بەلارۋس استاناسى مينسك قالاسىندا وتكەن ۇقشۇ ۇجىمدىق قاۋىپسىزدىك كەڭەسىنىڭ سەسسياسىندا پرەزيدەنت قاسىم-جومارت توقاەۆ حالىقارالىق تەرروريزم مەن ەكسترەميزمگە قارسى ءىس-قيمىل باعىتىنداعى ىنتىماقتاستىقتى دامىتۋ ءىسىن تاعى ءبىر باسىمدىق رەتىندە اتادى. مەملەكەت باسشىسىنىڭ ايتۋىنشا, ۇجىمدىق قاۋىپسىزدىك جۇيەسىنىڭ تەرروريزمگە قارسى قىزمەتىنە ءجىتى نازار اۋدارىلادى, دەپ حابارلايدى Egemen.kz.
«لاڭكەستىك توپتارعا قوسىلۋدى جوسپارلاپ جۇرگەن ازاماتتارىمىزدىڭ ەلدەن تىسقارى شىعىپ كەتۋىنە جول بەرمەۋ ءۇشىن بىرلەسكەن جۇمىستى جالعاستىرعان ءجون. تەرروريزمگە جانە ەكسترەميزمگە قاتىسى بار ادامداردى ىزدەۋ, ۇستاۋ جانە ەكستراديتسيالاۋ تەتىكتەرىن ىسكە قوسۋ ماڭىزدى. ۇقشۇ قاۋىپسىزدىك كەڭەسى حاتشىلارىنىڭ كوميتەتى جانىنداعى تەرروريزم مەن ەكسترەميزمگە قارسى كۇرەس ماسەلەلەرىمەن اينالىساتىن ساراپشىلاردىڭ جۇمىس توبىن جانداندىرۋدى ۇسىنامىز. ۇقشۇ-عا مۇشە ەلدەردىڭ كەڭىستىگىن وسى قاۋىپتى زاتتىڭ ەنۋىنەن قورعاۋ ءۇشىن بىرلەسكەن ءىس-شارالاردىڭ تيىمدىلىگىن ارتتىرۋ قاجەت. جۇمىس رەتىن بارلىق وزەكتى فاكتوردى, سونىڭ ىشىندە سينتەتيكالىق ەسىرتكىنىڭ تارالۋ اياسى كەڭەيە تۇسكەنىن ەسكەرە وتىرىپ ۇيىمداستىرۋ كەرەك. ەسىرتكىنىڭ زاڭسىز اينالىمىنا قارسى كۇرەس جۇرگىزەتىن قۇزىرەتتى ورگاندار جەتەكشىلەرىنەن قۇرالعان ۇيلەستىرۋ كەڭەسى سياقتى مەحانيزم ماڭىزدى ءرول اتقارادى», دەگەن ق.توقاەۆ ۇيىم ەسىرتكى, پسيحوتروپتى زاتتاردىڭ زاڭسىز اينالىمىمەن كۇرەسۋگە دە بىلەك تۇرەنە كىرىسۋ كەرەكتىگىن ايتتى.