استاناداعى جاقسىلىق ۇشكەمپىروۆ اتىنداعى جەكپە-جەك سارايىندا دزيۋدودان ەرلەر مەن ايەلدەر اراسىنداعى قازاقستان چەمپيوناتى ءوز مارەسىنە جەتتى. اتالعان جارىستا ەلىمىزدىڭ 17 وبلىسى مەن 3 قالاسىنان كەلگەن 463 بالۋان باق سىنادى.
ەرلەر اراسىندا ماڭعىستاۋ وبلىسىنىڭ قۇراماسى ەكى التىن مەدالدى ولجالاپ, جالپى كوماندالىق ەسەپتە كوش باستادى. قارت كاسپيدىڭ جاعالاۋىنان كەلگەن جىگىتتەردىڭ اراسىنان اسقار نارقۇلوۆ پەن مەيىرلان ماكسيمنىڭ مەرەيى ۇستەم بولدى. 73 كگ سالماقتا كۇرەسكەن اسقار اقتىق سىندا جەتىسۋلىق دارحان قويباعاروۆتى قاپى قالدىرسا, 81 كگ سالماقتاعى مەيىرلان ابايلىق جالعاس قايروللانى جىقتى. بۇل سالماق دارەجەلەرىندە قولا مەدالدى سەمەيلىك قۋان بارىس (73 كگ) پەن الماتى وبلىسىنىڭ وكىلى يسلام توقتاسىن (73 كگ) جانە ورالدىق اڭسار عاينۋللين (81 كگ) مەن استانالىق ءمادي امانگەلدى (81 كگ) يەلەندى.
جامبىل, قىزىلوردا جانە قاراعاندى وبلىسىنىڭ بالۋاندارى بىردەي ناتيجە كورسەتتى. ولاردىڭ ارقايسىسى 1 التىن مەن 1 قولانى قورجىنعا سالدى. اۋليەاتا توپىراعىنان كەلگەن اپايتوستەر اراسىنان 60 كگ سالماقتاعى قانات سەرىكباەۆتىڭ ەكپىنىنە ەشكىم شىدامادى. حالىقارالىق ارەنادا تابىستى ونەر كورسەتىپ جۇرگەن قانداسىمىز فينالدا ەرجان ەرەنعايىپوۆتى (استانا) ەڭسەردى. مىڭبولات مەيرامبەكوۆ (قىزىلوردا) پەن داۋرەن سۇيەكەنوۆ (الماتى وبلىسى) ءۇشىنشى ساتىعا تابان تىرەدى. سىر بويى سايىپقىراندارى اراسىندا اسا اۋىر سالماقتاعى ەلامان ەرعاليەۆتىڭ شوقتىعى بيىك بولدى. كەزىندە «قازاقستان بارىسى» اتانعان تۇيە بالۋان شەشۋشى تۇستا تاجىريبەلى ءادىل ورازباەۆتى (اباي) تازا تاستاپ, يپپونمەن ۇتتى. ءمادي ەدىلباەۆ (الماتى وبلىسى) پەن عالىمجان قىرىقباي (جامبىل) قولا مەدالدى موينىنا ءىلدى. قاراعاندىنىڭ باپكەرلەرى بۇل جولى دا ازيا ويىندارى مەن قۇرلىق چەمپيوناتىنىڭ جۇلدەگەرى, ەكى بىردەي وليمپياداعا قاتىسقان يسلام بوزباەۆقا سەنىم ارتتى. 100 كگ سالماقتا ايقاسقان 32 جاستاعى ساقا سپورتشى سول سەنىمدى تولىعىمەن اقتادى. فينالدا يسلام ادىلەت ساپارعاليەۆكە (اتىراۋ) سان سوقتىردى. ەرماحان ەستاي (استانا) مەن بەكزات شاعاتاەۆ (اتىراۋ) قولاعا قول سوزدى.
