شاحماتتىڭ راپيد پەن بليتس تۇرلەرىنەن ەرلەر مەن ايەلدەر اراسىنداعى كەزەكتى الەم چەمپيوناتى 26-30 جەلتوقسان ارالىعىندا وزبەكستاننىڭ سامارقان قالاسىندا وتەدى.
بۇل حاباردى حالىقارالىق شاحمات فەدەراتسياسى (FIDE) تاراتتى. بىلتىر ءدال وسى جارىس الماتىدا ۇيىمداستىرىلعان ەدى. بالۋان شولاق اتىنداعى سپورت سارايىندا ۇيىمداستىرىلعان بايراقتى باسەكەدە 2013-2023 جىلدار ارالىعىندا تورتكۇل دۇنيەنىڭ تەڭدەسسىزى دەپ تانىلعان شۆەتسيالىق ماگنۋس كارلسەننىڭ قارقىنىنا ەشكىم شىدامادى. ول شاحماتتىڭ ەكى تۇرىنەن دە باس جۇلدەنى ولجالادى. ايەلدەر سايىسى ءبيبىسارا اسۋباەۆا (بليتس) مەن قىتايلىق تان ءچجۋنيدىڭ (راپيد) جەڭىسىمەن اياقتالدى. وسىلايشا, قازاق قىزى بليتستەن الەمنىڭ ەكى دۇركىن چەمپيونى اتاندى. ال دينارا سادۋاقاسوۆا (راپيد) كۇمىس مەدالدى موينىنا ءىلدى.
«FIDE مۇشەلەرى وزبەكستاندا شاحمات وتە جاقسى قارقىنمەن دامىپ كەلە جاتقانىنا سان مارتە كوز جەتكىزدى. ونى تولىقتاي مويىندايمىز. سول سەبەپتى دە ءبىز سول ەلگە اتالعان جارىستى وتكىزۋدى سەنىپ تاپسىرىپ وتىرمىز. ولاردىڭ وسى ءدۇبىرلى دودانى اسا جوعارى دەڭگەيدە ۇيىمداستىراتىنىنا قىلاۋداي دا كۇمانىمىز جوق», دەيدى FIDE پرەزيدەنتى اركادي دۆوركوۆيچ.