جۋىردا جامبىلدىڭ ادەبي-مەموريالدى مۋزەيىنە ۇلى اقىن تۋرالى ەڭ العاشقى جازباشا دەرەكتى («تەرمە» جۋرنالى, 1925 ج) حاتقا ءتۇسىرىپ, ونى ءباسپاسوز بەتىندە جاريالاعان بەلگىلى عالىم شامعالي سارىباەۆتىڭ نەمەرەسى مايرا سارىباي كەلىپ, 1958 جىلى «قازاق ادەبيەتى» گازەتىنىڭ №6 (163) سانىندا جارىق كورگەن «جامبىل جايىندا تۇڭعىش دەرەك» اتتى ماقالانىڭ كسەروكوشىرمەسى مەن 1936 جىلى ماسكەۋ قالاسىندا تۇسىرىلگەن تاريحي فوتوسۋرەتتىڭ (اقىننىڭ جانىندا شارا جيەنقۇلوۆا مەن كۇلاش بايسەيىتوۆا) تۇپنۇسقاسىن تابىستاپ, مۋزەي قورىن ءبىرشاما بايىتا تۇسكەندىگى تۋرالى اتالعان مۋزەيدىڭ عىلىمي قىزمەتكەرى راتبەك تەرلىكباەۆ حاباردار ەتتى.
«شامعالي ۇستازدىڭ نەمەرەسى مايرا اپاي مۋزەيگە سىيعا تارتقان مىنا تاريحي سۋرەتتە ۇلى جامبىل بابامىز قازاقتىڭ اسا كورنەكتى ونەر شەبەرلەرى – بي پاتشايىمى شارا جيەنقۇلوۆا مەن بۇلبۇل ءۇندى ءانشىمىز كۇلاش بايسەيىتوۆانىڭ ورتاسىندا تۇر. راس, ۇشەۋىنىڭ بۇدان باسقا راكۋرستا تۇسىرىلگەن سۋرەتى بۇرىن دا باسپا بەتىن كورگەن. ال ءۇش ارداقتىنىڭ مىنا تۇرعىداعى بەينەسى باسپاسوزگە تۇڭعىش رەت ۇسىنىلىپ وتىر.
مايرا اپاي مۋزەيگە ۇسىنعان «جامبىل جايىندا تۇڭعىش دەرەك» اتتى ماقالانىڭ اۆتورى شامعالي حارەس ۇلى ءوز ومىرىندە بارلىق جاعىنان ۇلگىلى ۇستاز, اعارتۋ ءىسىنىڭ شەبەر ۇيىمداستىرۋشىسى بولعان. ول جوعارى وقۋ ورىندارىندا ءدارىس بەرىپ, ءوزىنىڭ بويىنداعى ادىسكەرلىك مۇمكىندىكتەرىن, مول تاجىريبەسىن سارقا پايدالانعان. ستۋدەنتتەردىڭ پەداگوگيكالىق تاجىريبەسىن دە ءوزى باسقارىپ, شاكىرتتەرىن تاڭداعان ماماندىعىنىڭ قىرى مەن سىرىن جەتە مەڭگەرۋگە, ولارعا ۇستازدىق ۇلاعاتىن سىڭىرە بىلۋگە بار كۇشىن سالدى. عالىم-اعارتۋشى قازاق ءتىل ءبىلىمى مەن ونى وقىتۋ ادىستەمەسىنە مول ۇلەس قوستى. ول 200-گە تارتا عىلىمي-ادىستەمەلىك ەڭبەكتەر, ماقالالار جازدى. قازاق ءتىلىن ورىس مەكتەپتەرىندە وقىتۋ ادىستەمەسىنەن كولەمدى ەڭبەك جازىپ, 1944 جىلى كانديداتتىق ديسسەرتاتسيا قورعاپ, دوتسەنت اتانعان», دەيدى مۋزەي قىزمەتكەرى راتبەك تەرلىكباەۆ.
الماتى وبلىسى