23 قاراشا كۇنى استانا ۋاقىتىمەن ساعات 12:55-تە رەسپۋبليكا بويىنشا حالىقتى قۇلاقتاندىرۋ سيرەنالارى ىسكە قوسىلادى, دەپ حابارلايدى Egemen.kz توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
توتەنشە جاعدايلار مينيسترلىگى 23 قاراشا كۇنى رەسپۋبليكا تەرريتورياسىندا ءبىر ۋاقىتتا دابىل سيرەنالارىن ىسكە قوسادى. ول ءۇشىن ەلەكتر سيرەنالارى, سيرەنالىق-سويلەۋ قۇرىلعىلارى ىسكە قوسىلىپ, تەلەۆيدەنيە جانە راديوعا قوسىلۋ جۇرگىزىلەدى.
ءىس-شارا «قىس-2023» رەسپۋبليكالىق كوماندالىق-شتابتىق وقۋ-جاتتىعۋى اياسىندا وتەدى.
«ەستەرىڭىزگە سالا كەتەيىك, توتەنشە جاعداي ورىن العان كەزدە حالىقتىڭ نازارىن اۋدارۋ ءۇشىن ەلەكتر سيرەنالار, سيرەنالىق-سويلەۋ قۇرىلعىلارى نەمەسە باسقا دا دابىل قۇرالدارى قوسىلادى, ول «بارشانىڭ نازارىنا!» بىرىڭعاي قۇلاقتاندىرۋ دابىلىن بىلدىرەدى. بۇل دابىلدى ەستىگەن كەزدە تۇرعىندار ورىن العان جاعداي كەزىندە ارەكەت ەتۋ تۋرالى مالىمەتتەر مەن نۇسقاۋلار الۋ ءۇشىن قولجەتىمدى اقپارات قابىلداۋ قۇرالدارىن تەلەارنالار, راديولار, ينتەرنەت سايتتار, الەۋمەتتىك جەلىلەر, ءموبيلدى قۇرىلعىلارعا ارنالعان قوسىمشالار جانە ت.ب. دەرەۋ قوسۋى كەرەك», دەلىنگەن مينيسترلىك حابارلاماسىندا.
توتەنشە جاعدايلار مينيسترلىگى ازاماتتاردى سابىر ساقتاپ, ۇرەيگە بوي الدىرماۋعا شاقىردى.