قازاقستان ۇلتتىق بانكى قازاقستان رەسپۋبليكاسى ۇلتتىق ۆاليۋتاسىنىڭ 30 جىلدىعىنا وراي 15 قاراشادان باستاپ نومينالى 10 000 تەڭگەلىك مەرەيتويلىق بانكنوتانى اينالىمعا شىعارادى, دەپ حابارلايدى Egemen.kz nationalbank.kz-كە سىلتەمە جاساپ.
بانكنوتادا 19 قورعانىش ەلەمەنتى بار. مونەتا بەينەلەنگەن ديزايندا نەگىزگى گولوگرافيالىق ەلەمەنت – تەڭگەنىڭ «₸» بەلگىسى قولدانىلعان. بانكنوتانىڭ ەكى جاعىندا دا شەكسىز قوزعالىستىڭ سيمۆولى – «ميوبيۋس لەنتاسى» بار.
بانكنوتانىڭ الدىڭعى بەتىندە قازاقى ويۋ-ورنەكپەن ءداستۇرلى ستيلدە بەزەندىرىلگەن قازاقستان كارتاسى ايماقتارىمەن بەينەلەنگەن. بانكنوتانىڭ ەكىنشى بەتىندە كارتاداعى ەۋرازيا قۇرلىعىنىڭ جالپى كونتۋرى سىزىلعان. وندا 5 مم ماگنيتتى قورعانىش ءجىپ پەن «₸» بەلگىسى تۇرىندەگى سپارك ەلەمەنتى بار.
نومينالى 10 000 تەڭگەلىك مەرەيتويلىق بانكنوتا ءوز قۇنىنا ساي قازاقستان رەسپۋبليكاسىنىڭ بۇكىل اۋماعىندا تولەمنىڭ بارلىق ءتۇرى بويىنشا قابىلدانادى.