ءانشى دوسىمجان تاڭاتاروۆ تەاتر ديرەكتورى قىزمەتىنەن نەگە كەتكەنىن ءتۇسىندىردى

«بۇل جاقىن كۇندەرى عانا شەشىلگەن دۇنيە. تەاتر سالاسىندا 2,5 جىل ءجۇرىپپىن. ءادىل احمەتوۆتىڭ كەزىندە 2 جىل ورىنباسار بولدىم. ءادىلدىڭ 2 جىلدىڭ كولەمىندە كوپتەگەن دۇنيەلەردەن قولى قاعىلىپ جاتتى. ونى ءوزىم دە كورىپ ءجۇردىم. تەاتردى قۇرعان نۇرقانات اعامىز سول ەكى جىلدىڭ ىشىندە مەنى سىناپ, بايقاپ جۇرگەن بولۋى كەرەك. اعامىزدىڭ ءبىر ايتقان ءسوزى بار: ء«بىز سەنى ۇلكەن ءانشى رەتىندە, ۇلكەن ازامات رەتىندە بىلەتىنبىز, ەندى ۇلكەن اعا, جاقسى ءىنى ەكەنىڭە كوزىمىز جەتتى» دەگەن ەدى. ديرەكتورلىق قىزمەتتە جەرگەن كەزدە ءادىل كوپتەگەن دۇنيەلەرىنەن قالىپ كەتىپ جاتتى. ءادىلدىڭ سۇراۋىمەن مەنى ديرەكتورلىققا تاپسىرايىق دەگەن ۇسىنىس ءتۇستى. ول كەزدە جاقسى دەپ بىردەن قۋانا كەتتىك. ءادىل احمەتوۆ قازىر ەلدىڭ اۋزىندا جۇرگەن ۇلكەن اكتەر. سول كوپ دۇنيەلەردەن قالىپ جاتقاندا ءبىر كومەگىم وسى بولسىن دەپ كەلىسكەنمىن», دەيدى ءانشى. 

ال ەندى تەاتر باسشىلىعىنان كەتۋگە ونىڭ جەكە شىعارماشىلىعى مەن سەنىم ارتىپ تاپسىرىلعان قىزمەتتى قاتار الىپ جۇرە الماۋى سەبەپ بولعان ەكەن.

«تەاتر ديرەكتورى بولعاننان كەيىن ونىڭ وسۋىنە, وركەندەۋىنە اكىمشىلىكپەن, قوعاممەن تىكەلەي بايلانىستا بولۋ كەرەك. ازدى-كوپتى جۇمىس ىستەدىك. بىراق بايقاسام ءوزىمنىڭ شىعارماشىلىعىم اقساپ بارا جاتىر. تەاتردىڭ جاۋاپكەرشىلىگى وزىڭدە بولعاننان كەيىن كوپ جەرگە بارا الماي قالادى ەكەنسىڭ. سوندىقتان شىعارماشىلىقپەن قىزمەت بىردەي الىپ جۇرە المايتىن دۇنيە بولعاننان كەيىن كەلىسىممەن الدىلارىنان ءوتتىم. ونىڭ ۇستىنە قازىرگى ديرەكتوردىڭ مىندەتىن اتقارىپ جۇرگەن ازامات ەسقۇلوۆ باۋىرىمىز كەلدى. ونى مەن ءۇش ايداي كۇتتىم. ول ءوزى وسى قىزمەتتى ءارى قاراي جالعاستىرۋعا قۇلشىنىس ءبىلدىردى. كوللەكتيۆتىڭ بارلىعى ازاماتقا سەنىم ارتتى. ءبىراز جىل جۇمىس ىستەگەننەن كەيىن الىپ كەتەتىن سەكىلدى بولدى. سودان كەيىن مەن جۇمىستى ازاماتقا تاپسىرىپ, ءوزىمنىڭ شىعارماشىلىعىما بەت بۇردىم», دەيدى د.تاڭاتاروۆ.

ايتا كەتەيىك, ءانشى, قازاقستاننىڭ ەڭبەك سىڭىرگەن قايراتكەرى دوسىمجان تاڭاتاروۆ استاناداعى «جاستار تەاترىنىڭ» ديرەكتورى قىزمەتىنە 2023 جىلدىڭ 5 مامىرىندا تاعايىندالعان ەدى.