پرەمەر-ءمينيستردىڭ ءبىرىنشى ورىنباسارى رومان سكليار بەرلينگە جۇمىس ساپارى اياسىندا ەكى ەلدىڭ ىسكەرلىك ىنتىماقتاستىعىنىڭ وزەكتى تەندەنتسيالارىن نەمىس كومپانيالارى توبىمەن دوڭگەلەك ۇستەل باسىندا تالقىلادى.
پرەمەر-ءمينيستردىڭ ءبىرىنشى ورىنباسارى رومان سكليار قازاقستان ۇكىمەتىنىڭ رەسپۋبليكانىڭ ينۆەستيتسيالىق تارتىمدىلىعىن ارتتىرۋ جونىندەگى جوسپارلارى جانە مەملەكەتتىك قولداۋدىڭ قولجەتىمدى شارالارى تۋرالى ايتىپ بەردى.
دوڭگەلەك ۇستەلگە قاتىسۋشىلار قازاقستانمەن كووپەراتسيانى ودان ءارى كەڭەيتۋ بويىنشا بىرقاتار ناقتى ۇسىنىس ايتتى. بۇل تۇستا ماشينا جاساۋ, تاۋ-كەن ونەركاسىبى, كولىك جانە لوگيستيكا, اۋىل شارۋاشىلىعى, مەديتسينا, قارجى جانە تاعى باسقالارى باسىمدىققا يە.
سونىمەن قاتار بۇل ءىس-شاراعا بيىلعى ماۋسىم ايىندا قۇرىلعان بىرلەسكەن جوبالاردى قارجىلاندىرۋ جانە تاۋەكەلدەردى حەدجەرلەۋ جونىندەگى جۇمىس توبىنىڭ مۇشەلەرى دە قاتىستى.
ء«بىزدى «قازاقستاندا نەمىس ساپاسىنا ساي جاسالعان» فورمۋلاسى بويىنشا ءونىم شىعاراتىن وندىرىستەردى قۇرۋداعى ىنتىماقتاستىق قىزىقتىرىپ وتىر», دەدى ر.سكليار.
پرەمەر-ءمينيستردىڭ ءبىرىنشى ورىنباسارىنىڭ ايتۋىنشا, گەوساياسي جاعدايداعى وزگەرىستەر مەن ىسكەرلىك احۋالدىڭ جاقسارۋى بۇگىندە قازاقستان مەن گەرمانيانىڭ ءوزارا ءتيىمدى ەكونوميكالىق ىنتىماقتاستىعى ءۇشىن جاڭا مۇمكىندىكتەر اشادى.
وعان قوسا ر.سكليار گەرمانيانىڭ جەتەكشى ىسكەرلىك بىرلەستىكتەرىمەن كەلىسسوزدەر جۇرگىزىپ, بىرنەشە ءىرى نەمىس كومپانياسىمەن ەكىجاقتى كەزدەسۋلەر وتكىزدى.
گەرمانيا ونەركاسىبى فەدەرالدىق وداعىنىڭ (BDI) باسقارما مۇشەسى ۆ. نيدەرماركپەن وداققا قاتىسۋشىلاردى قازاقستاننىڭ يندۋستريالىق الەۋەتىن جاڭعىرتۋعا جانە ارتتىرۋعا تارتۋ مۇمكىندىكتەرى تالقىلاندى. بۇل – گەرمانيانىڭ نەگىزگى ەكونوميكالىق قاۋىمداستىعى, ونىڭ ىشىندە 40 سالالىق بىرلەستىك جانە 8 ميلليونعا جۋىق قىزمەتكەرى بار 100 مىڭنان استام كومپانيا كىرەتىن ۇلكەن ۇيىم.
گەرمانيا ەكونوميكاسى شىعىس كوميتەتىنىڭ اتقارۋشى ديرەكتورى م.حارمسپەن كەلىسسوز كەزىندە قازاقستان-گەرمانيا ىسكەرلىك كەڭەسى, ساۋدا-ەكونوميكالىق ىنتىماقتاستىق جونىندەگى قازاق-نەمىس ۇكىمەتارالىق جۇمىس توبى, بىرلەسكەن جوبالاردى قارجىلاندىرۋ جانە تاۋەكەلدەردى حەدجەرلەۋ جونىندەگى جۇمىس توبى, بەرلين ەۋرازيالىق كلۋبى سياقتى بىرلەسكەن ينستيتۋتسيونالدىق ديالوگ پلاتفورمالارىنىڭ قىزمەتىن جەتىلدىرۋ ماسەلەلەرى قوزعالدى. گەرمانيا ەكونوميكاسى شىعىس كوميتەتى شىعىس ەۋروپا مەن ازيانىڭ 29 ەلىنە قاتىستى فەدەرالدى ۇكىمەتتىڭ ساياساتىن قالىپتاستىرۋعا قاتىسادى, سونداي-اق ءبىراز ەل ۇيىمدارىندا نەگىزگى سەرىكتەس بولىپ وتىر.
كومپانيا وكىلدەرىمەن ەكىجاقتى كەزدەسۋلەر اياسىندا قازاقستاندا ينۆەستيتسيالىق جوبالاردى ىسكە اسىرۋداعى ىنتىماقتاستىق مۇمكىندىكتەر تۋرالى ۇسىنىستار قارالدى. اتاپ ايتقاندا, مەتاللۋرگيا, وڭدەۋ جانە تاۋ-كەن ونەركاسىبى, حيميا ونەركاسىبى, قۇرىلىس ماتەريالدارىن ءوندىرۋ جانە تاعى دا باسقا سالالار بويىنشا مۇمكىندىكتەر قارالدى.
«LANXESS AG», «Rain Carbon», «HMS Bergbau AG», «Diehl Stiftung», «G. Zwiehoff GmbH» جانە تاعى دا باسقا كومپانيالاردىڭ باسشىلىعىمەن كەلىسسوزدەر جۇرگىزىلدى.
ساپار بارىسىندا سالالىق مينيسترلىكتەر مەن ۇلتتىق كومپانيالاردان قوسىلعان دەلەگاتسيا مۇشەلەرى وزدەرىنىڭ جۇمىس باعىتتارى بويىنشا جەكە كەزدەسۋلەر وتكىزدى.
ايتا كەتۋ كەرەك, قازاقستان – گەرمانيانىڭ وڭىردەگى جەتەكشى ساۋدا-ەكونوميكالىق سەرىكتەسى. ونىڭ ۇلەسىنە گەرمانيانىڭ ورتالىق ازيا ەلدەرىمەن ساۋداسىنىڭ بارلىق كولەمىنىڭ 80%-دان استامى تيەسىلى.