قازاقستان قۇراماسى فۋتزالدان 2024 جىلى وزبەكستاندا جالاۋى جەلبىرەيتىن الەم چەمپيوناتىنىڭ ىرىكتەۋ ءتۋرنيرىنىڭ سوڭعى كەزدەسۋلەرىن قاي جەردە وتكىزەتىنى بەلگىلى بولدى.
جەرلەستەرىمىز ەليتالىق كەزەڭدەگى العاشقى ءتورت كەزدەسۋىنىڭ بارلىعىندا جەڭىسكە جەتتى. اتاپ ايتساق, سىرتتا نيدەرلاند (2:0) پەن ازەربايجاندى (4:2), ءوز الاڭىمىزدا رۋمىنيا (4:3) مەن ازەربايجاندى (3:2) ۇتتىق. الدا ەندى ەكى ماتچ قالدى. 14 جەلتوقساندا استانادا قىزعالداقتار ەلى وكىلدەرىن قابىلدايمىز. ارادا تۋرا ءبىر اپتا وتكەننەن سوڭ بۋحارەستكە ساپار شەگىپ, ۆالەنتين ستەنەسكۋ اتىنداعى «راپيد» سپورت كەشەنىندە رۋمىندارعا قارسى وينايمىز.
ەستەرىڭىزگە سالا كەتەيىك, وسىنىڭ الدىنداعى الەم چەمپيوناتى 2021 جىلى ليتۆادا ءوتتى. بالتىق جاعالاۋىندا باس جۇلدەنى پورتۋگاليا قۇراماسى ولجالادى. پيرەنەي تۇبەگىنىڭ تۇلەكتەرى فينالدا ارگەنتينادان 2:1 ەسەبىمەن ايلاسىن اسىردى. قولا مەدالدى برازيليا يەلەندى. ءۇشىنشى ورىن ءۇشىن تارتىستا ولار قازاقستاندى 4:2 ەسەبىمەن قاپى قالدىردى.