اقتوبە ءوڭىرىنىڭ ورەندەرى باس جۇلدەنىڭ بىرەۋىن ەنشىلەدى. 66 كگ سالماق دارەجەسىنىڭ فينالدىق سايىسىندا نۇرسۇلتان زايزاعاليەۆتى سۇرىندىرگەن ەسەت قۋانوۆ ءوز كورەرمەندەرىن قۋانتتى. ەلامان سۇلتانباي (الماتى وبلىسى) مەن الماس عالىموۆ (اباي) ءۇشىنشى ساتىعا تۇراقتادى. تۇركىستاندىق تارلانداردىڭ دا كورسەتكىشى ءدال سونداي. 90 كگ سالماقتا سايىسقا تۇسكەن ايدار اراپوۆتىڭ ايدارىنان جەل ەستى. ەرماحان انۋاربەكوۆ (اباي) كۇمىسپەن كۇپتەلسە, اسقار ءبىرجانوۆ (قاراعاندى) پەن قۇدىرەت دوسىموۆ (شىمكەنت) قولا مەدالدى يەمدەندى.
ايەلدەر سايىسىندا جەتىسۋ وبلىسىنىڭ بۇرىمدىلارى وتە كەرەمەت ونەر كورسەتتى. ساراپقا سالىنعان جەتى باس جۇلدەنىڭ ۇشەۋىن سولار ولجالادى. اتاپ ايتساق, ديانا بۋركەەۆا (48 كگ), نۇرسۇلۋ ەراليەۆا (52 كگ) جانە كاميلا بەرلىقاش (+78 كگ) قارسىلاس شاق كەلتىرمەدى. فينالدا نۇرسۇلۋ ەلىمىزدىڭ تانىمال دزيۋدوشىسى, ەۋروپا كۋبوگىنىڭ يەگەرى, پورتۋگاليادا وتكەن گران-پري ءتۋرنيرىنىڭ كۇمىس جۇلدەگەرى عاليا تىنباەۆانى تىزە بۇكتىرسە, كاميلا ءوزىنىڭ سىرالعى قارسىلاسى, ۇلتتىق كوماندانىڭ مۇشەسى نازگۇل ماراتوۆانى ءسۇرىندىردى.
اقتوبەنىڭ ەكى ارۋى التىننان القا تاقتى. ولار – باقىت قۇساقباەۆا (57 كگ) مەن ارۋنا جانگەلدينا (78 كگ). بۇل جارىستا باقىت الەم چەمپيوناتى مەن ازيا ويىندارىنا قاتىسۋشى سەۆارا نىشانباەۆادان ايلاسىن اسىردى. اتىراۋلىق ەسميگۋل كۋيۋلوۆا (63 كگ) مەن الماتى وبلىسىنىڭ وكىلى ەكاتەرينا توكارەۆا دا (70 كگ) بارلىق باسەكەلەسىنەن باسىم ءتۇسىپ, جەڭىس تۇعىرىنىڭ ەڭ بيىك ساتىسىنا كوتەرىلدى.
وسى ورايدا مىنا ءبىر وقيعا ەسكە ءتۇسىپ وتىر: حح عاسىردىڭ توقسانىنشى جىلدارىندا قازاقستاننىڭ ۇلتتىق قۇراما كومانداسىنىڭ ساپىندا جاناربەك قوڭىرباەۆ پەن گۇلنار ىسقاقوۆ ەسىمدى ەرلى-زايىپتى سامبوشىلار ونەر كورسەتكەن ەدى. ەكەۋى دە ەل چەمپيوناتىندا توپ جارىپ, حالىقارالىق ارەنادا ازدى-كوپتى تابىسقا قول جەتكىزدى. كۇنى كەشە استانادا وتكەن ەل بىرىنشىلىگىندە دە ءدال سونداي جاعدايدىڭ كۋاسى بولدىق. اسا اۋىر سالماقتا الدىنا جان سالماعان كاميلا بەرلىقاشتىڭ كۇيەۋى يسلام توقتاسىن 73 كگ سالماقتا بەلدەسىپ, قولا مەدالدى موينىندا جارقىراتتى.
تاعى ءبىر ايتا كەتەرلىك جايت, ەلدوس سمەتوۆ, ماعجان شامشاددين, عۇسمان قىرعىزباەۆ, ءابيبا ابۋجاقىنوۆا, دانيار شامشاەۆ, نۇرلىحان شارحان سىندى قازاقستاننىڭ ءبىر توپ بەلدى بالۋاندارى ءتۇرلى سەبەپكە بايلانىستى استانادا وتكەن جارىسقا قاتىسقان جوق.