسقا جايىلعان ويىنشىلار جوقتىڭ قاسى ەدى. بىردە-ءبىر وتان­داسىمىز ەش ۋاقىتتا, تىپتەن, توپ-30 تەننيسشىنىڭ قاتارىنا دا قوسىلماعان. سوعان قاراماستان شەشۋشى تۇستا ءبىر جۇدىرىق بولىپ جۇمىلىپ, تالاي ماڭىزدى ماتچ­تاردا ازۋلى قارسىلاستاردىڭ اۋزىن ۇرىپ كەتتىك. وكىنىشكە قا­راي, كەيىنگى كەزدەرى جولىمىز بول­ماي ءجۇر. بىلتىر يسپانيانىڭ ۆالەن­سياسىندا ۇيىمداستىرىلعان ىرىك­تەۋ تۋرنيرىندە اقش پەن ۇلى­بريتانياعا جول بەرسەك, بيىل لا-سەرەنادا چيليگە ەسە جىبەردىك. وسى­لايشا, سوڭعى ەكى بىردەي ءدۇبىر­لى دودادان شەت قالدىق. بۇيىرت­سا, كەلەسى ماۋسىمدا سول ولقى­لىقتىڭ ورنى تولىپ, وتاندىق تەن­نيسشىلەرىمىز زور تابىسىمەن ءوز جانكۇيەرلەرىن قۋانتادى دەپ ۇمىتتەنەمىز.