قازىرگى جاھاندانۋ زامانىندا ءار ءتۇرلى مادەنيەت وكىلدەرىمەن ىنتىماقتاستىق ورناتۋدىڭ ماڭىزدىلىعى ارتىپ كەلەدى.
وسى ماقساتتا شەتەلدىك Fulbright باعدارلاماسىنىڭ ستيپەندياتى, شىعىس كارولينا ۋنيۆەرسيتەتىنىڭ دوكتورى دجەيمي لەيبوۆيتس ماڭعىستاۋداعى Yessenov University ستۋدەنتتەرىنە Global Understanding («جاھاندىق تۇسىنىك») جوباسىن تانىستىردى. جوبانىڭ جەرگىلىكتى كوورديناتورى بولىپ «تۋريزم جانە تىلدەر» فاكۋلتەتىنىڭ «الەم تىلدەرى» كافەدراسىنىڭ اعىلشىن ءتىلى ءپانى مۇعالىمى زاميرا پۋلاتوۆا تاعايىندالدى. باعدارلاما اياسىندا ول شەتەلدىك ارىپتەسىمەن ستۋدەنتتەردى دايارلاۋ جانە ساۋاتتى قارىم-قاتىناس قۇرۋ تۋرالى جوبانى تالقىلادى.
دجەيمي لەيبوۆيتستىڭ ايتۋىنشا «جاھاندىق تۇسىنىك» جوباسى الەمدىك دەڭگەيدە ىسكە اسادى. ول تەك ستۋدەنتتەردى عانا ەمەس, وقىتۋشىلاردى دا قامتىپ وتىر.
- قازاقستاندا تالقىلاعان جوبامىز ەكى تاراپقا دا قىزىق بولدى. سەبەبى مۇندا جوباعا قاتىسۋشى جاستار وتە العىر, شاپشاڭ, اعىلشىن تىلىندە انىق, تەرەڭ سويلەۋگە قۇشتار ەكەن. مۇنداي زەرەك جاستاردى اۋقىمدى جوبالارعا كوبىرەك تارتىپ, مۇمكىندىكتەرىن اشۋعا قولداۋ ءبىلدىرۋ كەرەك, – دەدى د.لەيبوۆيتس.
جوباعا قاتىسۋشى ستۋدەنتتەر سولتۇستىك كارولينا شتاتىنداعى گرينۆيلل قالاسىندا ورنالاسقان شىعىس كارولينا ۋنيۆەرسيتەتىندەگى (ECU) ستۋدەنتتەرمەن Zoom ارقىلى تىكەلەي بايلانىس ورناتىپ, بىرلەسە جوبا قورعاپ شىقتى. ەكى ەلدىڭ ستۋدەنتتەرى ءتۇرلى تاقىرىپتاردى زەرتتەپ, ماڭىزدى مادەني تۇجىرىمدامالاردى سالىستىرۋعا جانە بۇۇ-نىڭ تۇراقتى دامۋ ماقساتىنا نەگىزدەلگەن ماسەلەلەردى قامتيتىن جوبانى قورعادى.
بۇۇ تۇراقتى دامۋ ماقساتتارى: كەدەيلىككە, اشتىققا جول جوق, مىقتى دەنساۋلىق پەن باقۋاتتىلىق, ساپالى ءبىلىم, گەندەرلىك تەڭدىك, تازا اۋىز سۋ جانە سانيتاريا, تابيعي, قولجەتىمدى ەنەرگيا كوزدەرى, لايىقتى جۇمىس جانە ەكونوميكالىق وركەندەۋ, ونەركاسىپ, يننوۆاتسيا جانە ينفراقۇرىلىم, تەڭسىزدىكتى ازايتۋ, تۇراقتى قالالار مەن قاۋىمداستىقتار, جاۋاپتى تۇتىنۋ جانە ءوندىرىس, كليماتتىڭ وزگەرۋىنە قارسى شارالار, سۋ استىنداعى جانە قۇرلىقتاعى ءومىر, بەيبىتشىلىك, ادىلەتتىلىك جانە كۇشتى ينستيتۋتتار, ماقساتتارعا جەتۋ جولىنداعى سەرىكتەستىكتەر.
ستۋدەنتتەر ينكليۋزيۆتى ءبىلىم بەرۋ جانە life long learning ياعني ءومىر بويى ىزدەنۋ, كليماتتىڭ وزگەرۋى, كاسپي تەڭىزىنىڭ ەكولوگيالىق جاعدايى, جوعارىدا اتالعان ەكى ەلدىڭ تابيعاتتى ايالاۋداعى جاۋاپكەرشىلىگىن ارتتىرۋ جولدارى, سۋ استىنداعى ءومىردى قورعاۋ, بوسانۋ كەزىندەگى انا ءولىمىن بولدىرماۋ سىندى ماسەلەلەردى زەرتتەپ, شەشۋ جولدارىن ۇسىندى. سونداي-اق ولار امەريكالىق قۇرداستارىمەن دوستىق قارىم-قاتىناستارىن جالعاستىرۋ ءۇشىن GPS Connect جەلىلىك پلاتفورماسىن قولداندى. ەكى اپتاعا سوزىلعان جوبا ناتيجەسىندە ستۋدەنتتەرگە ەستەلىك سىيلىقتار مەن سەرتيفيكاتتار تابىستالدى.
جاينا مولداعالي