گاز باللونى ارقىلى جۇرەتىن تەمىر تۇلپار يەلەرى ەندى كولىكتەرىنە جاڭا بەلگى جابىستىرۋى قاجەت. بۇل وزگەرىستەر 2024 جىلدىڭ 1 قاڭتارىنان باستاپ كۇشىنە ەنەدى, دەپ حابارلايدى Egemen.kz.
قازاقستان ازاماتتارىنىڭ قاۋىپسىزدىگىن قامتاماسىز ەتەتىن ستاندارتتاردى جەتىلدىرۋ بويىنشا جۇمىس بەلسەندى جالعاسىپ جاتىر.
«ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتى توراعاسىنىڭ بۇيرىعى بويىنشا, قازستاندارت ازىرلەگەن, «جول قوزعالىسىن رەتتەۋدىڭ تەحنيكالىق قۇرالدارى. قولدانۋ ەرەجەلەرى» ست 1412-2017 ۇلتتىق ستاندارتىنا تولىقتىرۋلار ەنگىزىلدى. وزگەرىستەر 2024 جىلدىڭ 1 قاڭتارىنان باستاپ كۇشىنە ەنەدى», دەپ حابارلادى قازستاندارت ءباسپاسوز قىزمەتى.
وزگەرىس لەپ بەلگىسى جانە «GAS» دەگەن جازۋى بار قارا جيەكتى سارى ءتۇستى گاز باللون جابدىعى بار اۆتوموبيلدەرگە ارنالعان بەلگىنى مىندەتتى تۇردە ورنالاستىرۋدى ەنگىزەدى.
جاڭا ەرەجەلەر سونىمەن قاتار گازبەن جۇرەتىن كولىكتەردىڭ جابىق تۇراقتاردا تۇرۋىن ءتيىمدى باقىلاۋعا جانە تىيىم سالۋعا مۇمكىندىك بەرەدى, بۇل سايىپ كەلگەندە, ازاماتتاردىڭ جالپى قاۋىپسىزدىگىنە ىقپال ەتەدى.
ەستەرىڭىزگە سالا كەتەيىك, 2019 جىلدىڭ 29 جەلتوقسانىنان باستاپ قاۋىپسىزدىك ماقساتىندا گاز جابدىعىمەن جابدىقتالعان اۆتوكولىكتەرگە جابىق تۇراقتارعا كىرۋگە تىيىم سالىنعان. اۆتوكولىكتەگى سۇيىتىلعان گاز دۇرىس ورناتىلماعان بولسا, ەڭ از ۇشقىن جارىلىس تۋدىرۋى ءۇشىن جەتكىلىكتى, ول تۇراقتاعى كورشى كولىكتەردى زاقىمداپ قانا قويماي, جاقىن ماڭداعى ادامدارعا دا زيان كەلتىرۋى مۇمكىن.
كەيىنىرەك, 2020 جىلى ىشكى ىستەر مينيسترلىگى گاز باللوندىق جابدىقپەن جابدىقتالعان اۆتوكولىكتەردى تانۋ بەلگىسىن ازىرلەدى.