باتىس قازاقستان وبلىسىندا ەكى ءجاسوسپىرىم قاريانىڭ ۇيىنە كىرىپ توناپ كەتكەن. ۇستالعان كۇدىكتىنىڭ ءبىرى جابىرلەنۋشىنىڭ نەمەرەسى بولىپ شىقتى, دەپ حابارلايدى Egemen.kz Polisia.kz-كە سىلتەمە جاساپ.
باتىس قازاقستان وبلىسى بايتەرەك اۋدانى, پريۋرال پوليتسيا ءبولىمىنىڭ كەزەكشىسىنە ايەل ادام قوڭىراۋ شالىپ, قارت اكەسىن توناپ كەتكەنىن حابارلاعان. «وقيعا ورنىنا دەرەۋ جەدەل-تەرگەۋ توبى مەن ۋچاسكەلىك پوليتسيا ينسپەكتورى جىبەرىلدى. دابىل بويىنشا پوليتسيا ءبولىمىنىڭ بارلىق جەكە قۇرامى جۇمىلدىرىلدى. وقيعا ورنىنا بارا جاتقان جولدا ۋچاسكەلىك پوليتسيا ينسپەكتورى جول بويىندا ەكى جىگىتتى بايقايدى, بىراق جىگىتتەر پوليتسيا قىزمەتكەرىنىڭ ولارعا قاراي بەت العانىن بايقاپ, قاشىپ كەتەدى. الايدا پوليتسيا قىزمەتكەرى بىرەۋىن تانىپ ۇلگەرەدى. وقيعا ورنىنا جەتكەن پوليتسەيلەر تەكسەرۋ جۇمىستارىن جۇرگىزۋ بارىسىندا بەلگىسىز ەكى جىگىتتىڭ ەگدە جاستاعى ەرلى-زايىپتىلار تۇراتىن ۇيگە كىرىپ, ەر ادامعا دەنە جاراقاتىن سالىپ, ونى توناپ, 190 مىڭ تەڭگە كولەمىندەگى اقشاسىن ۇرلاپ كەتكەنىن انىقتادى. جەدەل-ىزدەستىرۋ ءىس-شارالارى ناتيجەسىندە پوليتسيا قىزمەتكەرلەرى 18 جانە 17 جاستاعى ەكى جىگىتتى داريان اۋىلىندا قولعا ءتۇسىردى. ونىڭ ءبىرى جابىرلەنۋشىنىڭ ءوز نەمەرەسى بولىپ شىقتى», دەلىنگەن اقپاراتتا.
نەمەرەسى دوسىمەن بىرگە اتاسى تۇرعان ۇيگە كەلىپ تەرەزەدەن ىشكە ەنگەن. كۇدىكتىلەر قاريانى قۇلاتىپ قالتاسىنداعى قوماقتى قاراجاتىن الىپ كەتكەن. جابىرلەنۋشىنىڭ نەمەرەسىنە ەرىپ كەلگەن كۇدىكتىنىڭ قالتاسىنان تاپانشا مەن جينالمالى پىشاق تابىلعان. بايتەرەك اۋداندىق پوليتسيا ءبولىمىنىڭ ۋاقىتشا ۇستاۋ يزولياتورىنا قامالعان ەكەۋدىڭ ۇستىنەن قك-ءنىڭ 192-بابى 3-بولىگى (قاراقشىلىق) بويىنشا سوتقا دەيىنگى تەرگەۋ امالدارى جۇرگىزىلىپ جاتىر.