ءانشى, قازاقستاننىڭ ەڭبەك سىڭىرگەن قايراتكەرى مەيرامبەك بەسباەۆ جامبىل وبلىسىنىڭ امانگەلدى اتشابارىندا سالىم قورى 25 ميلليون تەڭگەلىك كوكپار بەردى, دەپ حابارلايدى Egemen.kz.
«ات ەر قاناتى. اتقا قونعان بالۋاننىڭ ىقىلاسىن, ەلدىڭ تىلەۋىن تىلەگەن ەل-جۇرت ۇلكەندەردىڭ باتاسىن قاشان الاسىڭ؟ مەيرامبەكتىڭ كوكپارىن قاشان تارتامىز؟ سوڭعى كەزدە اۋىلعا, تۋعان ولكەگە بارعاندا الدىمنان كوپ شىعاتىن ساۋال. العاشىندا بوس ماقتان ءۇشىن دەپ ەل سوگەر, جۇرت بوسقا مال شاشىپ جاتىر دەپ ايتار… وسىنداي كوپ كۇمانمەن كەلىسپەي ءجۇر ەدىم. كوكپار كوپتىكى عوي دەگەن تىلەۋلەس دوس-جاران ءبىر شەشىمگە كەلتىرىپ, سالىم دەيتىن ولجا قورىن وزدەرى كوتەرىپ وتىر. سالىم قورى جيىرما بەس ميلليون تەڭگە. ودانشا ول قارجىنى نەگە قايىرىمدىلىققا جۇمسامايدى دەپ الدىن-الا سوكپەڭىزدەر. قايرىمدىلىقتى كوكپارعا دەيىن دە جاساپ كەلەم, كوكپاردان كەيىن دە جاسالا بەرەدى. ال نەسىبەسى مەن ەڭبەگى كوكپارعا بايلانعان ازاماتتاردى مەنىڭ دە ەلەۋىم زاڭدىلىق شىعار», دەگەن ءانشىنىڭ باتا كوكپارى ءتۇن اۋعانشا تارتىلدى.
ءانشى ينستاگرام پاراقشاسىندا ءدۇبىرلى دودانىڭ وتۋىنە اتسالىسقان جاقىندارىنا العىسىن ايتىپ, «كوكپاردىڭ قانشالىقتى مازمۇندى-ماعىنالى ەكەنىن جانە بۇل ءداستۇردىڭ قالتارىس-بۇلتارىسىن سەزىنىپ تولقىعانىن» دا جەتكىزدى.
ات جاراتىپ, كوكپار دۋىن كۇتىپ جۇرگەن جانداردىڭ ەڭبەگى ەرەن ەكەنىن كوزىن جەتكىزگەن ونەر يەسى جامبىل وبلىسىنىڭ اكىمدىگىنە دە رازىلىعىن ءبىلدىردى.
«جامبىل وبلىسى اكىمدىگىنە العىس ايتقىم كەلەدى. ءتارتىپ, تازالىق, ساقتىق باسقا دا حالىققا قىزمەت كورسەتۋ ساپاسىندا ءبىر ءمىن بولعان جوق», دەدى ءانشى.